ಕೊಲೆಗೈದು ಗೋಣಿ ಚೀಲದಲ್ಲಿ ತುಂಬಿಸಿ ಶೌಚಾಲಯದ ಹೊಂಡಕ್ಕೆ ಎಸೆದರು !

ಕಾಸರಗೋಡು: ವ್ಯಕ್ತಿಯೋರ್ವನನ್ನು ಕೊಲೆಗೈದು ಗೋಣಿ ಚೀಲದಲ್ಲಿ ತುಂಬಿಸಿ ಶೌಚಾಲಯದ ಹೊಂಡಕ್ಕೆ ಹಾಕಿದ ಘಟನೆ ಬದಿಯಡ್ಕ ಪೊಲೀಸ್‌ ಠಾಣಾ ವ್ಯಾಪ್ತಿಯ ಸೀತಂಗೋಳಿ ಚೌಕಾಡ್‌ ಪಿರಿಪ್ಪಳ್ಳದಲ್ಲಿ ಶನಿವಾರ ಸಂಜೆ ನಡೆದಿದೆ. ಪಿರಿಪ್ಪಳ್ಳ ನಿವಾಸಿ ಥೋಮಸ್‌ ಕ್ರಾಸ್ತಾ (63) ಅವರನ್ನು ಕೊಲೆಗೈದು ನೆರೆಮನೆಯ ಹಿತ್ತಿಲಿನ ಶೌಚಾಲಯದ ಹೊಂಡಕ್ಕೆ ಹಾಕಲಾಗಿದೆ.

ಕಳೆದ ಎರಡು ದಿನಗಳಿಂದ ಥೋಮಸ್‌ ಕ್ರಾಸ್ತಾ ಅವರು ಕಾಣೆಯಾಗಿದ್ದರು. ಇದರಿಂದ ಊರವರು ಹುಡುಕಾಟ ನಡೆಸಿದಾಗ ಮೃತದೇಹ ಶೌಚಾಲಯದಲ್ಲಿ ಪತ್ತೆಯಾಯಿತು. ಘಟನ ಸ್ಥಳಕ್ಕೆ ಬದಿಯಡ್ಕ ಠಾಣೆಯ ಎಸ್‌.ಐ. ಕೆ.ಪಿ. ವಿನೋದ್‌ಕುಮಾರ್‌ ನೇತೃತ್ವದ ತಂಡ ಆಗಮಿಸಿ ತಪಾಸಣೆ ನಡೆಸಿದರು. ಉನ್ನತ ಪೊಲೀಸ್‌ ಅ ಧಿಕಾರಿಗಳು, ಶ್ವಾನದಳ, ಬೆರಳಚ್ಚು ತಜ್ಞರು ಸ್ಥಳಕ್ಕಾಗಮಿಸಿದ್ದಾರೆ.

ಕೊಲೆ ನಡೆಸಿರುವುದು ಯಾರು ಎಂಬ ಬಗ್ಗೆ ಮಾಹಿತಿ ಲಭಿಸಿಲ್ಲ. ಸಮಗ್ರ ತನಿಖೆ ನಡೆಸಲಾಗುವುದು ಎಂದು ಎಸ್‌.ಐ. ವಿನೋದ್‌ಕುಮಾರ್‌ ತಿಳಿಸಿದ್ದಾರೆ.