Train ಚಲಿಸುವಾಗ ಕೊಂಡಿ ತುಂಡು: ಬೇರ್ಪಟ್ಟ ಬೋಗಿ

ಪಟ್ನಾ: ರೈಲಿನ 2 ಬೋಗಿಗಳನ್ನು ಜೋಡಿಸುವ ಕೊಂಡಿ ತುಂಡಾದ ಕಾರಣ ದಿಲ್ಲಿ-ಇಸ್ಲಾಂಪುರ ಮಗಧ್‌ ಎಕ್ಸ್‌ಪ್ರಸ್‌ನ ಬೋಗಿಗಳು ಪ್ರತ್ಯೇಕಗೊಂಡಿವೆ. ಘಟನೆಯಲ್ಲಿ ಯಾರಿಗೂ ಅಪಾಯ ಉಂಟಾಗಿಲ್ಲ ಎಂದು ರೈಲ್ವೇ ಇಲಾಖೆ ತಿಳಿಸಿದೆ. ಬಿಹಾರದ ಬಕ್ಸರ್‌ ಜಿಲ್ಲೆಯ ಟ್ವಿನಿಗಂಜ್‌ ಹಾಗೂ ರಘುನಾಥಪುರ ರೈಲು ನಿಲ್ದಾಣಗಳ ನಡುವೆ ರವಿವಾರ ಈ ಘಟನೆ ನಡೆದಿದೆ. ಮಧ್ಯಾಹ್ನದ ಬಳಿಕ ರೈಲು ಸಂಚಾರ ಆರಂಭವಾಗಿದೆ.

ಟ್ವಿನಿಗಂಜ್‌ ನಿಲ್ದಾಣ ದಾಟಿ ಮುಂದೆ ಹೋಗುವಾಗ ರೈಲಿನ ಕೊಂಡಿ ತುಂಡಾಗಿದ್ದು, 2 ಬೋಗಿಗಳು ರೈಲು ಚಲಿಸುತ್ತಲ್ಲೇ ಪ್ರತ್ಯೇಕಗೊಂಡಿದೆ. ಹವಾನಿಯಂತ್ರಿತ ಎಸ್‌-7 ಬೋಗಿ ಮುಂದೆ ಸಾಗಿದ್ದು ಅದರ ಹಿಂದಿನ ಬೋಗಿಗಳು ಹಾಗೇ ನಿಂತಿವೆ. ಇದನ್ನು ಗಮನಿಸಿದ ಲೋಕೋಪೈಲಟ್‌ ಎಚ್ಚೆತ್ತುಕೊಂಡು ಮೇಲಧಿಕಾರಿಗಳಿಗೆ ಮಾಹಿತಿ ನೀಡಿದ್ದಾರೆ. ತತ್‌ಕ್ಷಣ ಸ್ಥಳಕ್ಕಾಗಮಿಸಿದ ರಕ್ಷಣ ತಂಡ ಹಾಗೂ ತಾಂತ್ರಿಕ ತಂಡ ಪರಿಶೀಲನೆ ನಡೆಸಿವೆ. ಈ ಬಗ್ಗೆ ಕಾರಣ ತಿಳಿದುಕೊಳ್ಳಲು ತನಿಖೆಗೆ ಆದೇಶ ನೀಡಲಾಗಿದೆ ಪೂರ್ವ ಕೇಂದ್ರ ರೈಲ್ವೇ ವಿಭಾಗದ ಮುಖ್ಯ ಸಾರ್ವಜನಿಕ ಸಂಪರ್ಕ ಅಧಿಕಾರಿ ಸರಸ್ವತಿ ಚಂದ್ರ ತಿಳಿಸಿದ್ದಾರೆ.