ಹೊಸದಿಲ್ಲಿ: ಪಾಕಿಸ್ಥಾನದ ಕರಾಚಿಯಿಂದ ಹೊರಟಿದ್ದ ಸರಕು ಸಾಗಣೆ ವಿಮಾನವೊಂದು ಭಾರತದ ವಾಯುನೆಲೆಗೆ ಪ್ರವೇಶಿಸಿದ್ದು ಕೆಲ ಕಾಲ ಆತಂಕ ಮೂಡಿಸಿತ್ತು. ಆರಂಭದಲ್ಲಿ ಭಾರತೀಯ ಏರ್‌ ಟ್ರಾಫಿಕ್‌ ಕಂಟ್ರೋಲ್ ಸಂಕೇತಗಳನ್ನು ನಿರ್ಲಕ್ಷಿಸಿದ್ದು ಇನ್ನಷ್ಟು ಗೊಂದಲ ಮೂಡಿಸಿತು. ಹೀಗಾಗಿ ಎರಡು ವಾಯುಪಡೆ ವಿಮಾನಗಳನ್ನು ಕಳುಹಿಸಿ ಬಲವಂತವಾಗಿ ಜೈಪುರದಲ್ಲಿ ಈ ವಿಮಾನವನ್ನು ಇಳಿಸಲಾಗಿದೆ. ಜಾರ್ಜಿಯಾದ ಬಿಲಿಸಿಯಿಂದ ಹೊರಟಿದ್ದ ಈ ವಿಮಾನ ಅಗತ್ಯ ಎಲ್ಲ ಅನುಮತಿಗಳನ್ನೂ ಹೊಂದಿತ್ತು. ಆದರೆ ಪಾಕಿಸ್ಥಾನದಲ್ಲಿ ಲ್ಯಾಂಡ್‌ ಆಗಿ ಹೊರಟಿದ್ದ ವಿಮಾನ ಭಾರತೀಯ ವಾಯುಗಡಿಯೊಳಕ್ಕೆ ಬಂದರೂ ಭಾರತದ ಎಟಿಎಸ್‌ಗೆ ಸೂಕ್ತ ಮಾಹಿತಿ ನೀಡದೇ ಇದ್ದುದು ಕೆಲಕಾಲ ಗೊಂದಲಕ್ಕೆ ಕಾರಣವಾಗಿತ್ತು. ಅಲ್ಲದೆ ಉತ್ತರ ಗುಜರಾತ್‌ ಹಾಗೂ ಪಾಕ್‌ ಗಡಿ ಭಾಗದಲ್ಲಿನ ವಾಯು ಮಾರ್ಗಗಳನ್ನು ಬಂದ್‌ ಮಾಡಲಾಗಿದ್ದು, ಇದನ್ನು ಉಲ್ಲಂಘಿಸಿ ಈ ಪ್ರದೇಶಕ್ಕೆ ವಿಮಾನ ಆಗಮಿಸಿತ್ತು.
