ಕುಪ್ವಾರ:ಯೋಧನ ಮೇಲೆ ಉದ್ರಿಕ್ತರಿಂದ ಮಾರಣಾಂತಿಕ ಹಲ್ಲೆ!

ಕುಪ್ವಾರ: ಜಮ್ಮು ಮತ್ತು ಕಾಶ್ಮೀರದಲ್ಲಿ ನಿಗೂಢ ವಿಕೃತ ದುಷ್ಕರ್ಮಿಗಳು ಮಹಿಳೆಯರ ಜಡೆಗಳಿಗೆ ಕತ್ತರಿ ಹಾಕುವ ಘಟನೆಗಳು ದಿನನಿತ್ಯದಂತೆ ವರದಿಯಾಗುತ್ತಿದ್ದು, ಇದರಿಂದ ರೊಚ್ಚಿಗೆದ್ದಿರುವ ಜನರು ಶಂಕೆಯಿಂದ ಸಿಕ್ಕ ಸಿಕ್ಕವರಿಗೆ ಥಳಿಸುತ್ತಿದ್ದಾರೆ. ಪ್ರಾದೇಶಿಕ ಸೈನ್ಯದ ಯೋಧನೊಬ್ಬನ ಮೇಲೂ ಮಂಗಳವಾರ ಸ್ಥಳೀಯ ಉದ್ರಿಕ್ತ ಜನರು ನಡುರಸ್ತೆಯಲ್ಲೇ ಮಾರಣಾಂತಿಕ ಹಲ್ಲೆ ನಡೆಸಿದ್ದಾರೆ. 

ಮಹಿಳೆಯೊಬ್ಬಳ ಜಡೆ ಕತ್ತರಿಸಲ್ಪಟ್ಟ ಬಳಿಕ ಥಳಿತಕ್ಕೊಳಗಾಗುತ್ತಿದ್ದ ಯೋಧನನ್ನು ಸಹುದ್ಯೋಗಿಗಳು ರಕ್ಷಿಸಿದ್ದಾರೆ. ಯೋಧ ಚಿಂತಾಜನಕ ಸ್ಥಿತಿಯಲ್ಲಿದ್ದು, ಆಸ್ಪತ್ರೆಗೆ ದಾಖಲಿಸಿ ಚಿಕಿತ್ಸೆ ಮುಂದುವರಿಸಲಾಗಿದೆ. 

ಘಟನೆಯ ಬಳಿಕ ಕುಪ್ವಾರದಲ್ಲಿ ಉದ್ವಿಗ್ನ ಸ್ಥಿತಿ ನಿರ್ಮಾಣವಾಗಿದೆ.