ರಿಜ್ವಾನ್‌, ಉಸ್ಮಾನ್‌ ಶತಕ; ಯುಎಇಗೆ 6 ವಿಕೆಟ್‌ ಜಯ

ಅಬುಧಾಬಿ: ಐರ್ಲೆಂಡ್‌ ನೀಡಿದ ದೊಡ್ಡ ಮೊತ್ತದ ಸವಾಲನ್ನು ದಿಟ್ಟ ರೀತಿಯಲ್ಲಿ  ಬೆನ್ನಟ್ಟಿದ  ಯುಎಇ, ಮೊದಲ ಏಕದಿನ ಪಂದ್ಯ ವನ್ನು 6 ವಿಕೆಟ್‌ಗಳಿಂದ ಜಯಿಸಿದೆ.

ಆರಂಭಕಾರ ಪಾಲ್‌ ಸ್ಟರ್ಲಿಂಗ್‌ ಅವರ 131 ರನ್‌ ಪರಾಕ್ರಮದಿಂದ ಐರ್ಲೆಂಡ್‌ 5 ವಿಕೆಟಿಗೆ 269 ರನ್‌ ಪೇರಿಸಿದರೆ, ಯುಎಇ 49 ಓವರ್‌ಗಳಲ್ಲಿ ನಾಲ್ಕೇ ವಿಕೆಟಿಗೆ 270 ರನ್‌ ಬಾರಿಸಿತು. ಸಿ. ರಿಜ್ವಾನ್‌ 109 ಮತ್ತು ಮುಹಮ್ಮದ್‌ ಉಸ್ಮಾನ್‌ ಅಜೇಯ 102 ರನ್‌ ಹೊಡೆದು ತಂಡದ ಗೆಲುವಿಗೆ ಕಾರಣರಾದರು.

ಇಬ್ಬರಿಗೆ ಕೋವಿಡ್ ಈ ಪಂದ್ಯಕ್ಕೂ ಮೊದಲು ಯುಎಇಯ ಇಬ್ಬರು ಕ್ರಿಕೆಟಿಗರಲ್ಲಿ ಕೊರೊನಾ  ಪಾಸಿಟಿವ್‌ ಕಂಡು ಬಂತು. ಇವರೆಂದರೆ, ಯುಎಇ ತಂಡದ ಉಪನಾಯಕ ಸಿರಾಗ್‌ ಸುರಿ ಮತ್ತು ಆರ್ಯನ್‌ ಲಾಕ್ರಾ. ಇವರಿಬ್ಬರೂ ಈಗ ಐಸೊಲೇಶನ್‌ನಲ್ಲಿದ್ದಾರೆ ಎಂದು ಯುಎಇ ಕ್ರಿಕೆಟ್‌ ಮಂಡಳಿಯ ಪ್ರಕಟನೆ ತಿಳಿಸಿದೆ.