“ಎನ್ನ’ಕಥೆ ನನ ಸುರು!

ವಿಶ್ವನಾಥ್‌ ಕೋಡಿಕಲ್‌ ನಿರ್ದೇಶನದಲ್ಲಿ ಸಿದ್ಧವಾಗಿರುವ ಸಿನೆಮಾ “ಎನ್ನ’. ತುಳು ಚಿತ್ರರಂಗದಲ್ಲಿ ವಿವಿಧ ಚಟುವಟಿಕೆಗಳಲ್ಲಿ ತೊಡಗಿಸಿಕೊಂಡಿರುವ ಕೋಡಿಕಲ್‌ ಕೆಲವೊಂದು ಸಿನೆಮಾಗಳಿಗೆ ಸಹ ನಿರ್ದೇಶಕರಾಗಿ, ಸ್ಟಿಲ್‌ ಫೋಟೋಗ್ರಾಫರ್‌ ಆಗಿ ದುಡಿದಿದ್ದಾರೆ. ಇದೀಗ ಮೊದಲ ಬಾರಿಗೆ ಸಿನೆಮಾ ನಿರ್ದೇಶನ ಮಾಡಿದ್ದಾರೆ.

ತುಳು ಚಿತ್ರರಂಗದಲ್ಲೇ ಪ್ರಥಮ ಬಾರಿಗೆ ಈ ಸಿನೆಮಾಕ್ಕೆ ಮಹಿಳೆಯೊಬ್ಬರು ಛಾಯಾಗ್ರಹಣ ಮಾಡಿದ್ದಾರೆ. ಬಹುತೇಕ ಕಲಾವಿದರು-ತಂತ್ರಜ್ಞರು ಹೊಸಬರು. “ಎನ್ನ’ ಸಿನೆಮಾ ಈಗಾಗಲೇ ತನ್ನ ಎಲ್ಲ ಕೆಲಸಗಳನ್ನು ಪೂರ್ಣಗೊಳಿಸಿ ಸೆನ್ಸರ್‌ ಅಂಗಳದತ್ತ ಹೆಜ್ಜೆ ಇಟ್ಟಿದೆ. ಚಿತ್ರತಂಡ ಪ್ರಚಾರದ ಕೆಲಸವನ್ನ ಪ್ರಾರಂಭಿಸಿದ್ದು ಸಿನೆಮಾದಲ್ಲಿ ಅಭಿನಯಿಸಿದ ಕಲಾವಿದರ ಫೋಟೋದೊಂದಿಗೆ ಉತ್ತಮ ಸಂದೇಶವನ್ನು ಲಗತ್ತಿಸಿ ಸೋಶಿಯಲ್‌ ಮೀಡಿಯಾಗಳಲ್ಲಿ ಹರಿಯಬಿಟ್ಟಿವೆ. ಟೀಸರ್‌ಗೆ ಜನರಿಂದ ಉತ್ತಮ ಪ್ರತಿಕ್ರಿಯೆ ಲಭಿಸಿದ್ದು ಆಗಸ್ಟ್‌ ತಿಂಗಳಲ್ಲಿ ಸಿನೆಮಾದ ಟ್ರೈಲರ್‌ ಬಿಡುಗಡೆಯಾಗಲಿದೆ. ಒಟ್ಟಿನಲ್ಲಿ ಹೊಸಬರು ಸೇರಿಕೊಂಡು ಹೊಸದೊಂದು ಪ್ರಯತ್ನಕ್ಕೆ ಇಳಿದಿದ್ದಾರೆ ಎಂಬುದು ಕೋಸ್ಟಲ್‌ವುಡ್‌ನ‌ ವಿಶೇಷ.

“ಎನ್ನ’ ಸಿನೆಮಾಕ್ಕೆ ಕ್ಯಾನುಟ್‌ ಮಥಾಯಸ್‌ ನಿರ್ಮಾಪಕರಾಗಿದ್ದು, ಕಾರ್ಯಕಾರಿ ನಿರ್ದೇಶಕ – ನಿರ್ಮಾಪಕರಾಗಿ ಮ್ಯಾಕ್ಸಿಮ್‌ ಪಿರೇರಾ ಅಂಜೆಲೋರ್‌ ದುಡಿದಿದ್ದಾರೆ. ವೈಶಾಲಿ ಎಸ್‌. ಉಡುಪಿ ಛಾಯಾಗ್ರಹಣ ಮಾಡಿದ್ದು, ಪ್ರಶಾಂತ್‌ ಸಿ.ಕೆ, ವಿಶ್ವನಾಥ್‌ ಕೋಡಿಕಲ್‌ ಸಂಭಾಷಣೆಯೊಂದಿಗೆ ಅನುಶ್‌ ಚಂದ್ರ ಸಂಕಲನ ಮಾಡಿದ್ದಾರೆ. ಲೋಯ್‌ ವ್ಯಾಲೆಂಟೈನ್‌ ಸಲ್ಡಾನಾ‚ ಸಂಗೀತ ನಿರ್ದೇಶನ ಮಾಡಿದ್ದಾರೆ. ವಿನೀತ್‌ ಕುಮಾರ್‌, ಪೃಥ್ವಿ ಅಂಬರ್‌ ನಾಯಕರಾಗಿ ಶೃತಿ ಪೂಜಾರಿ ನಾಯಕಿ ಯಾಗಿದ್ದಾರೆ. ಆಗಸ್ಟ್‌ನಲ್ಲಿ ಸಿನೆಮಾ ರಿಲೀಸ್‌ ಆಗುವ ನಿರೀಕ್ಷೆಯಿದೆ.