“ಆರ್ ಆರ್ ಆರ್” ಶೂಟಿಂಗ್ ಗೆ ಅಲಿಯಾ ಭಟ್, ಸ್ವಾಗತ ಕೋರಿದ ರಾಜಮೌಳಿ!

ಹೈದರಾಬಾದ್:ಬಾಲಿವುಡ್ ನಟಿ ಅಲಿಯಾ ಭಟ್ ಕೊನೆಗೂ ರಾಜಮೌಳಿ ಅವರ ಆರ್ ಆರ್ ಆರ್ ಚಿತ್ರತಂಡಕ್ಕೆ ಸೇರಿಕೊಂಡಿದ್ದು, ನಿರ್ದೇಶಕ ರಾಜಮೌಳಿ ಅಲಿಯಾ ಅವರನ್ನು ಸೆಟ್ ಗೆ ಸ್ವಾಗತಿಸಿ ಬರಮಾಡಿಕೊಂಡಿರುವುದಾಗಿ ವರದಿ ತಿಳಿಸಿದೆ.

ಆರ್ ಆರ್ ಆರ್ (Rise Roar Revolt) ಆ್ಯಕ್ಷನ್ ಕಥಾಹಂದರದ ಚಿತ್ರದ ಚಿತ್ರೀಕರಣ ಹೈದರಾಬಾದ್ ನಲ್ಲಿ ಆರಂಭಗೊಂಡು ಕೆಲವು ತಿಂಗಳು ಕಳೆದಿತ್ತು. ಆದರೆ ಅಲಿಯಾ ಭಟ್ ಚಿತ್ರೀಕರಣದಲ್ಲಿ ಯಾವಾಗ ಪಾಲ್ಗೊಳ್ಳಲಿದ್ದಾರೆ ಎಂಬ ಕುತೂಹಲ ಮೂಡಿಸಿತ್ತು.

ಇದೀಗ ಅಲಿಯಾ ಭಟ್ ತೆಲುಗು ಭಾಷೆಯ ಆರ್ ಆರ್ ಆರ್ ಸಿನಿಮಾದ ಚಿತ್ರೀಕರಣದಲ್ಲಿ ಭಾಗಿಯಾಗುವುದಾಗಿ ಟ್ವೀಟ್ ಮಾಡಿದ್ದು, ಕೊನೆಗೂ ಆರ್ ಆರ್ ಆರ್ ತಂಡ ಸೇರಲಿದ್ದೇನೆ ಎಂದು ತಿಳಿಸಿದ್ದರು.

ಇದು 20ನೇ ಶತಮಾನದ ಸ್ವಾತಂತ್ರ್ಯ ಹೋರಾಟಗಾರರಿಬ್ಬರ ಕಥೆಯಾಗಿದೆ. ಅಲ್ಲೂರಿ ಸೀತಾರಾಮ ರಾಜು ಮತ್ತು ಕುಮ್ರಾಮ್ ಭೀಮ್ ಎಂಬ ಇಬ್ಬರು ಅಪ್ರತಿಮ ಹೋರಾಟಗಾರರ ಪಾತ್ರದಲ್ಲಿ ರಾಮ್ ಚರಣ್ ಹಾಗೂ ಜ್ಯೂನಿಯರ್ ಎನ್ ಟಿ ರಾಮರಾವ್ ನಟಿಸಲಿದ್ದಾರೆ ಎಂದು ಚಿತ್ರತಂಡ ಹೇಳಿದೆ.

ಇದನ್ನೂ ಓದಿ:ಉಸಿರಾಟದ ಮೇಲೂ ಗಮನವಿರಲಿ…ಬೆಳಗ್ಗೆದ್ದು ಓಡುವ ಮುನ್ನ ತಿಳಿದುಕೊಳ್ಳಿ

ಅಕ್ಟೋಬರ್ ತಿಂಗಳಿನಲ್ಲಿ ಬಾಹುಬಲಿ ಖ್ಯಾತಿಯ ಚಿತ್ರನಿರ್ದೇಶಕ ರಾಜಮೌಳಿ ಅವರು ಹೈದರಾಬಾದ್ ನಲ್ಲಿ ಕೋವಿಡ್ 19 ಸೋಂಕಿನ ನಡುವೆ ಅಗತ್ಯ ಮುಂಜಾಗ್ರತಾ ಕ್ರಮದೊಂದಿಗೆ ಚಿತ್ರೀಕರಣ ಪುನರಾರಂಭಿಸಿದ್ದರು.

ಡಿವಿವಿ ಎಂಟರ್ ಟೈನ್ ಮೆಂಟ್ ಈ ಸಿನಿಮಾದ ನಿರ್ಮಾಪಕರಾಗಿದ್ದು, ಆರ್ ಆರ್ ಆರ್ ಚಿತ್ರದಲ್ಲಿ ಬಾಲಿವುಡ್ ಸ್ಟಾರ್ ನಟ ಅಜಯ್ ದೇವಗನ್ ಕೂಡಾ ಮುಖ್ಯಭೂಮಿಕೆಯಲ್ಲಿ ಕಾಣಿಸಿಕೊಳ್ಳಲಿದ್ದಾರೆ ಎಂದು ವರದಿ ತಿಳಿಸಿದೆ.

ರಾಜಮೌಳಿ ಅವರ ಬಹುನಿರೀಕ್ಷೆಯ “ಆರ್ ಆರ್ ಆರ್” ಸಿನಿಮಾ 2021ರ ಜನವರಿ 8ರಂದು ತಮಿಳು, ಕನ್ನಡ, ಹಿಂದಿ ಹಾಗೂ ಮಲಯಾಳಂ ಭಾಷೆಯಲ್ಲಿ ದೇಶಾದ್ಯಂತ ತೆರೆ ಕಾಣಲಿದೆ ಎಂದು ಮೂಲಗಳು ಹೇಳಿವೆ.