ಕಾರು ಮರಕ್ಕೆ ಢಿಕ್ಕಿಯಾಗಿ ಇಬ್ಬರು ಎಂಬಿಬಿಎಸ್‌ ವಿದ್ಯಾರ್ಥಿಗಳ ಸಾವು

ಅಂಬಾಲಾ : ಸಿಂಬ್ಲಾ ಗ್ರಾಮಕ್ಕೆ ಸಮೀಪದ ಜಗದ್ರಿ ಹೈವೇಯಲ್ಲಿ ಕಾರು ಮರಕ್ಕೆ ಢಿಕ್ಕಿಯಾಗಿ ಸಂಭವಿಸಿದ ಭೀಕರ ಅಪಘಾತದಲ್ಲಿ ಇಬ್ಬರು ಎಂಬಿಬಿಎಸ್‌ ವಿದ್ಯಾರ್ಥಿಗಳು ದಾರುಣ ಸಾವನ್ನು ಕಂಡ ಘಟನೆ ವರದಿಯಾಗಿದೆ.

ಜೈಪುರದ ಅಭಿಮನ್ಯು 23 ಮತ್ತು ಲೂಧಿಯಾನದ ನಿವಾಸಿಯಾಗಿರುವ ಆಕಾಶ್‌ 23 ಎಂಬವರು ಸಾಗುತ್ತಿದ್ದ ಕಾರು ನಿಯಂತ್ರಣ ಕಳೆದುಕೊಂಡು ರಸ್ತೆ ಬದಿಯ ಮರಕ್ಕೆ ಢಿಕ್ಕಿ ಹೊಡೆದಾಗ ಇಬ್ಬರೂ ಸ್ಥಳದಲ್ಲೇ ಮೃತಪಟ್ಟರು. 

ಆಕಾಶ್‌ ಮತ್ತು ಅಭಿಮನ್ಯು ಇಲ್ಲಿನ ಮುಲ್ಲಾನಾ ಎಂಬಲ್ಲಿನ ಎಂಎಂ ಮೆಡಿಕಲ್‌ ಕಾಲೇಜಿನ ಅಂತಿಮ ವರ್ಷದ ಎಂಬಿಬಿಎಸ್‌ ವಿದ್ಯಾರ್ಥಿಗಳಾಗಿದ್ದಾರೆ. ಮರಣೋತ್ತರ ಪರೀಕ್ಷೆಯ ಬಳಿಕ ಇವರ ಶವಗಳನ್ನು ಅವರ ಮನೆಯವರಿಗೆ ಬಿಟ್ಟುಕೊಡಲಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.