ಅನಿಶ್ಚಿತತೆಯಲ್ಲಿ ಏಷ್ಯಾ ಕಪ್‌: ಪಿಸಿಬಿ ಅಧ್ಯಕ್ಷ ಎಹಸಾನ್‌ ಮಣಿ

ಕರಾಚಿ: “15ನೇ ಆವೃತ್ತಿ ಏಷ್ಯಾಕಪ್‌ ಟಿ20 ಕೂಟ ನಡೆಯುವುದರ ಬಗ್ಗೆ ಇನ್ನೂ ಅಧಿಕೃತವಾಗಿ ಏನೂ ನಿರ್ಧಾರವಾಗಿಲ್ಲ, ಅದು ಇನ್ನೂ ಅನಿಶ್ಚಿತತೆಯಲ್ಲಿಯೇ ಇದೆ’ ಎಂದು ಪಾಕಿಸ್ಥಾನ ಕ್ರಿಕೆಟ್‌ ಮಂಡಳಿ ಅಧ್ಯಕ್ಷ ಎಹಸಾನ್‌ ಮಣಿ ಸ್ಪಷ್ಟಪಡಿಸಿದ್ದಾರೆ.

ಮಾಧ್ಯಮದೊಂದಿಗೆ ಮಾತನಾಡಿರುವ ಅವರು, “ಇನ್ನೂ ಯಾವುದೂ ನಿರ್ಧಾರವಾಗಿಲ್ಲ, ಸಪ್ಟೆಂಬರ್‌ ಹೊತ್ತಿಗೆ ಏನಾಗುತ್ತದೆ ಎನ್ನುವುದು ಯಾರಿಗೂ ಗೊತ್ತಿಲ್ಲ. ಕೊರೊನಾದಿಂದಾಗಿ ಇಡೀ ವಿಶ್ವವೇ ಆತಂಕಕ್ಕೆ ಒಳಗಾಗಿದೆ, ನನ್ನ ಹೇಳಿಕೆಯನ್ನು ತಪ್ಪಾಗಿ ತಿಳಿದುಕೊಳ್ಳಬೇಡಿ, ಎಲ್ಲವೂ ಅಂದಿನ ಪರಿಸ್ಥಿತಿಯಿಂದ ನಿರ್ಧಾರವಾಗುತ್ತದೆ’ಎಂದರು. ಸದ್ಯ ಏಷ್ಯಾ ಕಪ್‌ ಟಿ20 ಆತಿಥ್ಯವನ್ನು ಪಾಕ್‌ ವಹಿಸಿಕೊಂಡಿದೆ, ಆದರೆ ಪಾಕ್‌ನಲ್ಲಿ ಕೂಟ ನಡೆಸುವುದರ ಬಗ್ಗೆ ಭಾರತ ಅಸಮಾಧಾನ ಹೊರಹಾಕಿದೆ. ತಟಸ್ಥ ತಾಣಕ್ಕೆ ಕೂಟವನ್ನು ವರ್ಗಾಯಿಸಬೇಕೆಂದು ಬಿಸಿಸಿಐ, ಏಷ್ಯನ್‌ ಕ್ರಿಕೆಟ್‌ ಕೌನ್ಸಿಲ್‌ಗೆ ಒತ್ತಾಯಿಸಿದೆ.