ಗೋಪಾಡಿ-ಮೂಡುಗೋಪಾಡಿ ರಸ್ತೆಯಲ್ಲಿ  ಸ್ಫೋಟದ ಸದ್ದು?

ಕೋಟೇಶ್ವರ: ಗೋಪಾಡಿಯ ತಿರುವಿನಿಂದ ಮೂಡುಗೋಪಾಡಿ ಹಾಗೂ ಹೂವಿನಕೆರೆ ರಸ್ತೆಯ ಬಳಿ ಶುಕ್ರವಾರ ಮಧ್ಯರಾತ್ರಿಯ ಅನಂತರ ಭಾರೀ ಸರಣಿ ಸ್ಫೋಟದ ಸದ್ದು ಆ ಭಾಗದ ನಿವಾಸಿಗಳಿಗೆ ಕೇಳಿ ಬಂದಿದ್ದು, ಘಟನೆ ತಡವಾಗಿ ಬೆಳಕಿಗೆ ಬಂದಿದೆ. ರಾಷ್ಟ್ರೀಯ ಹೆದ್ದಾರಿ 66ರ ಮಾರ್ಗ ವಾಗಿ ಗೋಪಾಡಿಯಿಂದ ವಕ್ವಾಡಿ ಹಾಗೂ ಮೂಡುಗೋಪಾಡಿಗೆ ಸಾಗುವ ಮುಖ್ಯ ರಸ್ತೆಯ ಮೂರು ಕಡೆಗಳಲ್ಲಿ ಈ ಸ್ಫೋಟದ ಸದ್ದು ಕೇಳಿ ಬಂದಿರುವುದಾಗಿ ಅಲ್ಲಿನ ನಿವಾಸಿಗಳು “ಉದಯವಾಣಿ’ಗೆ ತಿಳಿಸಿದ್ದಾರೆ. ಸ್ಫೋಟ ಸದ್ದು ಕೇಳಿಬಂದ ಅನಂತರ ಎಚ್ಚೆತ್ತ ನಿವಾಸಿಗಳು ಭಯಭೀತ ರಾಗಿ ದೂರವಾಣಿಯ ಮೂಲಕ ಆಸುಪಾಸಿನವರೊಡನೆ ಅನುಭವವನ್ನು ಹಂಚಿಕೊಂಡಿದ್ದರು.

ಏನಿದು ಸದ್ದು?: ಶುಕ್ರವಾರ ರಾತ್ರಿ ಭಾರೀ ಗಾಳಿ ಮಳೆ ಇದ್ದರೂ ಪ್ರಕೃತಿಯ ವಿಕೋಪದ ಯಾವುದೇ ಹಾನಿಕರ ಘಟನೆ ವರದಿಯಾಗಿಲ್ಲ. ಹಾಗಿದ್ದಲ್ಲಿ ಈ ಸ್ಫೋಟ ಸದ್ದಿನ ಮೂಲವೇನು ಎನ್ನುವುದು ಪ್ರಶ್ನಾರ್ಥಕವಾಗಿ ಉಳಿದಿದೆ. ಇದು ಸಾರ್ವ ಜನಿಕರನ್ನು ಭಯಭೀತಿ ಗೊಳಿಸುವ ಹುನ್ನಾರವೇ ಅಥವಾ ಮೋಜಿನ ಯುವಕರ ಕುಕೃತ್ಯವೇ ಎನ್ನುವ ಸಂದೇಹವೂ ವ್ಯಕ್ತವಾಗಿದೆ. ಗೋಪಾಡಿ ಮೂಡು ಗೋಪಾಡಿ, ವಕ್ವಾಡಿ ಪರಿಸರದಲ್ಲಿ ಕಳ್ಳರ ಹಾವಳಿಯ ದೂರು ಕೇಳಿ ಬರುತ್ತಿದ್ದು, ಕಳ್ಳರ ಹಾವಳಿ ಸಹಿತ ಸ್ಫೋಟ ಸದ್ದಿನ ಬಗ್ಗೆ ಪೊಲೀಸರಿಗೆ ಮಾಹಿತಿ ನೀಡಲಾಗಿದೆ.