ನವದೆಹಲಿ: ಬೆಂಗಳೂರಿನಲ್ಲಿರುವ 7 ವರ್ಷದ ಮಗನನ್ನು ಸಿಂಗಾಪುರಕ್ಕೆ ಕರೆದೊಯ್ಯಲು, ದಾಂಪತ್ಯ ಕಲಹದಿಂದ ಪ್ರತ್ಯೇಕ ವಾಸಿಸುತ್ತಿರುವ ಮಹಿಳೆಗೆ ಸುಪ್ರೀಂ ಕೋರ್ಟ್‌ ಅನುಮತಿ ನೀಡಿದೆ.
ನ್ಯಾಯಮೂರ್ತಿಗಳಾದ ಡಿ.ವೈ.ಚಂದ್ರಚೂಡ್‌, ಇಂದು ಮಲ್ಹೋತ್ರಾ, ಇಂದಿರಾ ಬ್ಯಾನರ್ಜಿ ಒಳಗೊಂಡ ಪೀಠ ವಿಡಿಯೊ ಕಾನ್ಫರೆನ್ಸ್ ನಲ್ಲಿ ಈ ಆದೇಶ ನೀಡಿದೆ.
ಏನಿದು ವಿವಾದ?: 7 ವರ್ಷದ ಮಗನ ತಾಯಿ ಸಿಂಗಾಪುರದಲ್ಲಿ ಉದ್ಯೋಗದಲ್ಲಿದ್ದು, ಮಗ ಬೆಂಗಳೂರಿನ ಅಜ್ಜಿಮನೆಯಲ್ಲಿ ವಾಸವಾಗಿದ್ದಾನೆ. ಮಗನನ್ನು ತನ್ನೊಂದಿಗೆ ಕರೆದೊಯ್ಯಬೇಕೆಂಬ ತಾಯಿಯ ಹಂಬಲಕ್ಕೆ, ಐರ್ಲೆಂಡ್‌ನ‌ಲ್ಲಿ ಪ್ರತ್ಯೇಕ ವಾಸವಿರುವ ಪತಿ ಆಕ್ಷೇಪ ತೆಗೆದಿದ್ದರು. ಈ ವಿವಾದ ಸುಪ್ರೀಂನ ಮೆಟ್ಟಿಲೇರಿತ್ತು.
ಇದನ್ನೂ ಓದಿ:5 ವರ್ಷದ ಹಿಂದೆ ಕಳೆದುಕೊಂಡ ಅರಶಿನ-ಕುಂಕುಮವನ್ನು ಮತದ ರೂಪದಲ್ಲಿ ಭಿಕ್ಷೆಯಾಗಿ ನೀಡಿ: ಕುಸುಮಾ
ಬಗೆಹರಿದಿದ್ದು ಹೇಗೆ?: 7 ವರ್ಷದ ಮಗನ ಅಂತರಾಳಕ್ಕೆ ನ್ಯಾಯಪೀಠ ವಿಡಿಯೋ ಕಾನ್ಫರೆನ್ಸ್‌ನಲ್ಲಿ ಕಿವಿಗೊಟ್ಟಿದೆ. ತಾನು ಅಪ್ಪನನ್ನು ಇಷ್ಟಪಡುತ್ತೇನಾದರೂ, ಅಮ್ಮನೊಂದಿಗೆ ಇರಲು ಬಯಸುತ್ತೇನೆ ಎಂದು ಬಾಲಕ ಅನಿಸಿಕೆ ವ್ಯಕ್ತಪಡಿಸಿದ್ದ. ಈ ಹಿನ್ನೆಲೆಯಲ್ಲಿ ನ್ಯಾಯಪೀಠ 142ನೇ ಅನುಚ್ಛೇದದಡಿ ಆದೇಶ ನೀಡಿದೆ.
ತಂದೆಗೆ ನಿಯಮಿತ ಭೇಟಿಗೂ ಕೋರ್ಟ್‌ ಸಮ್ಮತಿಸಿದೆ. ರಜಾ ದಿನಗಳಲ್ಲಿ ಭೇಟಿಯಾಗಲು, ಶನಿವಾರ- ಭಾನುವಾರ ವಿಡಿಯೊ ಕಾನ್ಫರೆನ್ಸ್ ಮೂಲಕ ಮಗನೊಂದಿಗೆ 10 ನಿಮಿಷ ಮಾತಾಡಲು ತಂದೆಗೆ ಅವಕಾಶ ನೀಡಿದೆ.
