ಅವಮಾನ, ಟೀಕೆಗೆ ಸ್ಮಿತ್‌ ಬ್ಯಾಟಿಂಗ್‌ ಉತ್ತರ

ಚೆಂಡು ವಿರೂಪದಂತಹ ಪ್ರಕರಣದ ಬಳಿಕ ಅಪಮಾನ, ಅ ಪನಿಂದನೆಗಳಿಗೆ ಒಳಗಾಗಿದ್ದ ಸ್ಟೀವ್‌ ಸ್ಮಿತ್‌ ಎಲ್ಲವನ್ನೂ ಮರೆತು ಈಗ ಸಹಜ ಸ್ಥಿತಿಗೆ ಮರಳಿದ್ದಾರೆ, ಭಾರತದ ವಿರುದ್ಧ ಪ್ರವಾಸಿ ಆಸ್ಟ್ರೇಲಿಯ ಮೂರು ಪಂದ್ಯಗಳ ಏಕದಿನ ಸರಣಿಯನ್ನು 2-1ರಿಂದ ಸೋತಿರಬಹುದು, ಆದರೆ ಬ್ಯಾಟಿಂಗ್‌ನಲ್ಲಿ ಸ್ಟೀವ್‌ ಸ್ಮಿತ್‌ ಮೆರೆದಿರುವ ಪರಾಕ್ರಮ ನಿಜಕ್ಕೂ ಶ್ಲಾಘನೀಯ.

ಎರಡನೇ ಏಕದಿನ ಪಂದ್ಯದಲ್ಲಿ ಸ್ಟೀವ್‌ ಸ್ಮಿತ್‌ 98 ರನ್‌ ಸಿಡಿಸಿದ್ದರು. 102 ಎಸೆತದಲ್ಲಿ 9 ಬೌಂಡರಿ, 1 ಸಿಕ್ಸರ್‌ ಚಚ್ಚಿ ಗಮನ ಸೆಳೆದಿದ್ದರು. ಕೇವಲ 2 ರನ್‌ನಿಂದ ಶತಕ ವಂಚಿತರಾಗಿದ್ದರು. ಮೂರನೇ ಪಂದ್ಯದಲ್ಲೂ ಸ್ಟೀವ್‌ ಸ್ಮಿತ್‌ ಅಬ್ಬರದ ಬ್ಯಾಟಿಂಗ್‌ ನಡೆಸಿದ್ದರು. 132 ಎಸೆತ ಎದುರಿಸಿದ್ದ ಸ್ಮಿತ್‌ 14 ಬೌಂಡರಿ, 1 ಸಿಕ್ಸರ್‌ನಿಂದ 131 ರನ್‌ ಬಾರಿಸಿ ಆಸೀಸ್‌ ಮೊತ್ತವನ್ನು 280 ರನ್‌ ಗಡಿ ದಾಟಿಸುವಲ್ಲಿ ಪ್ರಮುಖ ಪಾತ್ರ ನಿರ್ವಹಿಸಿದರು.

ಏಕದಿನ ಕ್ರಿಕೆಟ್‌ನಲ್ಲಿ ಸ್ಮಿತ್‌ ಒಟ್ಟಾರೆ 121 ಪಂದ್ಯವನ್ನಾಡಿದ್ದಾರೆ. ಒಟ್ಟು 4039 ರನ್‌ಗಳಿಸಿದ್ದಾರೆ. 9 ಶತಕ, 24 ಅರ್ಧಶತಕ ಒಳಗೊಂಡಿದೆ. 164 ರನ್‌ ವೈಯಕ್ತಿಕ ಶ್ರೇಷ್ಠ ರನ್‌ ಆಗಿದೆ. 73 ಟೆಸ್ಟ್‌ ಪಂದ್ಯ ಆಡಿದ್ದು ಒಟ್ಟು 7227 ರನ್‌ ಬಾರಿಸಿದ್ದಾರೆ. 26 ಶತಕ, 29 ಅರ್ಧಶತಕ ಒಳಗೊಂಡಿದೆ. 36 ಟಿ20 ಪಂದ್ಯದಲ್ಲೂ ದೇಶ ಪ್ರತಿನಿಧಿಸಿದ್ದಾರೆ. ಒಟ್ಟು 577 ರನ್‌ಗಳಿಸಿದ್ದಾರೆ. 4 ಅರ್ಧಶತಕ ಬಾರಿಸಿದ್ದಾರೆ.