ಡಾ.ರಾಜಕುಮಾರ್‌ ಅವರ ಮೊಮ್ಮಗಳು, ನಟ ರಾಮ್‌ಕುಮಾರ್‌ ಅವರ ಪುತ್ರಿ ಧನ್ಯಾರಾಮ್‌ಕುಮಾರ್‌ ಚಿತ್ರರಂಗಕ್ಕೆ ನಾಯಕಿಯಾಗಿ ಎಂಟ್ರಿಕೊಡುತ್ತಿರುವ ವಿಷಯ ನಿಮಗೆ ಗೊತ್ತೇ ಇದೆ. ಈ ಚಿತ್ರಕ್ಕೆ ಸೂರಜ್‌ ಗೌಡ ಕಥೆ ಬರೆದು, ನಾಯಕರಾಗಿ ನಟಿಸಿದ್ದಾರೆ. ಈಗಾಗಲೇ ಚಿತ್ರದ ಫೋಟೋಶೂಟ್‌ ಕೂಡಾ ನಡೆದಿದೆ. ಎಲ್ಲಾ ಓಕೆ, ಈ ಚಿತ್ರದ ಟೈಟಲ್‌ ಏನು ಎಂಬ ಕುತೂಹಲಕ್ಕೆ ಈಗ ಉತ್ತರ ಸಿಕ್ಕಿದೆ.
ಈ ಚಿತ್ರಕ್ಕೆ “ನಿನ್ನ ಸನಿಹಕೆ’ ಎಂದು ಟೈಟಲ್‌ ಇಡಲಾಗಿದೆ. ಆ ಚಿತ್ರವನ್ನು ಸುಮನ್‌ ಜಾದುಗಾರ್‌ ನಿರ್ದೇಶಿಸುತ್ತಿದ್ದಾರೆ. ಎಲ್ಲವೂ ಅಂದುಕೊಂಡಂತೆ ನಡೆದರೆ “ನಿನ್ನ ಸನಿಹಕೆ’ ಚಿತ್ರಕ್ಕೆ ಆಗಸ್ಟ್‌ನಲ್ಲಿ ಚಾಲನೆ ಸಿಗಲಿದೆ. ಈ ಚಿತ್ರದ ಶುರುವಿಗೆ ಮುನ್ನ ಹೊಸ ಚಿತ್ರ ಒಪ್ಪಿಕೊಂಡ ಬಗ್ಗೆ ಸೂರಜ್‌ಗೌಡ ಹೇಳಿದ್ದಾರೆ. “ಈ ಹಿಂದೆ “ಸಿಲಿಕಾನ್‌ ಸಿಟಿ’ ಚಿತ್ರವನ್ನು ನಿರ್ದೇಶನ ಮಾಡಿದ್ದ ಮುರಳಿ ಗುರಪ್ಪ ಅವರೊಂದಿಗೆ ಮತ್ತೂಂದು ಹೊಸ ಚಿತ್ರದಲ್ಲಿ ನಟಿಸುತ್ತಿದ್ದೇನೆ.
ಸದ್ಯಕ್ಕೆ ಆ ಚಿತ್ರದ ಕುರಿತು ಈಗಷ್ಟೇ ತಯಾರಿ ನಡೆಯುತ್ತಿದೆ. ಇನ್ನು, “ಸಿಲಿಕಾನ್‌ ಸಿಟಿ’ ಚಿತ್ರವನ್ನು ನಿರ್ಮಾಣ ಮಾಡಿದ್ದ ನಿರ್ಮಾಪಕರೇ ಮುರಳಿ ಗುರಪ್ಪ ನಿರ್ದೇಶನದ ಚಿತ್ರವನ್ನು ನಿರ್ಮಾಣ ಮಾಡುವ ಸಾಧ್ಯತೆ ಇದೆ. ಅದೊಂದು ಪಕ್ಕಾ ಸ್ವಮೇಕ್‌ ಕಥೆ ಆಗಿರುತ್ತೆ. ನೈಜ ವಿಷಯವನ್ನು ಇಟ್ಟುಕೊಂಡು ಒಂದು ಕಮರ್ಷಿಯಲ್‌ ಚಿತ್ರದಲ್ಲಿ ಹೇಗೆಲ್ಲಾ ಅದನ್ನು ತೋರಿಸಬಹುದು,
ಎಷ್ಟೆಲ್ಲಾ ಮೇಕಿಂಗ್‌ ಮಾಡಬಹುದು ಎಂಬುದರ ಬಗ್ಗೆ ಪ್ಲಾನ್‌ ನಡೆಯುತ್ತಿದೆ. ಆ ಚಿತ್ರದ ಕುರಿತು ಸದ್ಯಕ್ಕೆ ಇಷ್ಟು ಮಾಹಿತಿ ಇದೆ. ಈಗ ಸುಮನ್‌ ಜಾದುಗಾರ್‌ ನಿರ್ದೇಶನದ ಚಿತ್ರ ಪೂರ್ಣಗೊಳ್ಳುವವರೆಗೂ ಆ ಬಗ್ಗೆ ಹೆಚ್ಚೇನೂ ಸುದ್ದಿಯಿಲ್ಲ. ನಾಯಕಿ ಯಾರು, ತಂತ್ರಜ್ಞರು ಯಾರೆಲ್ಲಾ ಇರುತ್ತಾರೆ ಎಂಬಿತ್ಯಾದಿಗೆ ಈಗ ಉತ್ತರವಿಲ್ಲ ‘ ಎಂದಷ್ಟೇ ಸ್ಪಷ್ಟಪಡಿಸುತ್ತಾರೆ ಸೂರಜ್‌ಗೌಡ.
ಸದ್ಯಕ್ಕೆ ಸೂರಜ್‌ಗೌಡ ಅವರು ಧನ್ಯಾರಾಮ್‌ಕುಮಾರ್‌ ಜೊತೆ ನಟಿಸುತ್ತಿರುವ ಚಿತ್ರದ ಮೇಲೆ ಫೋಕಸ್‌ ಮಾಡಿದ್ದಾರಂತೆ. ಕಾರಣ, ಆ ಚಿತ್ರಕ್ಕೆ ಅವರೇ ಕಥೆ ಬರೆದಿರುವುದು. ಅಷ್ಟೇ ಅಲ್ಲ, ಆ ಸಿನಿಮಾಗೆ ಸಹ ನಿರ್ಮಾಪಕರಾಗಿಯೂ ಕೆಲಸ ಮಾಡುತ್ತಿದ್ದಾರೆ. ಇನ್ನು, ನಿರ್ದೇಶನ ವಿಭಾಗದಲ್ಲೂ ಕೆಲಸ ಮಾಡುತ್ತಿದ್ದಾರಂತೆ. ಹಾಗಾಗಿ, ತುಸು ಜವಾಬ್ದಾರಿ ಜಾಸ್ತಿ ಇರುವುದರಿಂದ, ಈ ಸಿನಿಮಾ ಮುಗಿಸಿದ ಮೇಲೆ ಬೇರೆ ಸಿನಿಮಾದತ್ತ ಗಮನಹರಿಸುವುದಾಗಿ ಹೇಳುತ್ತಾರೆ ಸೂರಜ್‌ಗೌಡ.
