ಕಾಬೂಲ್‌: ಅಫ್ಘಾನಿಸ್ಥಾನ, ತಾಲಿಬಾನಿಗಳ ಕೈವಶವಾದ ಕಾರಣ ಅಲ್ಲಿರುವ ವಿವಿಧ ಲೋಹಗಳ ದೈತ್ಯ ನಿಕ್ಷೇಪಗಳು ಉಗ್ರರ ಹಿಡಿತಕ್ಕೆ ಬಂದಿವೆ. ಮೂಲಸೌಕರ್ಯಗಳ ಕೊರತೆ ಹಾಗೂ ಇನ್ನಿತರ ಕಾರಣಗಳಿಂದಾಗಿ ಆ ನಿಕ್ಷೇಪಗಳನ್ನು ಯಾರೂ ಮುಟ್ಟಿಲ್ಲ. ಸುಮಾರು 74 ಲಕ್ಷ ಕೋಟಿ ರೂ.ಗಳಷ್ಟು ಬೆಲೆಬಾಳುವ ಈ ನಿಕ್ಷೇಪಗಳು ಭವಿಷ್ಯದಲ್ಲಿ ತಾಲಿಬಾನಿಗರು ಹಾಗೂ ಅವರ ಮಿತ್ರ ರಾಷ್ಟ್ರಗಳ ಭಾಗ್ಯದ ಬಾಗಿಲು ತೆರೆಯಬಹುದು ಎನ್ನಲಾಗಿದೆ.
ಆರ್ಥಿಕ ಮುಗ್ಗಟ್ಟಿನಲ್ಲಿ ತಾಲಿಬಾನಿಗರು: ಇತ್ತೀಚಿನ ವಿದ್ಯಮಾನ ಹಿನ್ನೆಲೆಯಲ್ಲಿ ಕೆಲವು ರಾಷ್ಟ್ರಗಳು ತಾವು ಅಫ್ಘಾನಿಸ್ಥಾನ ಅಭಿವೃದ್ಧಿಗಾಗಿ ನೀಡುತ್ತಿದ್ದ ಅನುದಾನವನ್ನು ನಿಲ್ಲಿಸಿವೆ. ಹಾಗಾಗಿ, ಆರ್ಥಿಕ ಮುಗ್ಗಟ್ಟಿಗೆ ಸಿಲುಕಿರುವ ತಾಲಿಬಾನಿಗಳಿಗೆ ಸರಕಾರ ನಡೆಸಲು ಹಣದ ಅವಶ್ಯಕತೆ ಇದೆ. ಸಹಜವಾಗಿ ಅವರ ಕಣ್ಣು ಈ ನಿಕ್ಷೇಪಗಳ ಮೇಲೆ ಬೀಳಲಿದ್ದು, ಮುಂದೆ ದೊಡ್ಡ ಪ್ರಮಾಣದಲ್ಲಿ ಗಣಿಗಾರಿಕೆ ಆರಂಭಿಸಿ, ಕೋಟಿ ಕೋಟಿ ರೂ.ಗಳನ್ನು ಸಂಪಾದಿಸುವ ಸಾಧ್ಯತೆಯಿದೆ. ತಾಲಿಬಾನಿಗಳ ಜೊತೆಗೆ ಸ್ನೇಹ ಹಸ್ತ ಚಾಚಿರುವ ಚೀನ, ಪಾಕಿಸ್ಥಾನದಂಥ ರಾಷ್ಟ್ರಗಳೂ ಇದರ ಲಾಭವನ್ನು ಪಡೆಯಬಹುದು.
ಚೀನಕ್ಕೆ ಹೆಚ್ಚು ಲಾಭ?: ತಾಲಿಬಾನಿಗಳು ಅಫ್ಘಾನಿಸ್ಥಾನವನ್ನು ವಶಪಡಿಸಿಕೊಂಡ ಮೇಲೆ, ಅಲ್ಲಿ ವಿದೇಶಿ ಹೂಡಿಕೆಯಿನ್ನು ಕನಸಿನ ಮಾತು. ಆದರೆ, ಚೀನ ಮಾತ್ರ ಅಲ್ಲಿ ಹೂಡಿಕೆ ಮಾಡಲು ಸಿದ್ಧವಾಗಿದೆ. ಉದಾಹರಣೆಗೆ, ವಿಶ್ವದ 2ನೇ ಅತಿ ದೊಡ್ಡ ತಾಮ್ರದ ನಿಕ್ಷೇಪವಾದ ಅಫ್ಘಾನಿಸ್ಥಾನದ ಮೆಸ್‌ ಅಯ°ಕ್‌ನಿಂದ 30 ವರ್ಷಗಳವರೆಗೆ ತಾಮ್ರದ ಅದಿರನ್ನು ತೆಗೆಯುವ ಗುತ್ತಿಗೆಯನ್ನು 2007ರಲ್ಲೇ ಚೀನ ಒಡೆತನದ ಚೀನ ಮೆಟಲರ್ಜಿಕಲ್‌ ಗ್ರೂಪ್‌ ಕಾರ್ಪೊರೇಷನ್‌ ಸಂಸ್ಥೆ ಪಡೆದುಕೊಂಡಿತ್ತು. ಅದರಂತೆ, 11.5 ದಶಲಕ್ಷ ಟನ್‌ ಅದಿರನ್ನು ಚೀನ ತೆಗೆಯಲಿದೆ. ಸದ್ಯಕ್ಕೆ ತಟಸ್ಥವಾಗಿರುವ ಇಲ್ಲಿನ ಗಣಿಗಾರಿಕೆಯನ್ನು ಪುನರಾರಂಭಿಸುವುದಾಗಿ ಚೀನ ಹೇಳಿದೆ.
ಯಾವ್ಯಾವ ನಿಕ್ಷೇಪಗಳಿವೆ?: ಅಮೆರಿಕದ ಜಿಯಾಲಜಿಕಲ್‌ ಸರ್ವೆ ವರದಿ ಪ್ರಕಾರ, ಬಾಕ್ಸೆ„ಟ್‌, ತಾಮ್ರ, ಕಬ್ಬಿಣ ಅದಿರು, ಲೀಥಿಯಂ ಹಾಗೂ ಇನ್ನಿತರ ತೀರಾ ವಿರಳವೆನಿಸಿರುವ ಖನಿಜಗಳ ಬೃಹತ್‌ ನಿಕ್ಷೇಪಗಳು ಅಫ್ಘನ್‌ನಲ್ಲಿವೆ. ಇವುಗಳಲ್ಲಿ ತಾಮ್ರ ಮತ್ತು ಲೀಥಿಯಂಗೆ ಪ್ರಸ್ತುತ ಹೆಚ್ಚು ಬೇಡಿಕೆಯಿದೆ. ಈ ವರ್ಷ, ಜಾಗತಿಕ ಮಟ್ಟದಲ್ಲಿ ಒಂದು ಟನ್‌ ತಾಮ್ರದ ಅದಿರಿನ ಬೆಲೆ 7.45 ಲಕ್ಷ ರೂ.ಗಳಿಗೆ ಏರಿಕೆಯಾಗಿದೆ. ಬರುವ ದಿನಗಳಲ್ಲಿ ಇದು ಮತ್ತಷ್ಟು ಏರಿಕೆಯಾಗುವ ಸಾಧ್ಯತೆಯಿದೆ. ಇನ್ನು, ವಾಹನಗಳ ಬ್ಯಾಟರಿ, ಸೋಲಾರ್‌ ಪ್ಯಾನೆಲ್‌, ಪವನ ವಿದ್ಯುತ್‌ ಪರಿಕರಗಳ ತಯಾರಿಕೆಯಲ್ಲಿ ಬೇಕಾಗುವ ಲೀಥಿಯಂನ ಬೇಡಿಕೆಗೆ 2040ರ ಹೊತ್ತಿಗೆ ಈಗಿರುವುದಕ್ಕಿಂತ ಶೇ.40ರಷ್ಟು ಹೆಚ್ಚಾಗುವ ಸಾಧ್ಯತೆಯಿದೆ.
