ಯಲಹಂಕ ವಾಯುನೆಲೆಯಲ್ಲಿ ಅನುಮಾನಾಸ್ಪದ ವ್ಯಕ್ತಿ ಬಂಧನ

ಬೆಂಗಳೂರು: ಯಲಹಂಕ ವಾಯು ನೆಲೆ ಯಲ್ಲಿ ಕೆಲಸಕ್ಕೆ ನಿಯೋಜನೆಗೊಂಡಿದ್ದ ಉತ್ತರ ಪ್ರದೇಶ ಮೂಲದ ಕಾರ್ಮಿಕ ನನ್ನು ಅನುಮಾನಾಸ್ಪದ ವರ್ತನೆ ಹಿನ್ನೆಲೆಯಲ್ಲಿ ಪೊಲೀಸರು ಬಂಧಿಸಿ ವಿಚಾರಣೆ ನಡೆಸುತ್ತಿದ್ದಾರೆ. ಮಮ್ನೂನ್‌ (24) ಬಂಧಿತ. ವಾಯುನೆಲೆಯ ಭದ್ರತಾ ಅಧಿಕಾರಿ ಸುಬೇಂದ್ರ ಮಿಶ್ರಾ ಅವರು ಫೆ.5ರಂದು ನೀಡಿದ ದೂರಿನ ಮೇರೆಗೆ ಆರೋಪಿಯನ್ನು ಬಂಧಿಸಿ ವಿಚಾರಣೆಗೊಳಪಡಿಸಲಾಗಿದೆ .

ಬಂಧಿತನ ಮೊಬೈಲ್‌ನಲ್ಲಿ ವಾಯುನೆಲೆಯ ನಿಷೇಧಿತ ಪ್ರದೇಶದ ಛಾಯಾ ಚಿತ್ರಗಳು, 9 ಮೊಬೈಲ್‌ ಸಿಮ್‌ಕಾರ್ಡ್‌ ಗಳು, ಸೌದಿ ಅರೇಬಿಯಾದಲ್ಲಿರುವ ವ್ಯಕ್ತಿ ಯೊಬ್ಬರಿಗೆ ಕರೆ ಮಾಡಿರುವ ಮಾಹಿತಿ ಗಳು ಲಭ್ಯವಾಗಿರುವುದರಿಂದ ಸಮಗ್ರ ತನಿಖೆಗೆ ಒಳಪಡಿಸಲಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ. ಯಲಹಂಕ ವಾಯುನೆಲೆಯಲ್ಲಿ ಫೆ.14 ರಿಂದ 18ರ ತನಕ ಏರ್‌ ಶೋ ಕಾರ್ಯಕ್ರಮ ನಡೆಯಲಿದ್ದು ಇಂತಹ ಸಂದರ್ಭದಲ್ಲೇ ಈ ವಿದ್ಯಮಾನ ನಡೆದಿರುವುದು ಆತಂಕ ಮೂಡಿಸಿದೆ.

ಏರ್‌ ಶೋ ಕಾರ್ಯಕ್ರಮದ ಹಿನ್ನೆಲೆ ಯಲ್ಲಿಯೇ ಉತ್ತರ ಪ್ರದೇಶದ ಮೂಲದ ಮಮ್ನೂನ್‌ನನ್ನು ಆಯೋಜಕರು ಇಲ್ಲಿಗೆ ಕೆಲಸಕ್ಕೆ ಕರೆ ತಂದಿದ್ದರು. ಈತ ಯಲಹಂಕ ವಾಯುನೆಲೆಯ ನಿಷೇಧಿತ ಪ್ರದೇಶದಲ್ಲಿ ಅನುಮಾನಾಸ್ಪದವಾಗಿ ಓಡಾಡುತ್ತಿದ್ದ. ಅಲ್ಲದೆ, ವಾಯುನೆಲೆಯ ಪ್ರಮುಖ ಸ್ಥಳ ಗಳ ಫೋಟೋಗಳನ್ನು ತನ್ನ ಮೊಬೈಲ್‌ನಲ್ಲಿ ತೆಗೆದುಕೊಂಡಿದ್ದ. ಈತನ ವರ್ತನೆ ಯಿಂದ ಅನುಮಾನಗೊಂಡ ವಾಯು ನೆಲೆ ಅಧಿಕಾರಿ ಯಲಹಂಕ ಪೊಲೀಸರಿಗೆ ದೂರು ನೀಡಿದ್ದರು.

ಮಮ್ನೂನ್‌ ವಾಯುನೆಲೆಯಲ್ಲಿ ಫೆ.4ರಂದು ರಾತ್ರಿ ಸುಮಾರು 9.20ರ ಸುಮಾರಿಗೆ ನಿಷೇ ಧಿತ ಪ್ರದೇಶದಲ್ಲಿ ನಿಂತು ಕರೆ ಮಾಡುತ್ತಿದ್ದ. ಅನುಮಾನ ಬಂದ ಅಧಿಕಾರಿಗಳು ಈತನನ್ನು ಕರೆಸಿ ವಿಚಾರಣೆ ನಡೆಸಿದ್ದರು. ಈತನ ಮೊಬೈಲ್‌ನಲ್ಲಿ ನಿಷೇಧಿತ ಪ್ರದೇಶದ ಫೋಟೋಗಳು ಇದ್ದಿದ್ದರಿಂದ ಅಲ್ಲಿನ ಅಧಿಕಾರಿಗಳು ದೂರು ನೀಡಿ, ಆತನನ್ನು ನಮ್ಮ ವಶಕ್ಕೆ ನೀಡಿದ್ದಾರೆ ಎಂದು ಪೊಲೀಸರು ತಿಳಿಸಿದ್ದಾರೆ.