ನಿಮ್ಮ ತಾಯಿ ಚೀನಿ ಆಗಿರುವುದರಿಂದ ನೀವು ಮೋದಿ ವಿರೋಧಿಸುವುದಾ?

ನವದೆಹಲಿ: ಭಾರತದ ಮಾಜಿ ಬ್ಯಾಡ್ಮಿಂಟನ್‌ ಆಟಗಾರ್ತಿ ಜ್ವಾಲಾ ಗುಟ್ಟಾ ತಮ್ಮ ಆಟಕ್ಕಿಂತ ಸೌಂದರ್ಯದಿಂದಲೇ ಹೆಸರುವಾಸಿ. ಟ್ವೀಟರ್‌ನಲ್ಲಿ ಸಕ್ರಿಯರಾಗಿರುವ ಇವರಿಗೆ ಅಣಕಗಳು ಹೊಸತೇನಲ್ಲ. ವಿಶೇಷವೆಂದರೆ ಅಣಕಿಸಿಕೊಂಡಾಗಲೆಲ್ಲ  ಜ್ವಾಲಾ ಬೆಂಕಿಯಂತಹ ಉತ್ತರ ನೀಡಿ ಅಣಕಪಟುಗಳ ಬಾಯುಚ್ಚಿಸಿದ್ದಾರೆ. ಮೋದಿ ವಿರೋಧಿ ಎಂದು ಗುರ್ತಿಸಿಕೊಂಡಿರುವ ಜ್ವಾಲಾ, ಆ ಕಾರಣಕ್ಕೆ ಎದುರಿಸಿದ ಅಣಕಕ್ಕೆ ಅಷ್ಟೇ ತೀಕ್ಷ್ಣವಾಗಿ ಉತ್ತರಿಸಿ ಮತ್ತೂಮ್ಮೆ ಸುದ್ದಿಯಾಗಿದ್ದಾರೆ.

ನಿಮ್ಮ ತಾಯಿ ಚೀನಿ ಮೂಲದವರಾಗಿರುವುದರಿಂದಲೇ ನೀವು ಮೋದಿಯನ್ನು ವಿರೋಧಿಸುವುದಾ ಎಂದು ವ್ಯಕ್ತಿಯೊಬ್ಬ ಜ್ವಾಲಾಗೆ ಟ್ವೀಟ್‌ ಮೂಲಕ ಅಣಕಿಸಿದ್ದ. ಇದಕ್ಕೆ ಪ್ರತಿಕ್ರಿಯೆ ನೀಡಿದ್ದ ಜ್ವಾಲಾ, ಮಾತನಾಡುವಾಗ 2 ಬಾರಿ ಯೋಚಿಸಿ. ನಾನು ಉತ್ತರಿಸುವಷ್ಟು ಯೋಗ್ಯತೆ ನಿಮಗಿಲ್ಲ. ಧೈರ್ಯವಿದ್ದರೆ ಪ್ರಶ್ನೆಯನ್ನು ಸಂಬಂಧಪಟ್ಟವರಿಗೆ ನೇರವಾಗಿ ಕೇಳಿ ಎಂದಿದ್ದರು. ಜ್ವಾಲಾ ತಾಯಿ ಯೆಲನ್‌ ಅವರು ಚೀನಾದ ತಿಯಾಂಜಿನ್‌ನವರು. ತಂದೆ ಹೈದರಾಬಾದ್‌ನ ಕ್ರಾಂತಿ ಗುಟ್ಟಾ. ಸದ್ಯ ಭಾರತ-ಚೀನಾ ಗಡಿವಿವಾದ ಜೋರಾಗಿರುವುದರಿಂದ ಟ್ವೀಟಿಗ ಈ ಸಂದರ್ಭ ಬಳಸಿಕೊಂಡ ಜ್ವಾಲಾ ಕೆಣಕಲು ಯತ್ನಿಸಿದ್ದ. ಆದರೆ ಅದರಲ್ಲಿ ದಯನೀಯವಾಗಿ ವಿಫ‌ಲರಾಗಿದ್ದಾರೆ.