ಮೈಸೂರು: ದಸರಾ ಉತ್ಸವದ ಪ್ರಮುಖ ಆಕರ್ಷಣೆಯಾದ ಜಂಬೂ ಸವಾರಿಯಲ್ಲಿ ಪಾಲ್ಗೊಳ್ಳಲು ಗಜಪಡೆಯ 2ನೇ ತಂಡ ಸೋಮವಾರ ಸಂಜೆ ಅರಮನೆಗೆ ಆಗಮಿಸಿತು.
ಈ ಹಿಂದೆ ಅಂಬಾರಿ ಆನೆ ಕ್ಯಾಪ್ಟನ್‌ ಅಭಿಮನ್ಯು ನೇತೃತ್ವದಲ್ಲಿ 9 ಆನೆಗಳನ್ನು ಸೆ.1ರಂದು ಕರೆತರಲಾಗಿತ್ತು. ಸೆ.25ರ ಸೋಮವಾರ ಸಂಜೆ ವಿವಿಧ ಆನೆ ಶಿಬಿರಗಳಿಂದ ಸುಗ್ರೀವ, ಪ್ರಶಾಂತ, ಲಕ್ಷ್ಮೀ, ರೋಹಿತ್‌ ಮತ್ತು ಹಿರಣ್ಯಾ ಆನೆಗಳ 2ನೇ ತಂಡವು ಟ್ರಕ್‌ಗಳ ಮೂಲಕ ಅರಮನೆಗೆ ಬಂದಿಳಿಯಿತು.
3 ಹೊಸ ಆನೆಗಳು
ಸೋಮವಾರ ಬಂದಿರುವ 5 ಆನೆಗಳಲ್ಲಿ 3 ಹೊಸ ಆನೆಗಳಿರುವುದು ವಿಶೇಷ. ರಾಂಪುರ ಆನೆ ಶಿಬಿರದ ಹಿರಣ್ಯಾ, ರೋಹಿತ್‌ ಹಾಗೂ ದೊಡ್ಡಹರವೆ ಶಿಬಿರದ ಲಕ್ಷ್ಮೀ ಆನೆಗಳು ಇದೇ ಮೊದಲ ಬಾರಿಗೆ ದಸರಾ ಉತ್ಸವದಲ್ಲಿ ಪಾಲ್ಗೊಳ್ಳಲಿವೆ. ಉಳಿದಂತೆ ದುಬಾರೆ ಶಿಬಿರದ ಪ್ರಶಾಂತ ಮತ್ತು ಸುಗ್ರೀವ ಈ ಹಿಂದಿನ ದಸರಾ ಉತ್ಸವದಲ್ಲಿ ಪಾಲ್ಗೊಂಡಿವೆ.
