ಎಸ್‌.ಟಿ. ಪಾಟೀಲ ಸರಿಗಟ್ಟಿದ ಗದ್ದಿಗೌಡರ

ಬಾಗಲಕೋಟೆ: ಪ್ರಸ್ತುತ ಲೋಕಸಭೆ ಚುನಾವಣೆಯಲ್ಲಿ 4ನೇ ಬಾರಿಗೆ ಜಯಗಳಿಸಿದ ಬಿಜೆಪಿಯ ಪಿ.ಸಿ. ಗದ್ದಿಗೌಡರ, ತಮ್ಮ ದಾಖಲೆಯನ್ನು ತಾವೇ ಮುರಿದಿದ್ದಾರೆ.

ಹೌದು, ಈ ವರೆಗಿನ ಒಟ್ಟು 16 ಲೋಕಸಭೆ ಚುನಾವಣೆಯಲ್ಲಿ ಕಳೆದ 2014ರ ಚುನಾವಣೆಯಲ್ಲಿ 1.16 ಲಕ್ಷ ಮತಗಳ ಅಂತರದ ಗೆಲುವು ಸಾಧಿಸಿ, ಅತಿ ಹೆಚ್ಚು ಮತಗಳ ಅಂತರದಿಂದ ಗೆದ್ದ ದಾಖಲೆ ಬರೆದಿದ್ದರು. ಈ ಬಾರಿ 1,68,187 ಮತಗಳ ಅಂತರದ ಗೆಲುವು ಸಾಧಿಸಿದ್ದು, ಕಳೆದ ಬಾರಿಯ ತಮ್ಮ ಗೆಲುವಿನ ಅಂತರವನ್ನು ಈ ಬಾರಿ ತಾವೇ ಮುರಿದಿದ್ದಾರೆ.

ಅಲ್ಲದೇ ಈ ವರೆಗೆ ನಡೆದ ಒಟ್ಟು 16 ಲೋಕಸಭೆ ಚುನಾವಣೆಯಲ್ಲಿ ಬಾಗಲಕೋಟೆ ಕ್ಷೇತ್ರವನ್ನು ಸತತ ನಾಲ್ಕು ಬಾರಿ ಆಯ್ಕೆಯಾದವರಲ್ಲಿ ದಿ.ಎಸ್‌.ಟಿ. ಪಾಟೀಲರ ದಾಖಲೆಯಾಗಿತ್ತು. ಇದೀಗ ಗದ್ದಿಗೌಡರ ಅವರು, ಸತತ 4ನೇ ಬಾರಿ ಆಯ್ಕೆಗೊಂಡು ಎಸ್‌.ಟಿ. ಪಾಟೀಲರನ್ನು ಸರಿಗಟ್ಟಿದ್ದಾರೆ.

ಕಳೆದ ಬಾರಿಯ ಲೋಕಸಭೆ ಚುನಾವಣೆಯಲ್ಲಿ ನೋಟಾಕ್ಕೆ ನಾಲ್ಕನೆಯ ಸ್ಥಾನವಿತ್ತು. ಈ ಬಾರಿ ಬಿಜೆಪಿ, ಕಾಂಗ್ರೆಸ್‌ ಅಭ್ಯರ್ಥಿಗಳ ಬಳಿಕ, ನೋಟಾಕ್ಕೆ ಅತಿಹೆಚ್ಚು ಮತಗಳು ಬಿದ್ದಿದ್ದು ದಾಖಲೆಯಾಗಿದೆ.