ಜಮ್ಮು-ಕಾಶ್ಮೀರ:ನೈಕೂ ಹತ್ಯೆ ಬಳಿಕ ಹಿಜ್ಬುಲ್ ಮುಜಾಹಿದೀನ್ ಗೆ ಡಾ.ಸೈಫುಲ್ಲಾ ನೂತನ ಕಮಾಂಡರ್?

ಶ್ರೀನಗರ್: ಜಮ್ಮು ಕಾಶ್ಮೀರದ ಪುಲ್ವಾಮಾದಲ್ಲಿ ಮೋಸ್ಟ್ ವಾಂಟೆಡ್ ಟೆರರಿಸ್ಟ್ ರಿಯಾಜ್ ನೈಕೂ ಭದ್ರತಾ ಪಡೆಯ ಎನ್ ಕೌಂಟರ್ ಗೆ ಬಲಿಯಾದ ನಂತರ ಕಾಶ್ಮೀರದಲ್ಲಿನ ಪಾಕಿಸ್ತಾನ ಬೆಂಬಲಿತ ಭಯೋತ್ಪಾದಕ ಸಂಘಟನೆಯಾದ ಹಿಜ್ಬುಲ್ ಮುಜಾಹಿದೀನ್ ಗೆ ಡಾ.ಸೈಫುಲ್ಲಾ ನೂತನ ಕಮಾಂಡರ್ ಆಗಿ ನೇಮಕವಾಗುವ ಸಾಧ್ಯತೆ ಇದೆ ಎಂದು ವರದಿ ತಿಳಿಸಿದೆ.

ಗುಪ್ತಚರ ದಳದ ಮಾಹಿತಿ ಪ್ರಕಾರ, ಸೈಫುಲ್ಲಾ ಎ++ ಕೆಟಗರಿಯ ಟಾಪ್ ಟೆರರಿಸ್ಟ್ ಆಗಿದ್ದು, ಬಹುತೇಕ ನೈಕೂ ಸ್ಥಾನಕ್ಕೆ ಆತನನ್ನೇ ನೇಮಕ ಮಾಡುವ ಸಾಧ್ಯತೆ ಇದೆ ಎಂದು ಹೇಳಿದೆ. ಈ ಹಿಂದೆ ಭದ್ರತಾ ಪಡೆಯ ದಾಳಿಯಲ್ಲಿ ಗಾಯಗೊಂಡ ಉಗ್ರರಿಗೆ ವೈದ್ಯಕೀಯ ಸಹಾಯ ಮಾಡುವ ಮೂಲಕ ಹೆಸರುಗಳಿಸಿದ್ದ ಎಂದು ಗುಪ್ತಚರ ಮೂಲಗಳು ತಿಳಿಸಿವೆ.

ದಕ್ಷಿಣ ಕಾಶ್ಮೀರದಲ್ಲಿ ಪೂರ್ಣ ಪ್ರಮಾಣದಲ್ಲಿ ಸೈಫುಲ್ಲಾ ಸಕ್ರಿಯವಾಗಿದ್ದು, ಕಾಶ್ಮೀರಿ ಯುವಕರನ್ನು ಜಿಹಾದಿಗೆ ನೇಮಕ ಮಾಡುವ ಕೆಲಸದಲ್ಲಿ ಶಾಮೀಲಾಗಿದ್ದ. ಸೈಫುಲ್ಲಾ ಪುಲ್ವಾಮಾದ ಮಾಲಂಗ್ ಪೋರಾ ನಿವಾಸಿಯಾಗಿದ್ದಾನೆ. ಬುರ್ಹಾನ್ ವಾನಿಯ 12 ಮಂದಿ ಉಗ್ರರ ಗುಂಪಿನಲ್ಲಿ ಸೈಫುಲ್ಲಾ ಕೂಡಾ ಒಬ್ಬನಾಗಿದ್ದ ಎಂದು ವರದಿ ವಿವರಿಸಿದೆ.

ಪುಲ್ವಾಮಾ, ತ್ರಾಲ್, ಕಾಕಾಪೋರಾ ಮತ್ತು ಕುಲ್ಗಾಮ್ ಪ್ರದೇಶಗಳಲ್ಲಿ ಉಗ್ರರಿಗೆ ಸೈಫುಲ್ಲಾ ಗೈಡ್ ಆಗಿ ಕೆಲಸ ಮಾಡುತ್ತಿದ್ದ. ಅದೇ ರೀತಿ ಶ್ರೀನಗರ್ ಸಿಟಿಯಲ್ಲಿಯೂ ಸಕ್ರಿಯನಾಗಿದ್ದ ಎಂದು ಗುಪ್ತಚರ ಮೂಲಗಳು ತಿಳಿಸಿವೆ. ಮೇ 6ರಂದು ನಡೆದ ಜಂಟಿ ಕಾರ್ಯಾಚರಣೆಯಲ್ಲಿ ರಿಯಾಝ್ ನೈಕೂ ಹತ್ಯೆಗೀಡಾಗಿದ್ದ.