ಕೊಂಡ್ಲಹಳ್ಳಿ: ಯಾವ ಭೂಮಿ ಫಲವತ್ತತೆಯಿಲ್ಲವೋ ಅಲ್ಲಿನ ರೇಷ್ಮೆ ಬೆಳೆಯಲ್ಲಿ ಬೇರು ಕೊಳೆ ರೋಗ ಬರುತ್ತದೆ ಎಂದು ಮೈಸೂರು ಕೇಂದ್ರ ರೇಷ್ಮೆ ಮಂಡಳಿಯ ರೇಷ್ಮೆ ವಿಜ್ಞಾನಿ ಡಾ| ಅರುಣ್‌ಕುಮಾರ್‌ ತಿಳಿಸಿದರು.
ಬಿಳಿನೀರು ಚಿಲುಮೆ ದೇವಸ್ಥಾನದ ಸಮೀಪದ ಬಿ.ಟಿ. ಹನುಮಾರೆಡ್ಡಿ ತೋಟದಲ್ಲಿ ರೇಷ್ಮೆ ಇಲಾಖೆ ತಾಂತ್ರಿಕ ಸೇವಾ ಕೇಂದ್ರ ಮೊಳಕಾಲ್ಮೂರು ಹಾಗೂ ಕೃಷಿ ಇಲಾಖೆಯ ಆತ್ಮ ಯೋಜನೆಯ ಸಂಯುಕ್ತಾಶ್ರಯದಲ್ಲಿ ಆಯೋಜಿಸಿದ್ದ ತರಬೇತಿ ಕಾರ್ಯಕ್ರಮದಲ್ಲಿ ಮುಖ್ಯ ಅತಿಥಿಯಾಗಿ ಮಾತನಾಡಿದರು.
ಭೂಮಿಯಲ್ಲಿ ಸೂಕ್ಷ್ಮಾಣುಜೀವಿಗಳಿದ್ದಾಗ ಫಲವ ತ್ತಾಗಿರುತ್ತದೆ .ಆಗ ಬೆಳೆಯು ಉತ್ತಮವಾಗಿರುತ್ತದೆ. ಮಣ್ಣಿನ ಫಲವತ್ತತೆ ಬಗ್ಗೆ ರೇಷ್ಮೆ ಬೆಳೆಗಾರರು ಹೆಚ್ಚು ನಿಗಾ ವಹಿಸಬೇಕು. ಮಣ್ಣಿನ ಫಲವತ್ತತೆಯನ್ನು ಹೆಚ್ಚಿಸುವಲ್ಲಿ ಮಣ್ಣಿಗೆ ಲಘು ಪೋಷಕಾಂಶಗಳು ಅತಿ ಮುಖ್ಯ ಪಾತ್ರ ವಹಿಸುತ್ತವೆ. ಫಲವತ್ತತೆ ಹೆಚ್ಚಿಸಿದಲ್ಲಿ ಶೇ.70-80 ರಷ್ಟು ಇಳುವರಿ ಪಡೆಯಬಹುದು. ಕೌಶಲ್ಯದೊಂದಿಗೆ ಮುಂಜಾಗ್ರತೆಯ ಕ್ರಮಗಳನ್ನು ರೇಷ್ಮೆ ಬೆಳೆಯಲ್ಲಿ ರೈತರು ತಪ್ಪದೇ ಪಾಲಿಸಬೇಕು ಎಂದರು.
ತೋಳಹುಣಸೆ ರೇಷ್ಮೆ ತರಬೇತಿ ಕೇಂದ್ರದ ಸಹಾಯಕ ನಿರ್ದೇಶಕ ಹರಿಕೃಷ್ಣ ಅವರು ಎಲೆ ತುಕ್ರ ರೋಗದ ಬಗ್ಗೆ ಮಾಹಿತಿ ನೀಡಿದರು. ರೇಷ್ಮೆ ಇಲಾಖೆಯ ಜಿಲ್ಲಾ ಉಪ ನಿರ್ದೇಶಕ ಬಿ.ಎಲ್‌. ಕೃಷ್ಣಪ್ಪ, ಸಹಾಯಕ ನಿರ್ದೇಶಕ ಕೆಂಜೋಜಿ ರಾವ್‌, ಚಿತ್ರದುರ್ಗದ ವಿಜ್ಞಾನಿ ವೈ. ಶ್ರೀನಿವಾಸುಲು, ಗ್ರಾಪಂ ಸದಸ್ಯ ಎಸ್‌. ಕೆ. ನಿಂಗರಾಜ್‌, ಮೊಳಕಾಲ್ಮೂರು ತಾಲೂಕು ರೇಷ್ಮೆ ಸಹಾಯಕ ನಿರ್ದೇಶಕ ಎಸ್‌.ಕೆ. ಪರಮೇಶ್‌, ಇಲಾಖೆ ಸಿಬ್ಬಂದಿ ಮಹೇಶ್‌ ಇದ್ದರು.
