ಇಂದಿರಾ ಕ್ಯಾಂಟೀನ್‌ ಸಮವಸ್ತ್ರ ಸಂಪೂರ್ಣ ಹಸಿರು

ಬೆಂಗಳೂರು: ಸರ್ಕಾರದ ಮಹತ್ವಾಕಾಂಕ್ಷಿ ಯೋಜನೆ “ಇಂದಿರಾ ಕ್ಯಾಂಟೀನ್‌’ಗೆ ಭರದ ಸಿದ್ಧತೆಗಳು ನಡೆದಿದ್ದು, ಬಿಬಿಎಂಪಿ ಶುಕ್ರವಾರ ಕ್ಯಾಂಟೀನ್‌ನಲ್ಲಿ ಕಾರ್ಯನಿರ್ವಹಿಸುವ ಸಿಬ್ಬಂದಿಯ ಸಮವಸ್ತ್ರವನ್ನು ಬಿಡುಗಡೆ ಮಾಡಿದೆ. 

ಇಂದಿರಾ ಕ್ಯಾಂಟೀನ್‌ನಲ್ಲಿ ಕಾರ್ಯನಿರ್ವಹಿಸುವ ಸಿಬ್ಬಂದಿಯ ಸಮವಸ್ತ್ರ ಹಸಿರಿನಿಂದ ಕೂಡಿರಲಿದೆ. ಹಸಿರು ಟೋಪಿ ಮತ್ತು ಗೌನು ಇರಲಿದೆ. ಗೌನು ಎದೆಯ ಭಾಗದಲ್ಲಿ ತರಕಾರಿಗಳಿಂದ ಕೂಡಿದ ಚಿತ್ರ ಹಾಗೂ ಅದರ ಮೇಲೆ ಇಂದಿರಾ ಕ್ಯಾಂಟೀನ್‌ ಎಂದು ಮುದ್ರಿಸಲಾಗಿದೆ. ಅದೇ ರೀತಿ, ಟೋಪಿಯಲ್ಲಿ ಇಂಗ್ಲಿಷ್‌ನಲ್ಲಿ ಇಂದಿರಾ ಕ್ಯಾಂಟೀನ್‌ ಎಂದು ಮುದ್ರಿಸಲಾಗಿದೆ. 

ಈಗಾಗಲೇ ಬಿಡುಗಡೆಗೊಂಡ ಇಂದಿರಾ ಕ್ಯಾಂಟೀನ್‌ “ಲೋಗೊ’ (ಚಿಹ್ನೆ) ಕೂಡ ಹಸಿರನ್ನು ಪ್ರತಿನಿಧಿಸುತ್ತಿದೆ. ಎರಡು ಬಾಳೆ ಎಲೆಗಳ ಮಧ್ಯೆ ಇಂದಿರಾ ಕ್ಯಾಂಟೀನ್‌ ಎಂದು ಬರೆಯಲಾಗಿದೆ. ಅದೇ ರೀತಿ, ಆಗಸ್ಟ್‌ 15ರಿಂದ ಶುರುವಾಗಲಿರುವ ಕ್ಯಾಂಟೀನ್‌ “ಮೆನು ಬೋರ್ಡ್‌’ ಕೂಡ ಹಸಿರು ಬಣ್ಣದಲ್ಲಿ ಇರಲಿವೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.