ಸಾಲಬಾಧೆಗೆ ಮೂವರು ರೈತರ ಆತ್ಮಹತ್ಯೆ

ಹುಮನಾಬಾದ/ಬಳ್ಳಾರಿ: ಸಾಲಬಾಧೆ ತಾಳಲಾರದೆ ವಿವಿಧೆಡೆ ಮೂವರು ರೈತರು ಆತ್ಮಹತ್ಯೆಗೆ ಶರಣಾಗಿದ್ದಾರೆ. ಹುಮನಾಬಾದ ತಾಲೂಕಿನ ಹಳ್ಳಿಖೇಡ (ಬಿ) ಪಟ್ಟಣ ಹಾಗೂ ಕನಕಟ್ಟಾ ಗ್ರಾಮದ ಇಬ್ಬರು ರೈತರು ಮಂಗಳವಾರ ಆತ್ಮಹತ್ಯೆಗೆ ಶರಣಾಗಿದ್ದಾರೆ.ಹಳ್ಳಿಖೇಡ (ಬಿ) ಪಟ್ಟಣದ ವಾರ್ಡ್‌ ಸಂಖ್ಯೆ 5ರ ನಿವಾಸಿ ಗುಂಡಪ್ಪ ಕಲ್ಲಪ್ಪ (ರೆಡ್ಡಿ) ಮೂಕಿ (35) ತಮ್ಮ ಹೊಲದಲ್ಲಿ ನೇಣು ಬಿಗಿದುಕೊಂಡು ಆತ್ಮಹತ್ಯೆಗೆ ಶರಣರಾಗಿದ್ದಾರೆ.

ಇನ್ನೊಂದು ಪ್ರಕರಣದಲ್ಲಿ ತಾಲೂಕಿನ ಕನಕಟ್ಟಾ ಗ್ರಾಮದ ರೈತ ಸಂತೋಷ ವಿಶ್ವನಾಥ ಪಾಟೀಲ (35) ಬಾವಿಗೆ ಜಿಗಿದು ಆತ್ಮಹತ್ಯೆಗೆ ಶರಣಾಗಿದ್ದಾರೆ. ಬಳ್ಳಾರಿ ತಾಲೂಕಿನ ಕೊಳಗಲ್ಲು ಗ್ರಾಮದಲ್ಲಿ ಸಿಂಧುವಾಳ ವೀರೇಶ್‌ (30) ಎಂಬುವರು ಮಂಗಳವಾರ ತಮ್ಮ ಜಮೀನಿನಲ್ಲಿ ವಿಷ ಸೇವಿಸಿ ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ.