ಪಾರ್ಕಿಂಗ್‌ ಕಟ್ಟಡ ಸ್ಥಳದ ಮಣ್ಣು ಕುಸಿತ

ಹುಬ್ಬಳ್ಳಿ: ಕೋರ್ಟ್‌ ವೃತ್ತ ಬಳಿ ಸ್ಮಾರ್ಟ್‌ ಸಿಟಿ ಯೋಜನೆಯಡಿ ನಿರ್ಮಿಸಲಾಗುತ್ತಿರುವ ಬಹುಪಯೋಗಿ ಪಾರ್ಕಿಂಗ್‌ ಕಟ್ಟಡ ಕಾಮಗಾರಿ ವೇಳೆ ತಡೆಗೋಡೆಯ ಮಣ್ಣು ಕುಸಿತಗೊಂಡ ಘಟನೆ ನಡೆದಿದೆ.

ಸುಮಾರು 55 ಕೋಟಿ ರೂ. ವೆಚ್ಚದಲ್ಲಿ ಮಲ್ಟಿ ಪಾರ್ಕಿಂಗ್‌ ಕಟ್ಟಡ ನಿರ್ಮಿಸಲಾಗುತ್ತಿದೆ. ಆದರೆ ಕಾಮಗಾರಿ ಆರಂಭವಾದಾಗಿನಿಂದ ಒಂದಿಲ್ಲೊಂದು ಸಮಸ್ಯೆ ಅನುಭವಿಸುತ್ತಲೇ ಇದೆ. ಕಟ್ಟಡ ಕಾಮಗಾರಿ ತಡವಾಗಿ ಆರಂಭವಾಗಿದ್ದು, ಕೊರೊನಾ, ಲಾಕ್‌ಡೌನ್‌ ಸೇರಿದಂತೆ ಹಲವಾರು ಕಾರಣಗಳಿಂದ ಕುಂಟುತ್ತಾ ಸಾಗುತ್ತಿದೆ.

ಇತ್ತೀಚೆಗೆ ಕಟ್ಟಡಕ್ಕೆಂದು ತೆಗೆದ ಆಳದ ಗುಂಡಿಯಿಂದಾಗಿ ಸಾಯಿ ಬಾಬಾ ಮಂದಿರದ ಮುಂಭಾಗದಲ್ಲಿ ರಸ್ತೆ ಕುಸಿತವಾಗುತ್ತಿತ್ತು. ಭಾರಿ ಗಾತ್ರದ ವಾಹನಗಳನ್ನು ಬಿಡದೇ ರಸ್ತೆ ಬಂದ್‌ ಮಾಡಿಕೊಡಬೇಕೆಂದು ಕಾಮಗಾರಿ ಗುತ್ತಿಗೆದಾರರು ಪೊಲೀಸ್‌ ಇಲಾಖೆಯವರಿಗೆ ಮನವಿ ಮಾಡಿಕೊಂಡಿದ್ದರು. ಸ್ಥಳಕ್ಕೆ ಭೇಟಿ ನೀಡಿದ್ದ ಪೊಲೀಸರು ಒಂದು ಭಾಗದ ರಸ್ತೆ ಬಂದ್‌ ಮಾಡಿ ಕಾಮಗಾರಿಗೆ ಅನುವು ಮಾಡಿಕೊಟ್ಟಿದ್ದರು.

ಗುರುವಾರ ರಾತ್ರಿ ಮತ್ತೆ ರಸ್ತೆಯ ಪಕ್ಕದ ಗೋಡೆಯ ಭಾಗ ಕುಸಿದಿದೆ. ಇದರಿಂದ ಕಾಮಗಾರಿಗೆ ಮತ್ತೆ ಅಡ್ಡಿಯುಂಟಾದಂತಾಗಿದೆ. ಕೆಲಸ ಮಾಡುತ್ತಿದ್ದ ವೇಳೆಯೇ ಏಕಾಏಕಿ ಮಣ್ಣು ಕುಸಿದಿದ್ದು ಅದೃಷ್ಟವಶಾತ್‌ ಯಾವುದೇ ಪ್ರಾಣ ಹಾನಿಯಾಗಿಲ್ಲ.