ಪೆರಿಯಾರ್‌ ಜನ್ಮದಿನ ಇನ್ನು “ಸಾಮಾಜಿಕ ನ್ಯಾಯದಿನ’

ಚೆನ್ನೈ: ತಮಿಳುನಾಡಿನಲ್ಲಿ ದ್ರಾವಿಡ ಚಳವಳಿ ರೂಪಿಸಿದ ಮುಖಂಡ ಇ.ವಿ.ರಾಮಸ್ವಾಮಿ ಪೆರಿಯಾರ್‌ ಜನ್ಮದಿನ, ಸೆ.17 ಅನ್ನು ಪ್ರತಿ ವರ್ಷ “ಸಾಮಾಜಿಕ ನ್ಯಾಯದಿನ’ ಎಂದು ಆಚರಿಸಲು ತೀರ್ಮಾನಿಸಲಾಗಿದೆ.

ವಿಧಾನಸಭೆಯಲ್ಲಿ ಮಾತನಾಡಿದ ಸಿಎಂ ಎಂ.ಕೆ.ಸ್ಟಾಲಿನ್‌ ಈ ಮಾಹಿತಿ ನೀಡಿದ್ದಾರೆ. ಪೆರಿಯಾರ್‌ ಸಾಮಾಜಿಕ ನ್ಯಾಯ, ಆತ್ಮಗೌರವ, ಸಮಾನತೆ ಬಗ್ಗೆ ಹೊಂದಿದ್ದ ನಿಲುವುಗಳು ರಾಜ್ಯ ಸದ್ಯ ಹೊಂದಿರುವ ಅಭಿವೃದ್ಧಿಗೆ ಕಾರಣವಾಗಿದೆ.

ಹೀಗಾಗಿ, ಪ್ರಸಕ್ತ ವರ್ಷದಿಂದ ಅನ್ವಯವಾಗುವಂತೆ ಅವರ ಜನ್ಮದಿನವನ್ನು ಪ್ರತಿ ವರ್ಷ “ಸಾಮಾಜಿಕ ನ್ಯಾಯದಿನ’ ಎಂದು ಆಚರಿಸಲಾಗುವುದು. ಆ ದಿನ ಸಚಿವಾಲಯ ಸೇರಿದಂತೆ ಎಲ್ಲ ಸರ್ಕಾರಿ ಕಚೇರಿಗಳಲ್ಲಿ ಸಹೋದರತ್ವ, ಸಮಾನತೆ, ಆತ್ಮಗೌರವದ ಪ್ರತಿಜ್ಞೆಯನ್ನು ಸ್ವೀಕರಿಸಲಾಗುತ್ತದೆ ಎಂದರು.