ಸುಷ್ಮಾ ಭಾರತದ ಅತ್ಯಂತ ಪ್ರೀತಿ ಪಾತ್ರದ ರಾಜಕಾರಣಿ : ವಾಲ್‌ಸ್ಟ್ರೀಟ್‌

ಹೊಸದಿಲ್ಲಿ : ‘ವಿಶ್ವದ ಅತೀ ದೊಡ್ಡ ಪ್ರಜಾಸತ್ತೆಯಾಗಿರುವ ಭಾರತದಲ್ಲಿ ಅತ್ಯಂತ ಪ್ರೀತಿ ಪಾತ್ರರಾಗಿರುವ ರಾಜಕಾರಣಿ ಎಂದರೆ ಕೇಂದ್ರ ವಿದೇಶ ವ್ಯವಹಾರಗಳ ಸಚಿವೆ ಸುಶ್ಮಾ ಸ್ವರಾಜ್‌’ ಎಂದು ಅಮೆರಿಕದ ವಾಲ್‌ ಸ್ಟ್ರೀಟ್‌ ಪತ್ರಿಕೆಯು ತನ್ನ ಸಂಪಾದಕೀಯ ಬರಹದಲ್ಲಿ ಗುಣಗಾನ ಮಾಡಿದೆ.

“ಸುಶ್ಮಾ ಸ್ವರಾಜ್‌ ಅವರು ತಮ್ಮ ಈಗಿನ ಪಾತ್ರದಲ್ಲಿ ಭಾರತದ ಅತ್ಯಂತ ಪ್ರೀತಿ ಪಾತ್ರರಾಗಿರುವ ರಾಜಕಾರಣಿ ಎನಿಸಿದ್ದಾರೆ. ವಿದೇಶಗಳಲ್ಲಿ ಸಂಕಷ್ಟಕ್ಕೆ ಗುರಿಯಾಗುವ ಭಾರತೀಯರ ಬಗ್ಗೆ ಆಕೆ ಅವಿರತ ಗಮನ ಹರಿಸಿ ಕಾಳಜಿ ತೋರುತ್ತಿರುವುದೇ ಇದಕ್ಕೆ ಕಾರಣವಾಗಿದೆ’ ಎಂದು ಅಮೆರಿಕದ ಸ್ಟಾನ್‌ಫ‌ರ್ಡ್‌ ಯುನಿವರ್ಸಿಟಿಯ ಹೂವರ್‌ ಇನ್‌ಸ್ಟಿಟ್ಯೂಶನ್‌ನ ಫೆಲೋ ಆಗಿರುವ ತುಂಕು ವರದರಾಜನ್‌ ಅವರು ಬರೆದಿರುವ ಲೇಖನದಲ್ಲಿ ಹೇಳಿದ್ದಾರೆ. 

“65ರ ಹರೆಯದ ವಿದೇಶ ವ್ಯವಹಾರಗಳ ಸಚಿವೆ ಸುಶ್ಮಾ ಸ್ವರಾಜ್‌ ಅವರು ವಿದೇಶದಲ್ಲಿ ಸಂಕಷ್ಟಕ್ಕೆ ಈಡಾಗುವ ಭಾರತೀಯರ ಸಮಸ್ಯೆಗಳನ್ನು ನಿವಾರಿಸುವುದಕ್ಕೆ ನೆರವಾಗುತ್ತಾರೆ. ಇದಕ್ಕೆ ಮುಖ್ಯ ಕಾರಣ ಪ್ರಧಾನಿ ನರೇಂದ್ರ ಮೋದಿ ಅವರು ವಿದೇಶ ಮತ್ತು ಭದ್ರತಾ ನೀತಿಗಳ ವಿಚಾರದಲ್ಲಿ ವೈಯಕ್ತಿಕವಾಗಿ ಕಟ್ಟುನಿಟ್ಟಿನ ನಿಯಂತ್ರಣ ಹೊಂದಿರುವುದದು ಮತ್ತು ವಿದೇಶದಲ್ಲಿ ಸಂಕಷ್ಟಕ್ಕೆ ಈಡಾಗುವ ಭಾರತೀಯರಿಗೆ ಸದಾ ನೆರವಿನ ಹಸ್ತ ನೀಡಬೇಕೆಂಬ ಧೋರಣೆ ಹೊದಿರುವುದೇ ಆಗಿದೆ. ಅಂತೆಯೇ ಸುಶ್ಮಾ ಅವರು ತಾನೇ ತಾನಾಗಿ ಜವಾಬ್ದಾರಿಗಳನ್ನು ಹೇರಿಕೊಂಡು ಅಕ್ಕರೆಯಿಂದ ಅದನ್ನು ನಿಭಾಯಿಸುತ್ತಿದ್ದಾರೆ’ ಎಂದು ವರದರಾಜನ್‌ ತಮ್ಮ ಲೇಖನದಲ್ಲಿ ವಿವರಿಸಿದ್ದಾರೆ. 

ಟ್ವಿಟರ್‌ನಲ್ಲಿ 86 ಕೋಟಿ ಹಿಂಬಾಲಕರನ್ನು ಹೊಂದಿರುವ ಸುಶ್ಮಾ ಸ್ವರಾಜ್‌, ಗರಿಷ್ಠ ಟ್ವಿಟರ್‌ ಹಿಂಬಾಲಕರನ್ನು ಹೊಂದಿರುವ ಅಗ್ರ ಹತ್ತು ರಾಜಕಾರಣಿಗಳಲ್ಲಿ ಒಬ್ಬರಾಗಿದ್ದಾರೆ. ಅಕೆಯ ಅನೇಕ ಟ್ವೀಟ್‌ಗಳು ಸಂಕಷ್ಟದಲ್ಲಿರುವವರಿಗೆ ನೆರವಾಗಲೆಂದೇ ಬರೆಯಲ್ಪಟ್ಟಿರುತ್ತವೆ ಎಂದು ವರದರಾಜನ್‌ ಹೇಳಿದ್ದಾರೆ.