Advertisement
ಸೈನಿಕರು ಕಾಯುವ ಗಡಿ ಪ್ರದೇಶದಲ್ಲಿ ನೆಟ್‌ ವರ್ಕ್‌ ಸಿಗುವುದು ಕಷ್ಟ. ಹಾಗಾಗಿ ಸೇನೆಯಿಂದ ಬೇರೆ ಫೋನ್ಸೌಲಭ್ಯವನ್ನು ಕಲ್ಪಿಸಿರುತ್ತಾರೆ. ನಿಗದಿತ ಸಮಯದಲ್ಲಿ ಒಬ್ಬರ ಹಿಂದೆ ಮತ್ತೂಬ್ಬರು ಕಾಯಬೇಕಾದ ಪರಿಸ್ಥಿತಿ ಇದ್ದದ್ದೇ. ಆದರೂ ತಮ್ಮ ವೈಯಕ್ತಿಕ ಫೋನ್‌ ನಲ್ಲಿ ಕುಟುಂಬದವರಿಗೆ ಮಾತ ನಾಡಲು ಅವಕಾಶವಿದೆ. ಆದರೆ ಇದಕ್ಕೆ ನೆಟ್‌ ವರ್ಕ್‌ ಸಹಕರಿಸಬೇಕಷ್ಟೇ!
ಉಜಿರೆಯಲ್ಲಿ ಪದವಿ ವ್ಯಾಸಂಗ ಮಾಡುತ್ತಿದ್ದಾಗ ಸೈನ್ಯಕ್ಕೆ ಆಯ್ಕೆಗೊಂಡ ಸುದರ್ಶನ್‌, 17 ವರ್ಷಗಳಿಂದ ದೇಶವನ್ನು ಕಾಯುತ್ತಿದ್ದಾರೆ. ಒಂದೂವರೆ ತಿಂಗಳಿನಿಂದ ಗಡಿಭಾಗದಲ್ಲಿ ಸಾವಿರಾರು ಅಡಿ ಎತ್ತರದ ಪ್ರದೇಶಕ್ಕೆ ನಿಯೋಜಿತರಾಗಿದ್ದಾರೆ. ಲಾವಣ್ಯಾ ಬೆಂಗಳೂರಿನಲ್ಲಿ ಕಂಪೆನಿಯೊಂದರಲ್ಲಿ ಅಕೌಂಟೆಂಟ್‌ ಆಗಿದ್ದಾರೆ. ದಂಪತಿಗೆ ಒಂದು ವರ್ಷ ಎಂಟು ತಿಂಗಳ ಪ್ರಾಯದ ಪುತ್ರನಿದ್ದಾನೆ. ಸುದರ್ಶನ್‌ ಅವರ ತಾಯಿ ಹಾಗೂ ಸೋದರ ಕಕ್ಯಾನದಲ್ಲಿದ್ದಾರೆ.
Related Articles
ಒಂದೂವರೆ ತಿಂಗಳಿನಿಂದ ದುರ್ಗಮ ಪ್ರದೇಶದಲ್ಲಿದ್ದಾರೆ. ಅಲ್ಲಿ ವಿಪರೀತ ಹಿಮ. ನಾನು ಭಯಪಡುವೆ ಎಂದು ಗಡಿಯಲ್ಲಿನ ಸ್ಥಿತಿಯನ್ನು ಹೇಳಿಕೊಂಡಿರಲಿಲ್ಲ ಅವರು. ಒಂದೂವರೆ ತಿಂಗಳಿನಿಂದ ಕರೆಗೂ ಸಿಕ್ಕಿರಲಿಲ್ಲ. ಅವರ ಜತೆಗೆ ಇರುವವರ ದೂರವಾಣಿಗೆ ಕರೆ ಮಾಡಿದ್ದರೂ ಸಂಪರ್ಕ ಸಿಕ್ಕಿರಲಿಲ್ಲ. ಹಾಗಾಗಿ ಭಯವಾಗಿತ್ತು. ರವಿವಾರ ಕರ್ತವ್ಯದ ಸ್ಥಳದಿಂದ 8 ಕಿ.ಮೀ. ಕೆಳಗೆ ಬಂದು ಫೋನ್‌ ಮಾಡಿದ್ದರು. ಒಂದು ನಿಮಿಷ ಮಾತನಾಡಿದ್ದೇ ಅಷ್ಟೇ. ಅವರೊಂದಿಗಿರುವ ಸುಮಾರು 900ಕ್ಕೂ ಅಧಿಕ ಸೈನಿಕರೂ ಕರೆ ಮಾಡಲು ಕಾಯುತ್ತಿರುತ್ತಾರಂತೆ’ ಎನ್ನುತ್ತಾರೆ ಲಾವಣ್ಯಾ.
Advertisement
ಸುದರ್ಶನ್‌ ಅವರು 14ನೇ ಎಂಜಿನಿಯರ್‌ ವಿಭಾಗದಲ್ಲಿ ಕರ್ತವ್ಯದಲ್ಲಿದ್ದರು. ನಾಲ್ಕು ವರ್ಷದ ಹಿಂದೆಯಷ್ಟೇ ಮದುವೆಯಾಗಿದೆ. ವರ್ಷದಲ್ಲಿ 3 ತಿಂಗಳು ರಜೆಯ ಅವಕಾಶವಿದ್ದರೂ ಗಡಿ ಭಾಗದಲ್ಲಿನ ಪರಿಸ್ಥಿತಿ ಎಲ್ಲವನ್ನೂ ನಿರ್ಧರಿಸುತ್ತದೆ. ದೀಪಾವಳಿಗೆ ಬರುವುದಾಗಿ ಹೇಳಿದ್ದರೂ ರಜೆ ಸಿಕ್ಕ ಮೇಲೆಯೇ ಖಚಿತ ಎಂಬುದು ಲಾವಣ್ಯಾರ ಮಾತು.
ಅ. 6ರ ಹುಟ್ಟುಹಬ್ಬಕ್ಕೆ ಸೆ. 25ರಂದು ಸಂದೇಶ…!ಅ.6ರಂದು ಲಾವಣ್ಯಾ ಅವರ ಹುಟ್ಟುಹಬ್ಬವಿತ್ತು. ಸಂಭ್ರಮ ಹಂಚಿಕೊಳ್ಳಲು ಗಡಿಭಾಗದಲ್ಲಿರುವ ಪತಿಗೆ ಸಂಪರ್ಕ ಸಿಗುತ್ತದೆ ಎಂಬ ನಂಬಿಕೆ ಇರಲಿಲ್ಲ. ಹಾಗಾಗಿ ಸೆ. 25ರಂದೇ ಇಂಟರ್‌ನೆಟ್‌ ನೆಟ್‌ ವರ್ಕ್‌ ಸಿಕ್ಕಾಗ ತಮ್ಮ ಪತ್ನಿಗೆ ಹುಟ್ಟುಹಬ್ಬದ ಶುಭಾಶಯ ಕೋರಿ ಮೆಸೇಜ್‌ ಹಾಕಿದ್ದರು ಸುದರ್ಶನ್‌. ವಿಚಿತ್ರವೆಂದರೆ, ಅದು ಅಪ್‌ಲೋಡ್‌ ಆಗಿದ್ದು (ಫೇಸ್‌ ಬುಕ್‌ ನ ಪುಟದಲ್ಲಿ ಪ್ರಕಟವಾದದ್ದು) ಅ. 5ರಂದು ಸಂಜೆ. ಹುಟ್ಟುಹಬ್ಬದ ಒಂದು ದಿನ ಮುಂಚೆ ತಮ್ಮ ಪತಿಯ ಶುಭ ಹಾರೈಕೆ ಲಾವಣ್ಯಾರನ್ನು ತಲುಪಿತ್ತು.