ಟೆಕ್ಸಾಸ್‌ನ ಕಥೆ : ಸಾವಿನಲ್ಲೂ ಒಂದಾದ ದಂಪತಿ

ಟೆಕ್ಸಾಸ್‌ : ಕೋವಿಡ್‌-19 ನಿಂದಾಗಿ ಅಮೆರಿಕದ ಟೆಕ್ಸಾಸ್‌ ರಾಜ್ಯದಲ್ಲಿ ಈ ಮನ ಕಲುಕುವ ಘಟನೆ ನಡೆದಿದ್ದು ,  53 ವರ್ಷಗಳ ಕಾಲ ಒಟ್ಟಿಗೆ ಬಾಳಿ ಬದುಕಿದ್ದ ವೃದ್ಧ ದಂಪತಿ ಸಾವಿನಲ್ಲೂ ಒಂದಾಗಿದ್ದಾರೆ.

ಟೆಕ್ಸಾಸ್‌ನ ಬೆಟ್ಟಿ ಟಾರ್ಪ್‌ಲೆ (80) ಮತ್ತು ಕರ್ಟಿಸ್‌ ಟಾರ್ಪ್‌ಲೆ (79) ಬಾಲ್ಯದ ಗೆಳತಿ – ಗೆಳೆಯರು. ಇಲಿನಾಯ್ಸ್ ನ ಹೈಸ್ಕೂಲ್‌ವೊಂದರಲ್ಲಿ ಪರಿಚಯವಾಗಿದ್ದ ಇವರು ಮುಂದೆ ಕ್ಯಾಲಿಫೋರ್ನಿಯಾದಲ್ಲಿ ಓದುತ್ತಿರುವಾಗ ಪ್ರೇಮಿಸಿ ವಿವಾಹವಾಗಿದ್ದರು. ಬಳಿಕ 53 ವರ್ಷಗಳ ಕಾಲ ಪ್ರಣಯದ ಹಕ್ಕಿಗಳಂತೆ ಜೀವನ ಸಾಗಿಸಿದ್ದರು. ಆದರೆ ಕೋವಿಡ್‌ ಇವರ ಪ್ರೇಮಕ್ಕೆ ಕೊಳ್ಳಿ ಇಟ್ಟಿದೆ. ಕಳೆದ ತಿಂಗಳು ಜೂನ್‌ 9 ರಂದು ಬೆಟ್ಟಿ ಟಾರ್ಪ್‌ಲೆ ಅನಾರೋಗ್ಯದಿಂದಾಗಿ ಆಸ್ಪತ್ರೆಗೆ ದಾಖಲಾಗಿದ್ದರು. ಎರಡು ದಿನದ ಬಳಿಕ ಕರ್ಟಿಸ್‌ ಟಾರ್ಪ್‌ಲೆ ಆಸ್ಪತ್ರೆಗೆ ದಾಖಲಾಗಿದ್ದರು. ಇಬ್ಬರಿಗೂ ಕೋವಿಡ್‌ ಇರುವುದು ದೃಢಪಟ್ಟಿತ್ತು.

ಜೂನ್‌18 ರಂದು ಇವರಿಬ್ಬರ ಸ್ಥಿತಿ ಚಿಂತಾಜನಕವಾಗಿದ್ದು, ಆಸ್ಪತ್ರೆ ಸಿಬ್ಬಂದಿ ಸಹಾಯದಿಂದ ಇವರಿಬ್ಬರು ಬದುಕಿನ ಕೊನೆ ಕ್ಷಣದ ಅನುಭವಗಳನ್ನು ಆನಂದಿಸಿದ್ದರು. ಸಾವಿಗೂ ಒಂದು ಗಂಟೆಯ ಅಂತರದಲ್ಲಿ ಒಬ್ಬರಿಗೊಬ್ಬರು ಕೈಹಿಡಿದು ತಮ್ಮ ಪ್ರೀತಿಯನ್ನು ಹಂಚಿಕೊಂಡಿದ್ದರು. ಅದಾದ ಬಳಿಕ ಇಬ್ಬರ ಪ್ರಾಣ ಪಕ್ಷಿ ಹಾರಿಹೋಗಿದೆ. ನಮಗೆ ಯಾವುದೇ ರೀತಿಯ ತೊಂದರೆ ನೀಡದೆ ಸುಖವಾಗಿ ಬೆಳೆಸಿದ್ದಾರೆ ಎಂದು ಬೆಟ್ಟಿ ಮತ್ತು ಕರ್ಟಿಸ್‌​ ಟಾರ್ಪ್‌ಲೆ ಪುತ್ರ ಹೇಳಿದ್ದಾರೆ.