ಟೋಕಿಯೊ ಒಲಿಂಪಿಕ್ಸ್‌ ಟೆನಿಸ್‌ ಫೈನಲ್ಸ್‌ ನಿಯಮ ಬದಲಾವಣೆ

ಲಂಡನ್: ಟೋಕಿಯೊ ಒಲಿಂಪಿಕ್ಸ್‌ ಟೆನಿಸ್‌ ಸ್ಪರ್ಧೆಯ ಫೈನಲ್‌ ನಿಯಮದಲ್ಲಿ ಕೊಂಚ ಬದಲಾವಣೆಗಳಾಗುವ ಸಾಧ್ಯತೆ ಇದೆ. ಫೈನಲ್‌ ಪಂದ್ಯ ಐದರ ಬದಲು 3 ಸೆಟ್‌ಗಳಲ್ಲಿ ನಡೆಯಲಿದೆ ಎಂದು ಅಂತಾರಾಷ್ಟ್ರೀಯ ಟೆನಿಸ್‌ ಫೆಡರೇಶನ್‌ (ಐಟಿಎಫ್) ಹೇಳಿದೆ.

ಇದು ಪುರುಷರ ಚಿನ್ನದ ಪದಕದ ಪಂದ್ಯ ಸಹಿತ ಉಳಿದ ಸಿಂಗಲ್ಸ್‌ ಪಂದ್ಯಗಳಿಗೂ ಅನ್ವಯವಾಗಲಿದೆ. ರಿಯೋ ಒಲಿಂಪಿಕ್ಸ್‌ ಫೈನಲ್‌ನಲ್ಲಿ ಆ್ಯಂಡಿ ಮರ್ರೆ ಪ್ರಶಸ್ತಿ ಉಳಿಸಿಕೊಳ್ಳುವ ಹಾದಿಯಲ್ಲಿ ಜುವಾನ್‌ ಮಾರ್ಟಿನ್‌ ಡೆಲ್‌ ಪೊಟ್ರೊ ವಿರುದ್ಧ 4 ಗಂಟೆ ಮತ್ತು 4 ಸೆಟ್‌ಗಳ ಹೋರಾಟ ನಡೆಸಿದ್ದರು.

“ಈ ತಿದ್ದುಪಡಿಯಿಂದ ಸಿಂಗಲ್ಸ್‌, ಡಬಲ್ಸ್‌ ಮತ್ತು ಮಿಕ್ಸೆಡ್‌ ಡಬಲ್ಸ್‌ ವಿಭಾಗದ ಫೈನಲ್‌ ತಲುಪುವ ಆಟಗಾರರ ಕಳವಳವನ್ನು ಕಡಿಮೆ ಮಾಡಲಿದೆ’ ಎಂದು ಐಟಿಎಫ್ ಹೇಳಿದೆ.
ಪುರುಷರ ಮತ್ತು ವನಿತಾ ಡಬಲ್ಸ್‌ ಫೈನಲ್‌ನಲ್ಲಿ ನಿರ್ಣಾಯಕ 3ನೇ ಸೆಟ್‌ ಬದಲು 10 ಅಂಕಗಳ ಟೈ ಬ್ರೇಕರ್‌ ಇರಲಿದೆ. ಮಿಕ್ಸೆಡ್‌ ಟೀಮ್‌ ಡಬಲ್ಸ್‌ಗೂ ಈ ನಿಯಮ ಅನ್ವಯವಾಗಲಿದೆ.