91 ಗಂಟೆಗಳ ಕಾಲ ಅವಶೇಷಗಳ ಅಡಿಯಲ್ಲಿ ಸಿಲುಕಿದರೂ ಬದುಕುಳಿದ 3 ವರ್ಷದ ಬಾಲೆ!

ಇಜ್ಮಿರ್‌: ಟರ್ಕಿಯ ಪಶ್ಚಿಮ ಭಾಗದ ಇಜ್ಮಿರ್‌ನಲ್ಲಿ ಪ್ರಬಲ ಭೂಕಂಪ ಸಂಭವಿಸಿದ 91 ಗಂಟೆಗಳ ಬಳಿಕ ಅವಶೇಷಗಳಡಿ ಸಿಲುಕಿದ್ದ 3 ವರ್ಷದ ಬಾಲಕಿಯೊಬ್ಬಳನ್ನು ರಕ್ಷಿಸಲಾಗಿದೆ.

“100ಕ್ಕೂ ಹೆಚ್ಚು ಮಂದಿಯ ಸಾವನ್ನು ಕಂಡ ನಾವು ಇಂದು ಸಣ್ಣಮಟ್ಟಿನ ಖುಷಿ ಅನುಭವಿಸಿದ್ದೇವೆ. ಪವಾಡವೆಂಬಂತೆ, 91 ಗಂಟೆಗಳ ಬಳಿಕವೂ ಬದುಕುಳಿದಿದ್ದ ಮಗುವನ್ನು ರಕ್ಷಿಸಿದ್ದೇವೆ’ ಎಂದು ಇಜ್ಮಿರ್‌ ಮೇಯರ್‌ ಟಂಕ್‌ ಸೊಯೇರ್‌ ಹೇಳಿದ್ದಾರೆ.

ಮಗು ಉಸಿರಾಡುತ್ತಿದೆ ಎಂಬುದು ತಿಳಿದ ತಕ್ಷಣ ಸುತ್ತಲಿದ್ದವರೆಲ್ಲರೂ “ಗಾಡ್‌ ಈಸ್‌ ಗ್ರೇಟ್‌'(ದೇವರು ದೊಡ್ಡವನು) ಎಂದು ಘೋಷಣೆ ಕೂಗಿದ್ದಾರೆ. ಕಳೆದ ವಾರ ಸಂಭವಿಸಿದ 7.0 ತೀವ್ರತೆಯ ಭೂಕಂಪವು 102 ಮಂದಿಯನ್ನು ಬಲಿಪಡೆದು, 994 ಮಂದಿಯನ್ನು ಗಾಯಗೊಳಿಸಿದೆ.