Mangaluru; ಟಿಪ್ಪರ್‌- ಸ್ಕೂಟರ್‌ ಢಿಕ್ಕಿ: ಸಹ ಸವಾರ ವಿದ್ಯಾರ್ಥಿ ಸಾವು

ಮಂಗಳೂರು: ನಗರ ಹೊರವಲಯದ ಅಡ್ಯಾರ್‌ನಲ್ಲಿ ಶನಿವಾರ ಸಂಜೆ ಟಿಪ್ಪರ್‌ ಮತ್ತು ಸ್ಕೂಟರ್‌ ನಡುವೆ ಢಿಕ್ಕಿ ಸಂಭವಿಸಿ ವಿದ್ಯಾರ್ಥಿಯೋರ್ವ ಮೃತಪಟ್ಟರು. ಅಡ್ಯಾರ್‌ಪದವು ನಿವಾಸಿ ಶರಫುದ್ದೀನ್‌ (16) ಮೃತಪಟ್ಟವರು.

ಗೆಳೆಯನೊಂದಿಗೆ ಹಿಂಬದಿ ಸವಾರನಾಗಿ ಸ್ಕೂಟರ್‌ನಲ್ಲಿ ಸಹ್ಯಾದ್ರಿ ಕಾಲೇಜು ಕಡೆಯಿಂದ ಮಂಗಳೂರು ಕಡೆಗೆ ಸಂಚರಿಸುತ್ತಿದ್ದಾಗ ಘಟನೆ ನಡೆದಿದೆ. ಟಿಪ್ಪರ್‌ ಸವಾರ ಎಡಕ್ಕೆ ಚಲಿಸಿದ ಕಾರಣ, ಟಯರ್‌ಗೆ ತಾಗಿ ಸ್ಕೂಟರ್‌ ನೆಲಕ್ಕೆ ಬಿದ್ದಿದೆ. ಈ ವೇಳೆ ಶರಫುದ್ದೀನ್‌ ರಸ್ತೆಗೆಸೆಯಲ್ಪಟ್ಟು ತೀವ್ರವಾಗಿ ಗಾಯಗೊಂಡರು.

ತತ್‌ಕ್ಷಣ ಆಸ್ಪತ್ರೆಗೆ ದಾಖಲಿಸಲಾಯಿತಾದರೂ ಚಿಕಿತ್ಸೆ ಫಲಕಾರಿಯಾಗದೆ ಮೃತಪಟ್ಟರು. ಸ್ಕೂಟರ್‌ ಸವಾರ ಸಣ್ಣಪುಟ್ಟ ಗಾಯಗಳೊಂದಿಗೆ ಪ್ರಾಣಾಪಾಯದಿಂದ ಪಾರಾಗಿದ್ದಾರೆ.