ಉಡುಪಿಯಲ್ಲಿ ಚಿನ್ನಾಭರಣ ಖರೀದಿ ವಂಚನೆ ತಂಡ

ಉಡುಪಿ: ಚಿನ್ನಾಭರಣ ಖರೀದಿಸಿ ಆನ್‌ಲೈನ್‌ ಮೂಲಕ ಹಣ ಪಾವತಿಸುವ ನಾಟಕವಾಡಿ ವಂಚಿಸುವ ತಂಡ ಉಡುಪಿಯಲ್ಲಿ ಕಾರ್ಯಾಚರಿಸುವ ಬಗ್ಗೆ ಪೊಲೀಸರಿಗೆ ಮಾಹಿತಿ ಲಭ್ಯವಾಗಿದೆ. ಈ ತಂಡ ಈಗಾಗಲೇ ಚಿಕ್ಕಮಗಳೂರಿನ ಕೊಪ್ಪ, ಕಾರವಾರಗಳಲ್ಲಿನ ಜುವೆಲರಿ ಅಂಗಡಿಗಳಲ್ಲಿ ಇದೇ ರೀತಿ ಮೋಸ ಮಾಡಿದೆ.

ಫೋಟೋ ದಾಖಲು
ಮೋಸ ಮಾಡುವ ತಂಡದ ಇಬ್ಬರ ಪೋಟೋಗಳು ಕಾರವಾರದ ಜುವೆಲರಿ ಸಿಸಿಟಿವಿಯಲ್ಲಿ ದಾಖಲಾಗಿದ್ದು, ಪೊಲೀಸರು ಅದನ್ನು ಬಹಿರಂಗ ಪಡಿಸಿದ್ದಾರೆ. ಇವರು ಕಂಡು ಬಂದರೆ ತತ್‌ಕ್ಷಣವೇ ಮಾಹಿತಿ ನೀಡುವಂತೆ ಪೊಲೀಸರು ತಿಳಿಸಿದ್ದಾರೆ.

ನಕಲಿ ನೋಂದಣಿ ಕಾರಿನಲ್ಲಿ ಸಂಚಾರ
ನಕಲಿ ನೋಂದಣಿ ಸಂಖ್ಯೆಯುಳ್ಳ ಬಿಳಿ ಬಣ್ಣದ ಸ್ವಿಫ್ಟ್ ಡಿಸೈರ್‌ ಕಾರಿನಲ್ಲಿ ಈ ತಂಡ ಸಂಚರಿಸುವ ಬಗ್ಗೆ ಪೊಲೀಸರಿಗೆ ಮಾಹಿತಿ ಬಂದಿದೆ.

ಈಗಾಗಲೇ ಜಿಲ್ಲೆಯ ಎಲ್ಲ ಜುವೆಲರಿ ಅಂಗಡಿ ಮಾಲಕರಿಗೆ ಎಚ್ಚರಿಕೆಯಿಂದ ಇರುವಂತೆ ಪೊಲೀಸರು ಸೂಚನೆ ನೀಡಿದ್ದಾರೆ.

ಜುವೆಲರಿ ಅಂಗಡಿಗಳಿಗೆ ಮಾಹಿತಿ ರವಾನೆ
ಕಾರವಾರ ಹಾಗೂ ಕೊಪ್ಪದಲ್ಲಿ ಈ ತಂಡ ಕಾರ್ಯಾಚರಣೆ ನಡೆಸುತ್ತಿತ್ತು. ಈ ಬಗ್ಗೆ ಕೊಪ್ಪ ಠಾಣೆಯಲ್ಲಿ ಪ್ರಕರಣವೂ ದಾಖಲಾಗಿದೆ. ಈಗ ಈ ತಂಡ ಉಡುಪಿಗೆ ಬಂದಿರುವ ಮಾಹಿತಿ ಲಭಿಸಿದ್ದು, ಜುವೆಲರಿ ಅಂಗಡಿಯವರು
ಎಚ್ಚರದಿಂದ ಇರುವಂತೆ ತಿಳಿಸಲಾಗಿದೆ.
– ಮಂಜುನಾಥ್‌ ವೃತ್ತ ನಿರೀಕ್ಷಕರು, ಉಡುಪಿ