ಅಮೆಜಾನ್‌ನಲ್ಲಿ ಸುಂದರ್‌ ಬನ್‌ ಜೇನುತುಪ್ಪ ಲಭ್ಯ

ಕೋಲ್ಕತ್ತಾ: ಭಾರತದ ಅತಿದೊಡ್ಡ ಹುಲಿ ಸಂರಕ್ಷಿತ ವನ್ಯಧಾಮ, ಪ. ಬಂಗಾಲದ “ಸುಂದರ್‌ಬನ್‌’ ಅರಣ್ಯಗಳ ತಾಜಾ ಜೇನು ತುಪ್ಪ ಇದೀಗ ಅಮೆಜಾನ್‌ ಇ- ಕಾಮರ್ಸ್‌ ಜಾಲದಲ್ಲಿ ಮಾರಾಟಕ್ಕೆ ಲಭ್ಯವಿದೆ. ಪ್ರತಿ ಬಾಟಲಿ ಜೇನುತುಪ್ಪಕ್ಕೆ 600 ರೂ. ನಿಗದಿಪಡಿಸಲಾಗಿದೆ. ಜೇನುತುಪ್ಪ ಮಾರಾಟ ದಿಂದ ಬಂದ ಹಣದಿಂದ ಹುಲಿಗಳ ಸಂರಕ್ಷಣೆ, ಸುಂದರ್‌ಬನ್‌ ಕಾಡಂಚಿನ ಜೇನು ಸಂರಕ್ಷಣಾ ಕಾರರ ಜೀವನ ನಿರ್ವಹಣೆ ಸಾಧ್ಯವಾಗಲಿದೆ.

37 ಟನ್‌ ಜೇನು!: ರಾಯಲ್‌ ಬಂಗಾಲ ಹುಲಿ ಆವಾಸಸ್ಥಾನ, ಮ್ಯಾಂಗ್ರೋವ್‌ ಕಾಡುಗಳಿಂದ ಆವೃತವಾದ ಸುಂದರ್‌ಬನ್‌ನಲ್ಲಿ ಕಾಡಂಚಿನ ಜನರು ಜೇನು ಕೀಳಲು ಧಾವಿಸುತ್ತಿದ್ದರು. ಈ ವೇಳೆ ಹುಲಿಗಳ ದಾಳಿಯಿಂದಾಗಿ ಸಾವು- ನೋವುಗಳು ವರದಿಯಾಗಿದ್ದವು. ಮಾನವ- ಪ್ರಾಣಿ ಸಂಘರ್ಷ ತಪ್ಪಿಸಲೆಂದೇ, ಕಾಡಂಚಿನ 72 ಜನರಿಗೆ ಜೇನುಪೆಟ್ಟಿಗೆ ಖರೀದಿಸಲು ಪಶ್ಚಿಮ ಬಂಗಾಲ ಸಹಕಾರಿ ಬ್ಯಾಂಕ್‌ಗಳಿಂದ ಸಾಲ ನೀಡಲಾಗಿತ್ತು. ಈ ಲಾಕ್‌ಡೌನ್‌ ಅವಧಿಯಲ್ಲಿ ಒಟ್ಟು 37 ಟನ್‌ ಜೇನುತುಪ್ಪವನ್ನು ಉತ್ಪಾದಿ ಸಲಾಗಿದೆ. ಅರಣ್ಯ ಇಲಾಖೆ ಸಹಕಾರದಿಂದ ಈಗ ಅಲ್ಲಿನ ಉತ್ಪನ್ನಗಳು ಜಾಗತಿಕವಾಗಿ ಮಾರು ಕಟ್ಟೆ ಪಡೆಯಲಿವೆ.