Advertisement
ಮುಷ್ಕರ ಹಿನ್ನೆಲೆ ಯಾದಗಿರಿ ವಿಭಾಗದ 317 ಮಾರ್ಗಗಳಲ್ಲಿ ಸಂಚರಿಸುವ ಸಾರಿಗೆ ಬಸ್‌ಗಳು ಸೇವೆ ನೀಡಲಿಲ್ಲ. ಅಲ್ಲದೆ ಕೊರೊನಾ ಮಾರ್ಗಸೂಚಿಯಂತೆ ಜನರು ಒಂದೆಡೆ ಸೇರುವುದು, ಪ್ರತಿಭಟನೆಗೆ ನಿಷೇಧ ಇರುವುದರಿಂದ ಸಾರಿಗೆ ಇಲಾಖೆ ನೌಕರರು ಮನೆಗಳಲ್ಲಿಯೇ ಉಳಿದಿದ್ದರು. ಮುನ್ನೆಚ್ಚರಿಕೆಯಾಗಿ ಬಸ್ ನಿಲ್ದಾಣಗಳಲ್ಲಿ ಪೊಲೀಸ್‌ ಇಲಾಖೆ ಬಂದೋಬಸ್ತ್ ಕಲ್ಪಿಸಿತ್ತು.
ಕೆಲವು ವಾಹನಗಳು ಸಂಚರಿಸಿ ನೆರೆ ರಾಜ್ಯದಿಂದ ಪ್ರಯಾಣಿಕರು ರಾಜ್ಯ ಪ್ರವೇಶಿಸಲು ಅನುಕೂಲವಾಯಿತು. ಇನ್ನು ಜಿಲ್ಲೆಯಲ್ಲಿ ಗ್ರಾಮೀಣ ಭಾಗದ ಜನರು ದಿನನಿತ್ಯದ ಕೆಲಸ ಕಾರ್ಯಗಳಿಗೆ ಖಾಸಗಿ ಟಂಟಂ ಆಟೋ, ಕ್ರೂಸರ್ ಅವಲಂಬಿಸಿದ್ದರು.ಜಿಲ್ಲೆಯಲ್ಲಿ ಯಾದಗಿರಿ, ಶಹಾಪುರ, ವಾಡಿ, ಗುರುಮಠಕಲ್, ಸೈದಾಪುರ, ವಡಗೇರಾ ಹೀಗೆ ಹಲವೆಡೆ 150ರಿಂದ 200ರಷ್ಟು ಖಾಸಗಿ ವಾಹನಗಳು ಸಾರ್ವಜನಿಕರಿಗೆ ಸೇವೆ ನೀಡಿರುವ ಕುರಿತು ಸಾರಿಗೆ ಇಲಾಖೆ ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆ