ಯೋಗಕ್ಕೆ ಸಿಗಲಿದೆ ವಿಮಾ ಡಿಸ್ಕೌಂಟ್‌? ವಿಮಾ ಪ್ರಾಧಿಕಾರದಿಂದ ಕರಡು ಮಾರ್ಗಸೂಚಿ

ನವದೆಹಲಿ: ಯೋಗ ಮಾಡುವ ಅಭ್ಯಾಸ ನಿಮಗಿದೆಯೇ? ಹಾಗಿದ್ದರೆ, ವಿಮಾ ಪ್ರೀಮಿಯಂನಲ್ಲಿ ರಿಯಾಯಿತಿ ಪಡೆಯುವ ಅವಕಾಶವೂ ನಿಮಗೆ ಸಿಗಬಹುದು!

ದೇಶದ ವಿಮಾ ಕಂಪನಿಗಳಿಗೆ ಜೀವವಿಮೆ ಪಾಲಿಸಿಗಳ ಜೊತೆಗೆ “ಕ್ಷೇಮಾಭಿವೃದ್ಧಿ ಕಾರ್ಯಕ್ರಮ’ಗಳ ಆಯೋಜನೆಗೆ ಅನುಮತಿ ನೀಡಲು ಭಾರತೀಯ ವಿಮಾ ನಿಯಂತ್ರಣ ಮತ್ತು ಅಭಿವೃದ್ಧಿ ಪ್ರಾಧಿಕಾರ(ಐಆರ್‌ಡಿಎಐ) ಮುಂದಾಗಿದೆ.

ಈ ಕುರಿತ ಕರಡು ಮಾರ್ಗಸೂಚಿ ಸಿದ್ಧವಾಗಿದ್ದು, ಕಂಪನಿಗಳು ಸಮ್ಮತಿಸಿದರೆ ಇದು ಜಾರಿಯಾಗಲಿದೆ. ಆಗ, ಯೋಗದಂತಹ ಕ್ಷೇಮಾಭಿವೃದ್ಧಿ ಚಟುವಟಿಕೆಯನ್ನು ರೂಢಿಸಿಕೊಂಡವರು ತಮಗೆ ಸಿಕ್ಕ ರಿವಾರ್ಡ್‌ ಪಾಯಿಂಟ್‌ಗಳ ಮೂಲಕ ಪ್ರೀಮಿಯಂ ನವೀಕರಣದ ವೇಳೆ ಡಿಸ್ಕೌಂಟ್‌ ಪಡೆಯಬಹುದಾಗಿದೆ.

ಏನು ಮಾಡಿದರೆ ರಿಯಾಯ್ತಿ?:
ವಿಮಾದಾರ ವ್ಯಕ್ತಿಯು ಆರೋಗ್ಯಕರ ಚಟುವಟಿಕೆಗಳನ್ನು ಮೈಗೂಡಿಸಿಕೊಂಡಿದ್ದರೆ, ಆತನಿಗೆ ಪ್ರೀಮಿಯಂ ನವೀಕರಣದ ವೇಳೆ ವಿಮಾ ಕಂಪನಿಯು ರಿಯಾಯಿತಿ ಘೋಷಿಸಬಹುದು. ಉದಾಹರಣೆಗೆ, ವಾರಕ್ಕೆ ಎಷ್ಟು ಹೆಜ್ಜೆ ನಡೆದಿದ್ದಾನೆ ಎಂಬ ಮಾಹಿತಿ, ಯೋಗಾಭ್ಯಾಸ-ಕ್ಯಾಲೊರಿ ಲೆಕ್ಕ, ಆರೋಗ್ಯಕರ ಎದೆಬಡಿತದ ದರ ಇತ್ಯಾದಿ. ಇದಲ್ಲದೇ, ವಿಮಾ ಕಂಪನಿಗಳೇ ನಡೆಸುವ ಕ್ಷೇಮಾಭಿವೃದ್ಧಿ ಕಾರ್ಯಕ್ರಮದಲ್ಲೂ ಗ್ರಾಹಕರು ಹೆಸರು ನೋಂದಾಯಿಸಿಕೊಳ್ಳಬಹುದು. ಕ್ರಿಯಾಶೀಲರಾಗಿ ಹಾಗೂ ವೈದ್ಯಕೀಯವಾಗಿ ಫಿಟ್‌ ಆಗಿರಲು ಬೇಕಾದ ಚಟುವಟಿಕೆಗಳನ್ನು ರೂಢಿಸಿಕೊಳ್ಳಲು ಈ ವೆಲ್‌ನೆಸ್‌ ರಿವಾರ್ಡ್‌ ಪ್ರೋಗ್ರಾಂ(ಡಬ್ಲ್ಯೂಆರ್‌ಪಿ) ಉತ್ತೇಜನ ನೀಡುತ್ತದೆ. ನಂತರ, ಅವರಿಗೆ ರಿವಾರ್ಡ್‌ ಪಾಯಿಂಟ್‌ ನೀಡಲಿದೆ. ಅದರ ಆಧಾರದಲ್ಲಿ ಅವರು ರಿಯಾಯಿತಿ ಪಡೆಯಬಹುದಾಗಿದೆ.

ಇದನ್ನೂ ಓದಿ:ಕೋವಿಡ್‌ ಲಸಿಕೆ ಕಡ್ಡಾಯ ಪ್ರಶ್ನಿಸಿದ ಅರ್ಜಿ ವಜಾ: ಅರ್ಜಿದಾರ ವಕೀಲರಿಗೆ ಹೈಕೋರ್ಟ್‌ ತರಾಟೆ

ನಿಯಮಗಳೇನು?
– ಯೋಗಕ್ಷೇಮ ಕಾರ್ಯಕ್ರಮದಲ್ಲಿ ಪಾಲ್ಗೊಳ್ಳುವುದು ಪಾಲಿಸಿದಾರರ ಇಚ್ಛೆಗೆ ಬಿಟ್ಟಿದ್ದು
– ಈ ಕಾರ್ಯಕ್ರಮವನ್ನು ವಿಮಾ ಕಂಪನಿಯೇ ನೇರವಾಗಿ ಅಥವಾ ಬೇರೆ ಸಂಸ್ಥೆಯ ಸಹಭಾಗಿತ್ವದಲ್ಲಿ ನಡೆಸಬಹುದು
– ಈ ಕಾರ್ಯಕ್ರಮಗಳನ್ನು ಪಾಲಿಸಿಯಡಿ ಬರುವ ಹೆಚ್ಚುವರಿ ಸೇವೆಯಾಗಿ/ಆಯ್ಕೆಯಾಗಿ ಬಳಸಬೇಕು