ಬೀಜಿಂಗ್‌ನಲ್ಲಿ ತಲೆ ಎತ್ತಿದೆ ಜಗತ್ತಿನ ಅತೀ ದೊಡ್ಡ ಏರ್‌ಪೋರ್ಟ್‌

ಬೀಜಿಂಗ್‌: ಐದು ವರ್ಷಗಳ ಹಿಂದೆ ಡಾಕ್ಸಿಂಗ್‌ ಏರಿಯಾ ಒಂದು ಧೂಳು ತುಂಬಿದ ಪ್ರದೇಶವಾಗಿತ್ತು. ಆದರೆ ಈಗ ಇಲ್ಲೊಂದು ಅದ್ಭುತ, ಅತೀ ದೊಡ್ಡ ವಿಮಾನ ನಿಲ್ದಾಣ ರೂಪು ತಳೆದಿದೆ.

ಸದ್ಯ ಜಗತ್ತಿನಲ್ಲೇ ಇಂತಹ ವಿಮಾನ ನಿಲ್ದಾಣ ಇಲ್ಲ ಎಂದು ಹೇಳಲಾಗಿದೆ. ಅಮೆರಿಕ ಜಗತ್ತಿನಲ್ಲೇ ಅತಿ ದೊಡ್ಡ ವೈಮಾನಿಕ ಮಾರುಕಟ್ಟೆಯಾಗಿದ್ದು, ಅದಕ್ಕೆ ಸಡ್ಡು ಹೊಡೆಯುವಂತೆ ಬೀಜಿಂಗ್‌ನ ಈ ವಿಮಾನ ನಿಲ್ದಾಣ ನಿರ್ಮಾಣವಾಗಿದೆ.

ಹೇಗಿದೆ ನಿಲ್ದಾಣ ?
173 ಎಕರೆಯಲ್ಲಿ ಬೀಜಿಂಗ್‌ ಡಾಕ್ಸಿಂಗ್‌ ಅಂ.ರಾ. ವಿಮಾನ ನಿಲ್ದಾಣ ನಿರ್ಮಾಣವಾಗಿದ್ದು, ಬರೋಬ್ಬರಿ 80,460 ಕೋಟಿ ರೂ. ವೆಚ್ಚದಲ್ಲಿ ನಿರ್ಮಾಣವಾಗಿದೆ. ಇದರ ಗಾತ್ರ ಸುಮಾರು 100 ಫ‌ುಟ್ಬಾಲ್‌ ಕ್ರೀಡಾಂಗಣಕ್ಕೆ ಸಮವಾಗಿದೆ. ಸ್ಟಾರ್‌ಫಿಶ್‌ ಮಾದರಿಯಲ್ಲಿ ವಾಸ್ತು ಹೊಂದಿದೆ. ಇದನ್ನು ಇರಾಕ್‌-ಬ್ರಿಟಿಷ್‌ ವಾಸ್ತುಶಿಲ್ಪಿ ಝಹಾ ಹದೀದ್‌ ಅವರು ವಿನ್ಯಾಸ ಮಾಡಿದ್ದಾರೆ. ವಿಮಾನ ನಿಲ್ದಾಣದ ಕೆಳಭಾಗದಲ್ಲಿ ರೈಲು ನಿಲ್ದಾಣವಿದ್ದು, ಬೀಜಿಂಗ್‌ ನಗರವನ್ನು ಕೇವಲ 20 ನಿಮಿಷಲ್ಲಿ ತಲುಪಬಹುದು. ಕೇವಲ ನಾಲ್ಕೇ ವರ್ಷದಲ್ಲಿ ಈ ನಿಲ್ದಾಣ ನಿರ್ಮಾಣವಾಗಿದೆ. 2014 ಡಿ.26ರಂದು ಇದರ ಕೆಲಸ ಶುರುವಾಗಿತ್ತು.

ಭವಿಷ್ಯದ ವಿಮಾನ ನಿಲ್ದಾಣ
2050 ವರ್ಷವನ್ನು ಗಮನದಲ್ಲಿಟ್ಟುಕೊಂಡು, ಆ ವೇಳೆಗೆ ಇರಬಹುದಾದ ಪ್ರಯಾಣಿಕರ ದಟ್ಟಣೆ ಪರಿಗಣಿಸಿ ಈ ವಿಮಾನ ನಿಲ್ದಾಣ ನಿರ್ಮಾಣವಾಗಿದೆ. ಇದರಲ್ಲಿ ದೇಶೀಯ ಮತ್ತು ಅಂ.ರಾ. ವಿಮಾನ ನಿಲ್ದಾಣವಿದ್ದು, ಪ್ರತಿ ವರ್ಷ 1 ಟರ್ಮಿನಲ್‌ನಲ್ಲಿ 10 ಕೋಟಿ ಪ್ರಯಾಣಿಕರನ್ನು ನಿರ್ವಹಿಸುವ ಸಾಮರ್ಥ್ಯ ಹೊಂದಿದೆ.

ಸದ್ಯ ನಾಲ್ಕು ರನ್‌ವೇಗಳನ್ನು ಇದು ಹೊಂದಿದ್ದು, 7 ರನ್‌ವೇಗಳು ಮುಂದೆ ಕಾರ್ಯ ನಿರ್ವಹಿಸಲಿವೆ. ಜತೆಗೆ 1 ಹೆಚ್ಚುವರಿ ರನ್‌ವೇ ಮಿಲಿಟರಿ ಬಳಕೆಗೆ ಸೀಮಿತವಾಗಿರಲಿದೆ. 2025ರವೇಳೆಗೆ 7.2 ಕೋಟಿ ಮಂದಿ ಪ್ರಯಾಣಿಕರು, 20 ಲಕ್ಷ ಕಾರ್ಗೋ, 6.20 ಲಕ್ಷ ವಿಮಾನಗಳ ನಿರ್ವಹಣೆಯ ಗುರಿಯನ್ನು ಹೊಂದಿದೆ.

ಸದ್ಯ ಅಮೆರಿಕದ ಅಟ್ಲಾಂಟಾ ಮತ್ತು ಬೀಜಿಂಗ್‌ನ ಈಗಿನ ವಿಮಾನ ನಿಲ್ದಾಣಗಳು ಜಗತ್ತಿನಲ್ಲೇ ಅತಿ ನಿಬಿಡ ವಿಮಾನ ನಿಲ್ದಾಣಗಳಾಗಿದ್ದು ವಾರ್ಷಿಕ 10 ಕೋಟಿ ಪ್ರಯಾಣಿಕರ ನಿರ್ವಹಣೆ ಮಾಡುತ್ತಿದೆ.