ಚೆನ್ನೈ: ಲೋಕೇಶ್ ಕನಕರಾಜ್‌ – ಸೂಪರ್‌ ಸ್ಟಾರ್ ರಜಿನಿಕಾಂತ್‌ ಕಾಂಬಿನೇಷನ್‌ ನಲ್ಲಿ ಬರಲಿರುವ ʼತಲೈವರ್ 171ʼ ಹೈಪ್‌ ಹೆಚ್ಚಿಸಿದೆ. ಫ್ಯಾನ್ಸ್‌ಗಳು ಈ ಸಿನಿಮಾಕ್ಕಾಗಿ ಕುತೂಹಲದಿಂದ ಕಾಯುತ್ತಿದ್ದಾರೆ.
ಇತ್ತೀಚೆಗಷ್ಟೇ ʼತಲೈವರ್ 171ʼ ಸಿನಿಮಾದ ಮೊದಲ ಪೋಸ್ಟರ್‌ ರಿಲೀಸ್‌ ಆಗಿದೆ. ಇದರಲ್ಲಿ ರಜಿನಿಕಾಂತ್‌ ಕೈಗೆ ಬೇಡಿಯನ್ನು ಹಾಕಿಕೊಂಡ ಹಾಗೆ ವಾಚ್‌ಗಳನ್ನು ಹಾಕಿಕೊಂಡಿದ್ದಾರೆ. ಈ ಪೋಸ್ಟರ್‌ ವೈರಲ್ ಆಗಿದ್ದು, ಅಭಿಮಾನಿಗಳು ಸಿನಿಮಾದ ಟೀಸರ್‌ ಗಾಗಿ ಕಾಯುತ್ತಿದ್ದಾರೆ.
ಇದೇ ಏಪ್ರಿಲ್‌ 22 ರಂದು ಸಿನಿಮಾದ ಟೈಟಲ್‌ ರಿವೀಲ್‌ ಆಗಲಿದೆ ಎನ್ನಲಾಗಿದೆ. ಈ ನಡುವೆ ʼ ʼತಲೈವರ್ 171ʼ ಬಗ್ಗೆ ಮತ್ತೊಂದು ಅಪ್ಡೇಟ್‌ ಹೊರಬಿದ್ದಿದೆ.
ರಜಿನಿಕಾಂತ್‌ ಅವರ ʼಜೈಲರ್‌ʼ ಸಿನಿಮಾದಲ್ಲಿ ಮೋಹನ್‌ ಲಾಲ್‌, ಶಿವರಾಜ್‌ ಕುಮಾರ್‌ ಹಾಗೂ ಜಾಕಿಶ್ರಾಫ್‌ ಅವರು ಕಾಣಿಸಿಕೊಂಡಿದ್ದರು. ಲೋಕೇಶ್ ಕನಕರಾಜ್‌ ಅವರ ʼತಲೈವರ್ 171ʼ ಸಿನಿಮಾದಲ್ಲೂ ಬಾಲಿವುಡ್ ನ ಖ್ಯಾತ ನಟರೊಬ್ಬರು ಪ್ರಧಾನ ಪಾತ್ರದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ ಎನ್ನಲಾಗಿದೆ.
ಲೋಕೇಶ್ ಅವರು ಬಾಲಿವುಡ್ ಸ್ಟಾರ್ ರಣವೀರ್ ಸಿಂಗ್ ಅವರನ್ನು ಚಿತ್ರದಲ್ಲಿ ಪ್ರಮುಖ ಪಾತ್ರಕ್ಕೆ ಆಯ್ಕೆ ಮಾಡಲು ಪರಿಗಣಿಸಿದ್ದಾರೆ ಎಂದು ವರದಿಯೊಂದು ತಿಳಿಸಿದೆ. ಈ ಬಗ್ಗೆ ಇನ್ನು ಕೂಡ ಅಧಿಕೃತವಾಗಿ ಮಾಹಿತಿ ಹೊರಬಿದ್ದಿಲ್ಲ. ಇದಲ್ಲದೆ ಸಿನಿಮಾದ ಪಾತ್ರವರ್ಗದ ಬಗ್ಗೆ ಇನ್ನಷ್ಟೇ ಮಾಹಿತಿಗಳು ಹೊರಬೀಳಬೇಕಿದೆ.
ಸಾಮಾನ್ಯವಾಗಿ ಲೋಕೇಶ್ ಅವರ ಸಿನಿಮಾದ ಟೀಸರ್‌ ಅಧಿಕೃತ ಶೂಟಿಂಗ್‌ ಆರಂಭಕ್ಕೂ ಮುನ್ನವೇ ರಿಲೀಸ್‌ ಮಾಡಲಾಗುತ್ತದೆ. ಕಮಲ್‌ ಹಾಸನ್‌ ಅವರ ʼವಿಕ್ರಮ್‌ʼ ಸಿನಿಮಾದ ವಿಚಾರದಲ್ಲೂ ಇದೇ ರೀತಿ ಆಗಿತ್ತು. ಹೀಗಾಗಿ ರಜಿನಿಕಾಂತ್‌ ಸಿನಿಮಾದ ಟೀಸರ್‌ ಗೆ ಫ್ಯಾನ್ಸ್‌ ಕಾಯುತ್ತಿದ್ದಾರೆ.
