ತಿ.ನರಸೀಪುರ: ಪ್ರಕೃತಿದತ್ತವಾದ ಸಂಪತºರಿತ ನಾಡನ್ನು ನಮ್ಮ ಪೂರ್ವಜರು ನಮಗೆ ಉಳಿಸಿಕೊಟ್ಟಿದ್ದು, ಮುಂದಿನ ತಲೆಮಾರಿಗೂ ಉಳಿಸಿಕೊಳ್ಳಲು ನಾವೆಲ್ಲರೂ ಗಿಡಮರಗಳನ್ನು ಬೆಳೆಸುವ ಮೂಲಕ ಪ್ರಕೃತಿಯನ್ನು ಉಳಿಸಿಕೊಳ್ಳಬೇಕು ಎಂದು ರಾಜವಂಶಸ್ಥ ಯದುವೀರ ಕೃಷ್ಣದತ್ತ ಒಡೆಯರ್‌ ಸಲಹೆ ನೀಡಿದರು. ತಾಲೂಕಿನ ಸೋಮನಾಥಪುರ ಗ್ರಾಮದ ಬಳಿ ಬನ್ನೂರು ಮುಖ್ಯರಸ್ತೆಯಲ್ಲಿರುವ ಆರೋಹಣ ಸೆಂಟ್ರಲ್‌ ಸ್ಕೂಲ್‌ನ ನೂತನ ಕಟ್ಟಡ ಉದ್ಘಾಟಿಸಿ ಅವರು ಮಾತನಾಡಿದರು.
ಮೈಸೂರಿನಿಂದ ಬನ್ನೂರು ಮಾರ್ಗವಾಗಿ ಆರೋಹಣ ಶಾಲೆಗೆ ಬರುವ ಮಾರ್ಗದುದ್ದಕ್ಕೂ ರಸ್ತೆಯ ಎರಡು ಬದಿಯಲ್ಲಿ ಮರ ಗಿಡಗಳಿಗಿಂತ ಪ್ಲಾಸ್ಟಿಕ್‌ ಹೆಚ್ಚಾಗಿ ಕಣ್ಣಿಗೆ ಕಂಡವು. ಪರಿಸರಕ್ಕೆ ಅಪಾಯಕಾರಿಯಾಗಿ ಪರಿಣಮಿಸುವ ಪ್ಲಾಸ್ಟಿಕ್‌ ಬಳಕೆಯನ್ನು ಹಂತ ಹಂತವಾಗಿ ಕೈಬಿಡಬೇಕು. ಪ್ಲಾಸ್ಟಿಕ್‌ ಮುಕ್ತ ಪರಿಸರಕ್ಕೆ ಪ್ರತಿಯೊಬ್ಬರೂ ಸಹಕರಿಸಬೇಕು ಎಂದು ಮನವಿ ಮಾಡಿದರು.
ಶಿಕ್ಷಣವೇ ಪರಿಹಾರ: ಸಾಮಾಜಿಕ ವ್ಯವಸ್ಥೆಯ ಎಲ್ಲಾ ಸಮಸ್ಯೆಗಳಿಗೂ ಶಿಕ್ಷಣವೇ ಪರಿಹಾರವಾಗಿದ್ದು, ಶಿಕ್ಷಣದಿಂದ ಜೀವನದಲ್ಲಿ ನಿರ್ದಿಷ್ಟ ಗುರಿ ಸಾಧಿಸಲು ಸಾಧ್ಯವಿರುವುದರಿಂದ ಪ್ರತಿಯೊಬ್ಬರೂ ಶಿಕ್ಷಣಕ್ಕೆ ಪ್ರಾಮುಖ್ಯತೆ ನೀಡಬೇಕು. ಸಾಮಾಜಿಕ ಬದ್ಧತೆ ಹಾಗೂ ಪ್ರಗತಿಪರ ಚಿಂತನೆಯುಳ್ಳ ತಂಡವೊಂದು ಉತ್ತಮ ಪರಿಸರದಲ್ಲಿ ಶಿಕ್ಷಣ ಸಂಸ್ಥೆಯನ್ನು ಆರಂಭಿಸಿರುವುದು ಹೆಮ್ಮೆಯ ಸಂಗತಿ ಎಂದರು.
ಸಲಹೆ: ಗ್ರಾಮೀಣ ಮಕ್ಕಳಿಗೆ ಗುಣಮಟ್ಟದ ಶಿಕ್ಷಣ ನೀಡಬೇಕು. ಮುಂದಿನ ಕಾರ್ಯಕ್ರಮಕ್ಕೆ ಬರುವ ವೇಳೆ ಶಾಲೆಯ ಮುಂಭಾಗದ ನಿವೇಶನದಲ್ಲಿ ಮರಗಿಡಗಳು ಕಾಣುವಂತಿರಬೇಕು. ಹಸಿರು ಪರಿಸರ ಕಂಗೊಳಿಸಬೇಕು. ಈ ನಿಟ್ಟಿನಲ್ಲಿ ಶಾಲೆಯ ಆಡಳಿತ ಮಂಡಳಿ ಗಮನಹರಿಸಬೇಕು ಎಂದು ಸಲಹೆ ನೀಡಿದರು.
ಜೈವಿಕ ಉದ್ಯಾನವನ: ಆರೋಹಣ ಎಜುಕೇಷನಲ್‌ ಆ್ಯಂಡ್‌ ಕಲ್ಚರಲ್‌ ಟ್ರಸ್ಟ್‌ ಗೌರವ ಕಾರ್ಯದರ್ಶಿ ಬಿ.ಎಸ್‌.ಯೋಗೇಂದ್ರ ಮಾತನಾಡಿ, ಶಾಲೆಯ ವಿಶಾಲ ಆವರಣದಲ್ಲಿ ಜೀವ ವೈವಿಧ್ಯತೆ ಬಗ್ಗೆ ಮಕ್ಕಳಿಗೆ ಅರಿವು ಮೂಡಿಸಲು ಜೈವಿಕ ಉದ್ಯಾನವನ ನಿರ್ಮಿಸಲಾಗುವುದು. ಯದುವೀರ ಒಡೆಯರ್‌ ಸಲಹೆಯಂತೆ ಶಾಲೆಯ ಸುತ್ತಲಿನ ಪರಿಸರವನ್ನು ಮರಗಿಡಗಳಿಂದ ಹಸಿರು ಮಯವಾಗಿ ಕಂಗೊಳಿಸುವಂತೆ ಮಾಡಲಾಗುವುದು ಎಂದು ತಿಳಿಸಿದರು.
ಕಟ್ಟಡ ಉದ್ಘಾಟನೆಗೆ ಆಗಮಿಸಿದ ಯದುವೀರ ಒಡೆಯರ್‌ ಅವರನ್ನು ಪೂರ್ಣಕುಂಭ ಸ್ವಾಗತದೊಂದಿಗೆ ಆರೋಹಣ ಸೆಂಟ್ರಲ್‌ ಸ್ಕೂಲ್‌ ಆವರಣಕ್ಕೆ ಕರೆತರಲಾಯಿತು. ಸಾಂಕೇತಿಕವಾಗಿ ಸಸಿಯೊಂದನ್ನು ನೆಡುವ ಮೂಲಕ ಶಾಲೆಯನ್ನು ಹಸಿರೀಕರಣ ಗೊಳಿಸುವ ಕಾರ್ಯಕ್ಕೆ ಯದುವೀರ ಚಾಲನೆ ನೀಡಿದರು. ಈ ವೇಳೆ, ಟ್ರಸ್ಟ್‌ ಅಧ್ಯಕ್ಷ ವೈ.ಎಚ್‌.ಹನುಮಂತೇಗೌಡ, ಕಾರ್ಯದರ್ಶಿ ಎನ್‌.ಎಂ.ರಾಮಚಂದ್ರ, ಉಪಾಧ್ಯಕ್ಷ ಬಿ.ಎನ್‌. ಸುರೇಶ್‌, ಖಜಾಂಚಿ ಮಾಣಕ್‌ ಚಂದ್‌, ನಿರ್ದೇಶಕರಾದ ಟಿ. ವಾಸುದೇವ್‌, ದೀಪಕ್‌ ಕುಮಾರ್‌ ಜೈನ್‌, ರಾಕೇಶ್‌ ಜೈನ್‌,
ರಮ್ಯಾ ರಾಜ್‌ ಗಿರೀಶ್‌, ಸೂರಜ್‌, ಎಸ್‌.ಬಸವೇಗೌಡ, ಸುಭಾಷ್‌ ಚೌಧರಿ, ಜಿಪಂ ಸದಸ್ಯ ಎಸ್‌.ವಿ. ಜಯಪಾಲ ಭರಣಿ, ತಾಪಂ ಸದಸ್ಯ ರಾಮಲಿಂಗಯ್ಯ, ಸಮಾಜ ಸೇವಕ ಮಹೇಂದ್ರಸಿಂಗ್‌ ಕಾಳಪ್ಪ, ಎಪಿಎಂಸಿ ಅಧ್ಯಕ್ಷ ವೆಂಕಟೇಶ್‌, ಟಿಎಪಿಸಿಎಂಎಸ್‌ ಅಧ್ಯಕ್ಷ ಟಿ.ಪಿ.ಸುಬ್ರಹ್ಮಣ್ಯ, ಒಕ್ಕಲಿಗರ ಸಂಘದ ಪ್ರಧಾನ ಕಾರ್ಯದರ್ಶಿ ವೈ.ಎಸ್‌. ರಾಮಸ್ವಾಮಿ, ನನ್ನವ್ವ ಕಲಾತಂಡದ ಅಧ್ಯಕ್ಷ ವೈ.ಜಿ. ಮಹದೇವ, ಯಾಚೇನಹಳ್ಳಿ ಪಿಎಸಿಸಿಎಸ್‌ ಸಿಇಒ ವೈ.ಕೆ. ಕ್ಯಾತೆಗೌಡ ಇತರರಿದ್ದರು.
