ಶ್ರೀಕಾಂತ್‌ಗೆ ವಿಶ್ವದಲ್ಲೇ ಗರಿಷ್ಠ ಬಹುಮಾನ!

ಹೈದರಾಬಾದ್‌: ವಿಶ್ವದ ನಂ.2 ಬ್ಯಾಡ್ಮಿಂಟನ್‌ ಆಟಗಾರ ಕೆ. ಶ್ರೀಕಾಂತ್‌ ಈ ವರ್ಷ ವಿಶ್ವದಲ್ಲೇ ಗರಿಷ್ಠ ಹಣವನ್ನು ಬಹುಮಾನವಾಗಿ ಗಳಿಸಿದ್ದಾರೆ. ಅವರ ಗಳಿಕೆ 1.54 ಕೋಟಿ ರೂ!

ಸತತ 4 ಸೂಪರ್‌ ಸೀರೀಸ್‌ ಗೆದ್ದಿರುವುದೇ ಶ್ರೀಕಾಂತ್‌ ಅವರ ಆದಾಯ ಏರಿಕೆಗೆ ಕಾರಣ. ಅಚ್ಚರಿಯೆಂದರೆ, ಶ್ರೀಕಾಂತ್‌ ಅವರು ಮಲೇಶ್ಯದ ಮಾಜಿ ವಿಶ್ವ ನಂ.1 ಆಟಗಾರ ಲೀ ಚಾಂಗ್‌ ವೀ ಅವರನ್ನೇ ಮೀರಿ ನಿಂತಿದ್ದಾರೆ. ಇದು ಅಷ್ಟಿಷ್ಟು ಏರಿಕೆಯಲ್ಲ, ಡಾನ್‌ಗಿಂತ 3 ಪಟ್ಟು ಏರಿಕೆ!

ಶ್ರೀಕಾಂತ್‌ ಈ ವರ್ಷ ಗರಿಷ್ಠ ಆದಾಯ ಬರುವ 3 ಕೂಟಗಳನ್ನು ಗೆದ್ದಿದ್ದಾರೆ. ಇನ್ನೂ ಎರಡು ಭಾರೀ ಆದಾಯದ ಕೂಟಗಳಾದ ಇಂಡೋನೇಶ್ಯ ಮತ್ತು ದುಬೈ ಸೂಪರ್‌ ಸೀರೀಸ್‌ ಪ್ರೀಮಿಯರ್‌ ಕೂಟಗಳು ಅವರಿಗಾಗಿ ಕಾದು ಕೂತಿವೆ. ಇಲ್ಲಿ ಶ್ರೀಕಾಂತ್‌ ಸ್ಪರ್ಧಿಸಿ ಗೆದ್ದರೆ ಅವರ ಗಳಿಕೆ ಬಹುತೇಕ 2 ಕೋಟಿ ರೂ.ಗೆ ಮುಟ್ಟಲಿದೆ. ಒಂದು ವೇಳೆ ಮುಂದಿನ ಕೂಟಗಳಲ್ಲಿ ಗೆಲ್ಲದೇ ಉತ್ತಮ ಪ್ರದರ್ಶನ ನೀಡಿದರೂ ವಿಶ್ವದ ಗರಿಷ್ಠ ಗಳಿಕೆದಾರ ಎಂಬ ಸ್ಥಾನ ಉಳಿಸಿಕೊಳ್ಳಲಿದ್ದಾರೆ.