ಸ್ಮಾರ್ಟ್‌ಫೋನ್‌ ಖರೀದಿಸಿದ್ದಕ್ಕೆ ಅದ್ಧೂರಿ ಮೆರವಣಿಗೆ, ಭೂರಿ ಭೋಜನ : ವಿಡಿಯೋ ವೈರಲ್‌

ಮಧ್ಯಪ್ರದೇಶ: ಸ್ಮಾರ್ಟ್‌ಫೋನ್‌ ಯಾರ ಬಳಿಯಲ್ಲಿ ಇಲ್ಲ ಹೇಳಿ? ಎಲ್ಲರಲ್ಲೂ ಅದು ಉಂಟು. ಹಾಗೆಂದು ಅದನ್ನು ಖರೀದಿ ಮಾಡಿದ್ದಕ್ಕೆ ಮೆರವಣಿಗೆ ಮಾಡುವುದು ಸಾಧ್ಯವೇ?

ಮಧ್ಯಪ್ರದೇಶದ ಶಿವಪುರಿಯ ಚಹಾ ಮಾರಾಟಗಾರ ಮುರಾರಿ ಖುಶ್ವಾಹ ವಿಚಾರದಲ್ಲಿ ಹಾಗಲ್ಲ. ಐದು ವರ್ಷದ ಪುತ್ರಿಯ ಸಂತೋಷಕ್ಕಾಗಿ 12,500 ರೂ. ನೀಡಿ ಸ್ಮಾರ್ಟ್‌ಫೋನ್‌ ಖರೀದಿಸಿದ್ದಾರೆ.

ಜತೆಗೆ, ಉತ್ತರ ಭಾರತದಲ್ಲಿ ಮದುವೆಗೆ ವರ ಸಿಂಗರಿಸಿದ ಸಾರೋಟಿನಲ್ಲಿ ಬರುವಂತೆ, ತಾನು, ಪತ್ನಿ, ಪುತ್ರಿ ಸಿಂಗರಿಸಿದ ರಥದಲ್ಲಿ ಅಂಗಡಿಯಿಂದ ಮನೆಗೆ ಆಗಮಿಸಿದ್ದಾರೆ.

ವಿದ್ಯುತ್‌ ದೀಪ, ವಿವಿಧ ಹೂಗಳಿಂದ ರಥವನ್ನು ಅಲಂಕರಿಸಲಾಗಿತ್ತು. ಅದ್ಧೂರಿ ಇರಲಿ ಎಂಬ ಕಾರಣಕ್ಕಾಗಿ ಮೆರವಣಿಗೆಯಲ್ಲಿ ವಾದ್ಯಗೋಷ್ಠಿಯೂ ಇತ್ತು ಎನ್ನಿ. ಸೋಮವಾರ ನಡೆದಿದ್ದ ಖರೀದಿ ಮತ್ತು ಮೆರವಣಿಯ ವಿಡಿಯೋ-ಫೋಟೋಗಳು ವೈರಲ್‌ ಆಗಿವೆ. ಅದ್ಧೂರಿ ಮೆರವಣಿಗೆ ಮಾತ್ರವಲ್ಲ, ಆಪ್ತರಿಗೆ ಅಷ್ಟೇ ಭೂರಿ ಭೋಜನವೂ ಇತ್ತಂತೆ.