ಗಬ್ಬು ನಾರುತ್ತಿದೆ ಗುತ್ತಿಗಾರು ಶಾಲೆ ಶೌಚಾಲಯ

ಸುಬ್ರಹ್ಮಣ್ಯ : ಗುತ್ತಿಗಾರು ಗ್ರಾ.ಪಂ. ವ್ಯಾಪ್ತಿಯ ಗುತ್ತಿಗಾರು ಸ.ಮಾ. ಹಿ.ಪ್ರಾ. ಶಾಲೆಯ ಮುಂಭಾಗ ಇರುವ ಹಳೆ ಶೌಚಾಲಯ ಶುಚಿತ್ವದ ಕೊರತೆ ಎದುರಿಸುತ್ತಿದ್ದು, ಬಳಕೆಗೆ ಯೋಗ್ಯವಾಗಿಲ್ಲ.

ಜಾಲ್ಸೂರು-ಸುಬ್ರಹ್ಮಣ್ಯ ಮುಖ್ಯ ಮಾರ್ಗ ಬದಿಯಲ್ಲಿ ಶಾಲೆಯಿದ್ದು, ಮುಂಭಾಗದಲ್ಲೆ ಶೌಚಾಲಯವಿದೆ. ಶುಚಿತ್ವ, ನಿರ್ವಹಣೆ ಕೊರತೆಯಿಂದ ಅದು ಗಬ್ಬೆದ್ದು ನಾರುತ್ತಿದೆ. ರಸ್ತೆಯಲ್ಲಿ ಸಂಚರಿಸುವಾಗಲೂ ದುರ್ನಾತ ಮೂಗಿಗೆ ಬಡಿಯುತ್ತಿದೆ. ಚಿಣ್ಣರ ಮನೆ ಮಕ್ಕಳು ಸಹಿತ ಶಾಲೆಯಲ್ಲಿ ಕಲಿಯುತ್ತಿರುವ 1ರಿಂದ 7ನೇ ತರಗತಿ ವಿದ್ಯಾರ್ಥಿಗಳು ಈ
ಶೌಚಾಲಯ ಬಳಸುತ್ತಿದ್ದಾರೆ. ಈ ಶಾಲೆಯಲ್ಲಿ ಹೆಣ್ಣುಮಕ್ಕಳು ಅಧಿಕ ಸಂಖ್ಯೆಯಲ್ಲಿದ್ದಾರೆ. ಶೌಚಾಲಯ ಸಮರ್ಪಕವಾಗಿಲ್ಲದೆ ಅವರಿಗೆ ತೊಂದರೆಯಾಗುತ್ತಿದೆ. ಹೊಸ ಶೌಚಾಲಯ ನಿರ್ಮಿಸಿಕೊಡುವಂತೆ ಮನವಿ ಮಾಡಿದ್ದರೂ ಪ್ರಯೋಜನವಾಗಿಲ್ಲ ಎಂದು ಸ್ಥಳೀಯರು ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.