ಆರ್‌ಸಿಬಿ ಬೆಂಬಲಿಸಲು ಸಾವಿರ ಕಿ.ಮೀ. ಪಯಣ!

ಮುಂಬಯಿ: ದಿನೇಶ್‌ ಕಾರ್ತಿಕ್‌ ಮತ್ತೆ ರಾಯಲ್‌ ಚಾಲೆಂಜರ್ ಬೆಂಗಳೂರು ತಂಡವನ್ನು ರಕ್ಷಿಸಿದ್ದಾರೆ. ಮಧ್ಯಮ ಕ್ರಮಾಂಕದಲ್ಲಿ ಪ್ರದರ್ಶಿಸಿದ ಸ್ಫೋಟಕ ಆಟದಿಂದಾಗಿ ಡೆಲ್ಲಿ ವಿರುದ್ಧ ಆರ್‌ಸಿಬಿ ಗೆಲುವಿನ ನಗು ಹೊಮ್ಮಿಸಿತು. ಕಾರ್ತಿಕ್‌ ಕೇವಲ 34 ಎಸೆತಗಳಿಂದ 66 ರನ್‌ ಸಿಡಿಸಿದರು.

ಇದೇ ವೇಳೆ ದಿನೇಶ್‌ ಕಾರ್ತಿಕ್‌ ಕ್ರೀಡಾಂಗಣದ ಗ್ಯಾಲರಿಯಲ್ಲಿದ್ದ ಆರ್‌ಸಿಬಿ ಅಭಿಮಾನಿಯೊಬ್ಬರು ಹಿಡಿದಿದ್ದ ಬ್ಯಾನರ್‌ಗೆ ಪ್ರತಿಕ್ರಿಯೆ ನೀಡಿ ಗಮನ ಸೆಳೆದಿದ್ದಾರೆ. “ಆರ್‌ಸಿಬಿ ತಂಡವನ್ನು ಬೆಂಬಲಿಸುವ ಉದ್ದೇಶದಿಂದ 1,000 ಕಿ.ಮೀ. ಪ್ರಯಾಣಿಸಿದ್ದೇನೆ ಮತ್ತು ಈ ಸಲ ಕಪ್‌ ನಮ್ಮದೇ’ ಎಂಬ ಬ್ಯಾನರ್‌ ಹಿಡಿದು ಅಭಿಮಾನಿ ಸಂಭ್ರಮಿಸಿದ್ದರು. ಇದು ಸಾಮಾಜಿಕ ಜಾಲತಾಣದಲ್ಲಿ ವೈರಲ್‌ ಆಯಿತು.

ಈ ಬ್ಯಾನರ್‌ ಸಂದೇಶ ಗಮನಿಸಿದ ದಿನೇಶ್‌ ಕಾರ್ತಿಕ್‌ ತನ್ನ ಅಧಿಕೃತ ಟ್ವಿಟರ್‌ನಲ್ಲಿ ಆ ಬ್ಯಾನರನ್ನು ಹಂಚಿಕೊಂಡರಲ್ಲದೇ “ಅಷ್ಟು ದೂರದ ಪ್ರಯಾಣ ಫ‌ಲಪ್ರದವಾಗಲಿ’ ಎಂದು ಪ್ರತಿಕ್ರಿಯೆ ನೀಡಿ ಕ್ರೀಡಾಸ್ಫೂರ್ತಿ ಮೆರೆದರು. ಈ ಬಾರಿಯ ಐಪಿಎಲ್‌ನಲ್ಲಿ ದಿನೇಶ್‌ ಕಾರ್ತಿಕ್‌ ಅವರದು ಕನಸಿನ ಓಟ. 6 ಪಂದ್ಯಗಳಿಂದ ಅವರು 197 ರನ್‌ ಸಿಡಿಸಿದ್ದಾರೆ. ಇದರಲ್ಲಿ ಐದು ಬಾರಿ ಅಜೇಯರಾಗಿ ಉಳಿದಿದ್ದಾರೆ. ಈ ಮೂಲಕ ಮ್ಯಾಚ್‌ ವಿನ್ನರ್‌ ಮತ್ತು ಗ್ರೇಟ್‌ ಫಿನಿಶರ್‌ ಆಗಿ ಗಮನ ಸೆಳೆದಿದ್ದಾರೆ.

ಆರ್‌ಸಿಬಿ ತನ್ನ ಮುಂದಿನ ಪಂದ್ಯವನ್ನು ಎ. 19ರಂದು ಲಕ್ನೋ ವಿರುದ್ಧ ಆಡಲಿದೆ. ಇಲ್ಲಿಯೂ ಕಾರ್ತಿಕ್‌ ಅವರಿಂದ ಅಮೋಘ ಆಟವನ್ನು ನಿರೀಕ್ಷಿಸಲಾಗಿದೆ.