ಟೈರ್‌ಗಳಿಗೆ ಮೂರು ಗುಣಮಟ್ಟ ನಿಗದಿ: ಅಪಘಾತ ತಡೆಯಲು ಕೇಂದ್ರ ಸಾರಿಗೆ ಇಲಾಖೆಯ ಆದೇಶ

ನವದೆಹಲಿ: ರಸ್ತೆ ಅಪಘಾತಗಳನ್ನು ತಡೆಯುವ ಉದ್ದೇಶದಿಂದ ಹಲವಾರು ಕ್ರಮಗಳನ್ನು ಜಾರಿಗೊಳಿಸುತ್ತಿರುವ ಕೇಂದ್ರ ಸಾರಿಗೆ ಸಚಿವಾಲಯ, ಇದೀಗ ವಾಹನಗಳ ಟೈರ್‌ಗಳ ಸುಧಾರಣೆಯ ಕಡೆಗೆ ತನ್ನ ಗಮನ ಹರಿಸಿದೆ.

ಮಳೆ ಮತ್ತಿತರ ಸಂದರ್ಭಗಳಲ್ಲಿ ವಾಹನಗಳ ಸುಗಮ ಚಾಲನೆ ಸಾಧ್ಯವಾಗದ ಕಾರಣ ಅಪಘಾತಗಳು ಸಂಭವಿಸುವ ಹಿನ್ನೆಲೆಯಲ್ಲಿ ಟೈರುಗಳ ಗುಣಮಟ್ಟವನ್ನು ಹೆಚ್ಚಿಸುವ ನಿಟ್ಟಿನಲ್ಲಿ ಮೂರು ಗುಣಮಟ್ಟಗಳನ್ನು ನಿಗದಿಗೊಳಿಸಿ ಸಚಿವಾಲಯ ಆದೇಶ ಹೊರಡಿಸಿದೆ. ಚಕ್ರಗಳ ತಿರುಗುವ ಸಾಮರ್ಥ್ಯ ಚೆನ್ನಾಗಿರಬೇಕು, ಒದ್ದೆಯಾಗಿರುವಾಗಲೂ ಹಿಡಿತ ಚೆನ್ನಾಗಿರಬೇಕು, ತಿರುಗುವಾಗ ಶಬ್ದ ಕಡಿಮೆಯಿರಬೇಕು ಎಂದು ಸೂಚಿಸಿದೆ.

2019ರಲ್ಲಿ ಹೊರಡಿಸಿದ ವಾಹನೋದ್ಯಮಗಳ ನಿಯಮಗಳಿಗೆ ತಕ್ಕಂತಿರಬೇಕು ಎಂದು ಎಲ್ಲಾ ಟೈರು ತಯಾರಿಕಾ ಕಂಪನಿಗಳಿಗೆ ತಿಳಿಸಲಾಗಿದೆ. ಅಲ್ಲದೆ, ಈ ವರ್ಷ ಅಕ್ಟೋಬರ್‌ನಿಂದ ಕಾರುಗಳು, ಬಸ್‌ಗಳು, ಟ್ರಕ್‌ಗಳ ಟೈರುಗಳು ಮೂರು ವಿಧದ ಗುಣಮಟ್ಟವನ್ನು ಕಡ್ಡಾಯವಾಗಿ ಹೊಂದಿರಬೇಕಾಗುತ್ತದೆ.

ಏನು ಲಾಭ?:
ಟೈರ್‌ಗಳು ಹೆಚ್ಚೆಚ್ಚು ತಿರುಗುವ ಸಾಮರ್ಥ್ಯ ಪಡೆದಾಗ ಇಂಧನ ಉಳಿತಾಯವಾಗುತ್ತದೆ. ಅದಕ್ಕಾಗಿ ಎಂಜಿನ್‌ ಹೆಚ್ಚಿನ ಇಂಧನ ಬಳಸುವುದನ್ನು ತಡೆಯಬಹುದು. ಒದ್ದೆಯಾದಾಗಲೂ ಟೈರ್‌ಗಳು ಉತ್ತಮ ಹಿಡಿತವನ್ನು ಹೊಂದಿದ್ದರೆ ಬ್ರೇಕ್‌ ಸಾಮರ್ಥ್ಯ ವೃದ್ಧಿಸುತ್ತದೆ, ಸುರಕ್ಷತೆಯೂ ಉತ್ತಮಗೊಳ್ಳುತ್ತದೆ. ಟೈರ್‌ಗಳು ಕಡಿಮೆ ಶಬ್ದ ಉಂಟು ಮಾಡುವಂತೆ ಬದಲಾದರೆ, ರಸ್ತೆಗಳಲ್ಲಿ ಶಬ್ದದ ಪ್ರಮಾಣವನ್ನು ತಗ್ಗಿಸಬಹುದು ಎಂದು ಸಚಿವಾಲಯ ತಿಳಿಸಿದೆ.