ಹೈದರಾಬಾದ್: ಪ್ಯಾನ್‌ ಇಂಡಿಯಾ ಸ್ಟಾರ್‌ ಪ್ರಭಾಸ್ ʼಸಲಾರ್‌ʼ ಸಿನಿಮಾ ಹಿಟ್‌ ಬಳಿಕ ಮತ್ತೆ ಗೆಲುವಿನ ಹಳಿಗೇರಿದ್ದಾರೆ. ಇದೀಗ ಅವರು ಮುಂದಿನ ಸಿನಿಮಾದಲ್ಲಿ ಬ್ಯುಸಿಯಾಗಿದ್ದಾರೆ.
ಪ್ರಭಾಸ್ ಅವರ ಸಿನಿ ಕೆರಿಯರ್‌ ಉತ್ತುಂಗಕ್ಕೇರಿದಂತೆ ಅವರ ಲವ್ ಲೈಫ್‌ ಬಗ್ಗೆಯೂ ಅನೇಕ ಬಾರಿ ಸಿನಿವಲಯದಲ್ಲಿ ಸುದ್ದಿಗಳು ಹರಿದಾಡಿದೆ. ಸ್ಟಾರ್‌ ನಟಿಯರೊಂದಿಗೆ ಅವರು ಡೇಟ್ ಮಾಡಿದ್ದಾರೆ ಎನ್ನುವ ಗಾಸಿಪ್‌ ಗಳು ಟಾಲಿವುಡ್‌ ನಲ್ಲಿ ಹರಿದಾಡಿತ್ತು.
ಪ್ರಭಾಸ್ ಅವರನ್ನು ಪ್ಯಾನ್‌ ಇಂಡಿಯಾ ಸ್ಟಾರ್‌ ಆಗಿ ಮಾಡಿದ್ದು ರಾಜಮೌಳಿ ಅವರ ʼಬಾಹುಬಲಿʼ ಸಿನಿಮಾವೆಂದರೆ ತಪ್ಪಾಗದು. ಈ ಸಿನಿಮಾದ ಬಳಿಕ ಪ್ರಭಾಸ್ ಅವರ ಜನಪ್ರಿಯತೆ ಮತ್ತಷ್ಟು ಹೆಚ್ಚಾಯಿತು. ಅನೇಕ ಯುವತಿಯರು ಪ್ರಭಾಸ್ ಅವರ ಅಭಿಮಾನಿಯಾಗಿ ಅವರನ್ನು ಇಷ್ಟಪಡಲು ಶುರು ಮಾಡಿದ್ದರು.
“ಬಾಹುಬಲಿ ಸಿನಿಮಾದ ಬಳಿಕ ನನಗೆ 5000 ಮದುವೆ ಪ್ರಸ್ತಾಪಗಳು ಬಂದಿದ್ದವು. ಈ ವೇಳೆ ನಾನು ಬಹಳ ಗೊಂದಲಕ್ಕೆ ಒಳಗಾಗಿದ್ದೆ. ನನ್ನ ತಾಯಿ ಬಯಸಿದಂತೆ ನಾನು ಖಂಡಿತವಾಗಿಯೂ ಮದುವೆಯಾಗುತ್ತೇನೆ. ಖಂಡಿತಾ ಲವ್ ಮ್ಯಾರೇಜ್ ಆಗುತ್ತೇನೆ” ಎಂದು ಪ್ರಭಾಸ್ ʼರಾಧೆ ಶ್ಯಾಮ್ʼ ಸಿನಿಮಾದ ಪ್ರಚಾರದ ವೇಳೆ ಹೇಳಿಕೊಂಡಿದ್ದರು.
ಪ್ರಭಾಸ್ ಅನುಷ್ಕಾ ಶೆಟ್ಟಿ ಜೊತೆ ʼಬಾಹುಬಲಿʼ ಬಳಿಕ ಡೇಟಿಂಗ್‌ ನಲ್ಲಿದ್ದರು ಎನ್ನಲಾಗಿತ್ತು. ಇದಾದ ಬಳಿಕ ʼಆದಿಪುರುಷ್‌ʼ ಸಿನಿಮಾದ ವೇಳೆ ನಟಿ ಕೃತಿ ಸನೋನ್ ಜೊತೆ ರಿಲೇಷನ್‌ ಶಿಪ್‌ ನಲ್ಲಿದ್ದರು ಎನ್ನಲಾಗಿತ್ತು. ಆದರೆ ಇದು ಗಾಸಿಪ್‌ ಗಷ್ಟೇ ಸೀಮಿತವಾಗಿತ್ತು.
ಪ್ರಭಾಸ್ ಮುಂದೆ ನಾಗ್ ಅಶ್ವಿನ್ ಅವರ ʼಕಲ್ಕಿ 2898 ADʼ ಕಾಣಿಸಿಕೊಳ್ಳಲಿದ್ದಾರೆ. ಈ ಚಿತ್ರದಲ್ಲಿ ಅಮಿತಾಬ್ ಬಚ್ಚನ್, ಕಮಲ್ ಹಾಸನ್, ದೀಪಿಕಾ ಪಡುಕೋಣೆ ಮತ್ತು ದಿಶಾ ಪಟಾನಿ ಕೂಡ ನಟಿಸಿದ್ದಾರೆ.
