ನೀಲ್‌ ಹಾಡಿನಲ್ಲಿ ಪುನೀತ್‌ ಗುಣಗಾನ

ಪವರ್‌ಸ್ಟಾರ್‌ ಪುನೀತ್‌ ರಾಜಕುಮಾರ್‌ ನಿಧನರಾಗಿ ವರ್ಷಗಳು ಕಳೆದರೂ, ಅವರ ಜೀವನ ಮತ್ತು ಸಾಧನೆಯನ್ನು ಸಿನಿಮಾ ಮಂದಿ ಮೆಲುಕು ಹಾಕುತ್ತಲೇ ಇರುತ್ತಾರೆ. ಇದೀಗ ಇಂಥದ್ದೇ ಮತ್ತೂಂದು ಪ್ರಯತ್ನ ಚಿತ್ರರಂಗದಲ್ಲಿ ಆಗಿದೆ.

ಹೌದು, ಕನ್ನಡ ಚಿತ್ರರಂಗದಲ್ಲಿ ಹಲವು ವರ್ಷಗಳಿಂದ ಸಂಗೀತ ನಿರ್ದೇಶಕರಾಗಿ ಗುರುತಿಸಿಕೊಂಡಿರುವ ಬೀದರ್‌ ಮೂಲದ ಎ. ಎಂ. ನೀಲ್‌ ಪುನೀತ್‌ ರಾಜಕುಮಾರ್‌ ಗುಣ, ಸಾಧನೆ, ಸಮಾಜ ಸೇವೆ ಕುರಿತಂತೆ ಎಂಟು ಹಾಡುಗಳಿಗೆ ಸಾಹಿತ್ಯ ರಚಿಸಿ, ಹಾಡುಗಳನ್ನು ಸಂಯೋಜಿಸಿ ಮ್ಯೂಸಿಕ್‌ ಆಲ್ಬಂ ಸಿದ್ದಪಡಿಸಿದ್ದಾರೆ.

ಈಗಾಗಲೇ ಈ ಮ್ಯೂಸಿಕ್‌ ಆಲ್ಬಂನ ಬಹುತೇಕ ಕೆಲಸಗಳು ಪೂರ್ಣಗೊಂಡಿದ್ದು, ಶೀಘ್ರದಲ್ಲಿಯೇ ಪುನೀತ್‌ ಗುಣಗಾನ ಮಾಡುವ ಹಾಡುಗಳನ್ನು ಪುನೀತ್‌ ರಾಜಕುಮಾರ್‌ ಅಭಿಮಾನಿಗಳು ಮತ್ತು ಕೇಳುಗರ ಮುಂದೆ ತರುವ ಯೋಜನೆಯಲ್ಲಿದ್ದಾರೆ ಸಂಗೀತ ನಿರ್ದೇಶಕ ಎ. ಎಂ ನೀಲ್‌.