ಬೆದರಿಕೆಗೆ ಜಗ್ಗಲ್ಲ: ಶ್ರೀರಾಮುಲು

ಬೆಂಗಳೂರು: “ತಿಪ್ಪೇಸ್ವಾಮಿ ಅವರ ಜತೆ ಮಾತನಾಡುವ ಅಗತ್ಯವಿಲ್ಲ.ತಿಪ್ಪೇಸ್ವಾಮಿಯವರ ಶಕ್ತಿ ಏನೆಂದು ಗೊತ್ತಿದೆ’ ಎಂದು ಸಂಸದ ಶ್ರೀರಾಮುಲು ತಿರುಗೇಟು ನೀಡಿದ್ದಾರೆ.

ಅಷ್ಟೇ ಅಲ್ಲದೆ, “ನಾನು ಸೌಮ್ಯ ಸ್ವಭಾವದ ಶ್ರೀರಾಮುಲು ಅಲ್ಲ, ಹಠವಾದಿ. ಎಂತಹ ಬೆದರಿಕೆಗೂ ಜಗ್ಗುವುದಿಲ್ಲ. ಬೆನ್ನು ತಿರುಗಿಸಿ ಹೋಗುವುದಿಲ್ಲ’ ಎಂದು ಹೇಳಿದ್ದಾರೆ.

ನಾಯಕನಹಟ್ಟಿ ಘಟನೆ ಬಗ್ಗೆ ಸುದ್ದಿಗಾರರ ಜತೆ ಮಾತನಾಡಿದ ಅವರು, “ಬಿಜೆಪಿ ನಾಯಕರು ಲೆಕ್ಕಾಚಾರ ಮಾಡಿಯೇ ನನಗೆ ಮೊಳಕಾಲ್ಮೂರು ಕ್ಷೇತ್ರದಿಂದ ಟಿಕೆಟ್‌ ನೀಡಿದ್ದಾರೆ. ಪಕ್ಷದ ಆದೇಶ ಪಾಲಿಸುವುದು ನನ್ನ ಕರ್ತವ್ಯ. ನಾನು ಮೊಳಕಾಲ್ಮೂರು ಕ್ಷೇತ್ರದಿಂದಲೇ ಸ್ಪರ್ಧೆ ಮಾಡ್ತೇನೆ. ಅಲ್ಲಿನ ಜನ ನನ್ನ ಕೈ ಬಿಡುವುದಿಲ್ಲ ಎಂಬ ವಿಶ್ವಾಸವಿದೆ’ ಎಂದು ಹೇಳಿದರು.

ಕ್ಷೇತ್ರದಲ್ಲಿ ಯಾರಿಗೆ ಎಷ್ಟು ಬೆಂಬಲ ಎಂಬುದು ಗೊತ್ತಾಗಲಿದೆ. ಕೆಲವು ಹೊರಗಿನ ಶಕ್ತಿಗಳು ಗದ್ದಲ ಎಬ್ಬಿಸುವ ತಂತ್ರ ಮಾಡುತ್ತಿವೆ. ಇದನ್ನೆಲ್ಲಾ ಸಾಕಷ್ಟು ನೋಡಿದ್ದೇನೆ ಎಂದು ತಿಳಿಸಿದರು.