ಬಹುಭಾಷೆಯಲ್ಲಿ ಬಿಡುಗಡೆಯಾದ “ಸೈರಾ’ ಹಾಗೂ ಬಿಡುಗಡೆಗೆ ಸಿದ್ಧವಾಗಿರುವ “ದಬಾಂಗ್‌-3′ ಚಿತ್ರಗಳ ಮೂಲಕ ಹೆಚ್ಚೆಚ್ಚು ಸುದ್ದಿಯಾದ ನಟ ಸುದೀಪ್‌, ಈ ಬಾರಿ ಹಾಲಿವುಡ್‌ನ ಬಹುನಿರೀಕ್ಷಿತ ಚಿತ್ರವೊಂದರ ಮೂಲಕ ಸುದ್ದಿಯಲ್ಲಿದ್ದಾರೆ. ಅದು “ಟರ್ಮಿನೇಟರ್‌ -ಡಾರ್ಕ್‌ ಫೇಟ್‌’. ಹಾಲಿವುಡ್‌ನ‌ಲ್ಲಿ “ಟರ್ಮಿನೇಟರ್‌’ ಸಿನಿಮಾ ಸೀರಿಸ್‌ನಲ್ಲಿ ಬರುತ್ತಿದ್ದು, ದೊಡ್ಡ ಅಭಿಮಾನಿ ವರ್ಗವನ್ನು ಹೊಂದಿದೆ. ನಟ ಅರ್ನಾಲ್ಡ್ ಅವರ ಆ್ಯಕ್ಷನ್‌ಗೂ ಸಿನಿಪ್ರಿಯರು ಫಿದಾ ಆಗಿದ್ದಾರೆ.
ಈಗ “ಟರ್ಮಿನೇಟರ್‌ -ಡಾರ್ಕ್‌ ಫೇಟ್‌’ ಬಿಡುಗಡೆಗೆ ರೆಡಿಯಾಗಿದ್ದು, ನವೆಂಬರ್‌ 1ಕ್ಕೆ ತೆರೆಕಾಣುತ್ತಿದೆ. ಈಗ ಈ ಚಿತ್ರಕ್ಕೆ ಸುದೀಪ್‌ ಸಾಥ್‌ ನೀಡಿದ್ದಾರೆ. ಅದು ಹೇಗೆ ಅಂತೀರಾ, ಆ ಚಿತ್ರದ ಕನ್ನಡ ವರ್ಶನ್‌ ಟ್ರೇಲರ್‌ ಅನ್ನು ಸುದೀಪ್‌ ಬಿಡುಗಡೆ ಮಾಡಿದ್ದಾರೆ. ಹೌದು, “ಟರ್ಮಿನೇಟರ್‌ -ಡಾರ್ಕ್‌ ಫೇಟ್‌’ ಕೂಡಾ ಕನ್ನಡದಲ್ಲಿ ಡಬ್‌ ಆಗಿ ಬಿಡುಗಡೆಯಾಗುತ್ತಿದೆ. ಈ ಟ್ರೇಲರ್‌ ಅನ್ನು ಸುದೀಪ್‌ ಬಿಡುಗಡೆ ಮಾಡಿ, ಆ ಬಗ್ಗೆ ಟ್ವೀಟರ್‌ನಲ್ಲಿ ಬರೆದುಕೊಂಡಿದ್ದಾರೆ.
“ಅರ್ನಾಲ್ಡ್ ದೊಡ್ಡ ಆಕ್ಷನ್‌ ಹೀರೋಗಳಲ್ಲಿ ಒಬ್ಬರು ಮತ್ತು ನಾನು ಅವರ ಅಭಿಮಾನಿ ಕೂಡ ಹೌದು. ಟರ್ಮಿನೇಟರ್‌ ಫ್ರ್ಯಾಂಚೈಸ್‌ ನನ್ನಲ್ಲಿರುವ ಅಭಿಮಾನಿಯನ್ನು ರೋಮಾಂಚನಗೊಳಿಸಿದೆ. ಫಾಕ್ಸ್‌ ಸ್ಟುಡಿಯೋಸ್‌ಗಾಗಿ ಕನ್ನಡ ಟ್ರೈಲರ್‌ ಅನ್ನು ಬಿಡುಗಡೆ ಮಾಡಲು ನನಗೆ ಸಂತೋಷವಾಗಿದೆ’ ಎಂದು ಬರೆದುಕೊಂಡಿದ್ದಾರೆ. ಅಂದಹಾಗೆ, ಈಗಾಗಲೇ “ಟರ್ಮಿನೇಟರ್‌’ ಐದು ಭಾಗ ಬಂದಿದ್ದು, ಇದು “ಟರ್ಮಿನೇಟರ್‌- ಡಾರ್ಕ್‌ ಫೇಟ್‌’ ಆರನೇ ಭಾಗವಾಗಿದೆ.
