ನಾಯಕ ಗಂಗೂಲಿ ಆಹ್ವಾನ ತಿರಸ್ಕರಿಸಿದ್ದ ಶ್ರೀನಾಥ್‌

ಬೆಂಗಳೂರು: ಭಾರತ ಕಂಡ ಶ್ರೇಷ್ಠ ವೇಗಿಗಳಲ್ಲಿ ಒಬ್ಬರಾದ ಕನ್ನಡಿಗ ಜಾವಗಲ್‌ ಶ್ರೀನಾಥ್‌ ಕ್ರಿಕೆಟ್‌ ಬದುಕಿನ ಸಂಧ್ಯಾಕಾಲದಲ್ಲಿ ಅಸಮಾಧಾನ ಗೊಂಡ ಘಟನೆ ಬಗ್ಗೆ ಹೇಳಿದ್ದಾರೆ.

“2002ರ ವೆಸ್ಟ್‌ ಇಂಡೀಸ್‌ ಪ್ರವಾಸದ ಬಳಿಕ ಆಯ್ಕೆ ಸಮಿತಿ ನನಗೆ ವಿಶ್ರಾಂತಿ ನೀಡುವುದಾಗಿ ಹೇಳಿತು. ನನ್ನ ಪಾಲಿಗೆ ಇದೊಂದು ಅನಿರೀಕ್ಷಿತ ಬೆಳವಣಿಗೆ. ಇದರಿಂದ ನನಗೆ ಇಂಗ್ಲೆಂಡ್‌ ಪ್ರವಾಸ ತಪ್ಪುತ್ತಿತ್ತು. ಬ್ರೇಕ್‌ ನಾನೇ ನಿರ್ಧರಿಸಿ ತೆಗೆದುಕೊಳ್ಳಬೇಕಾದ ವಿಚಾರ. ನನ್ನ ಕ್ರಿಕೆಟ್‌ ಬದುಕಿನಲ್ಲಿ ಬೇರೆಯವರು ಆಟವಾಡುವುದು ಇಷ್ಟವಿರಲಿಲ್ಲ…’ ಎಂದು ಶ್ರೀನಾಥ್‌ ಘಟನೆಯನ್ನು ವಿವರಿಸಿದರು.

“ಬಳಿಕ ನಾನು ಕೌಂಟಿ ಕ್ರಿಕೆಟ್‌ ಆಡಲು ಇಂಗ್ಲೆಂಡಿಗೆ ತೆರಳಿದೆ. ಆಗ ನಾಯಕ ಗಂಗೂಲಿ ಕರೆ ಮಾಡಿ, ಇಂಗ್ಲೆಂಡ್‌ ಸರಣಿಯಲ್ಲಿ ಆಡುವಂತೆ ಕೇಳಿಕೊಳ್ಳುತ್ತಾರೆ. ಆದರೆ ಗೊಂದಲದಲ್ಲಿದ್ದ ನಾನು ಈ ಆಹ್ವಾನವನ್ನು ಒಪ್ಪಲಿಲ್ಲ. ಪರಿಸ್ಥಿತಿ ತಿಳಿಗೊಂಡ ಬಳಿಕ ಭಾರತದ ಪರ ಆಡಲು ಒಪ್ಪಿದೆ. 2003ರ ವಿಶ್ವಕಪ್‌ ಪಂದ್ಯಾವಳಿಯಲ್ಲೂ ಆಡಿದೆ’ ಎಂದು ಶ್ರೀನಾಥ್‌ ಹೇಳಿದ್ದಾರೆ.