ಕುದಿಯುವ ಸಾಂಬಾರಿನಲ್ಲಿ ಬಿದ್ದು ಬಾಲಕ ಸಾವು

ಕೊಪ್ಪಳ: ಕುದಿಯುವ ಸಾಂಬಾರಿನಲ್ಲಿ ಬಿದ್ದು ಬಾಲಕನೊಬ್ಬ ಮೃತಪಟ್ಟ ಹೃದಯವಿದ್ರಾವಕ ಘಟನೆ ತಾಲೂಕಿನ ಹುಲಿಗೆಮ್ಮ ದೇವಿ ದೇವಸ್ಥಾನದ ನದಿ ದಂಡೆಯಲ್ಲಿ ನಡೆದಿದೆ. ಮೃತ ಬಾಲಕನನ್ನು ಆಂಧ್ರದ ಹೂಳಗುಂದಿ ಗ್ರಾಮದ ರಾಜು(3) ಎಂದು ಗುರುತಿಸಲಾಗಿದೆ. ಮೃತ ಬಾಲಕನ ಕುಟುಂಬವು ಹುಲಿಗೆಮ್ಮ ದೇವಸ್ಥಾನಕ್ಕೆ ಜಾತ್ರಾ ಮಹೋತ್ಸವದಲ್ಲಿ ಪಾಲ್ಗೊಳ್ಳಲು ಆಗಮಿಸಿತ್ತು. ನದಿ ದಂಡೆಯ ಪಕ್ಕದಲ್ಲಿ ಕುಟುಂಬದವರು ಅಡುಗೆ ಮಾಡುತ್ತಿದ್ದ ವೇಳೆ ರಾಜು ಆಟವಾಡುತ್ತ ಹೋಗಿ ಕುದಿಯುವ ಸಾಂಬಾರಿನ ಪಾತ್ರೆಯಲ್ಲಿ ಬಿದ್ದಿದ್ದಾನೆ. ತೀವ್ರ ಗಾಯಗೊಂಡ ಮಗುವನ್ನು ಕುಟುಂಬಸ್ಥರು ಹೊಸಪೇಟೆ ಖಾಸಗಿ ಆಸ್ಪತ್ರೆಗೆ ತೆಗೆದುಕೊಂಡು ಹೋಗುತ್ತಿದ್ದ ದಾರಿ ಮಧ್ಯದಲ್ಲೇ ಮೃತಪಟ್ಟಿದೆ. ಮುನಿರಾಬಾದ್‌ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.