ಸ್ಪಿನ್‌ ದಾಳಿ: ಮೊದಲ ಓವರ್‌ನಲ್ಲಿ ವಿಕೆಟ್!

ಲಂಡನ್‌: ಇಂಗ್ಲಂಡ್‌ ಮತ್ತು ದಕ್ಷಿಣ ಆಫ್ರಿಕಾ ನಡುವೆ ನಡೆದ ವಿಶ್ವಕಪ್‌ ಟೂರ್ನಿಯ ಮೊದಲ ಪಂದ್ಯವೇ ಸಣ್ಣದೊಂದು ಅಚ್ಚರಿಗೆ ಕಾರಣವಾಯಿತು. ದಕ್ಷಿಣ ಆಫ್ರಿಕಾದ ನಾಯಕ ಫಾ ಡು ಪ್ಲೆಸಿಸ್‌ ಮೊದಲ ಓವರ್‌ ಎಸೆಯಲು ಚೆಂಡನ್ನು ಸ್ಪಿನ್ನರ್‌ ಇಮ್ರಾನ್‌ ತಾಹಿರ್‌ ಅವರಿಗೆ ನೀಡಿದ್ದೇ ಈ ಅಚ್ಚರಿ. ಈ ಮೂಲಕ ತಾಹಿರ್‌ ವಿಶ್ವಕಪ್‌ ಇತಿಹಾಸದಲ್ಲಿ ಮೊದಲ ಓವರ್‌ ಎಸೆದ ಸ್ಪಿನ್‌ ಬೌಲರ್‌ ಎಂಬ ಹಿರಿಮೆಗೆ ಪಾತ್ರರಾದರು.

ನಾಯಕ ತನ್ನ ಮೇಲಿಟ್ಟಿದ್ದ ನಂಬಿಕೆಯನ್ನು ತಾಹಿರ್‌ ಹುಸಿಗೊಳಿಸಲಿಲ್ಲ. ಎರಡನೇ ಎಸೆತದಲ್ಲಿಯೇ ಅವರು ಜಾನಿ ಬೇರ್‌ಸ್ಟೊ ಅವರನ್ನು ಶೂನ್ಯಕ್ಕೆ ಔಟ್ ಮಾಡಿ ಮೈದಾನದುದ್ದಕ್ಕೂ ಓಡಿ ಮೆರೆದಾಡಿದರು.

ಇಂಗ್ಲಂಡ್‌ನ‌ಲ್ಲಿ 1975ರಲ್ಲಿ ನಡೆದ ಚೊಚ್ಚಲ ವಿಶ್ವಕಪ್‌ ಕೂಟದ ಮೊದಲ ಪಂದ್ಯದಲ್ಲಿ ಮೊದಲ ಎಸೆತ ಎಸೆದ ದಾಖಲೆ ಭಾರತದ ವೇಗದ ಬೌಲರ್‌ ಮದನ್‌ ಲಾಲ್ ಹೆಸರಿನಲ್ಲಿದೆ.