ಜೆಡಿಯು ನಾಯಕನ ಅಪಹರಣ, ಕೊಲೆ: 6 ಮಂದಿಗೆ ಜೀವಾವಧಿ ಶಿಕ್ಷೆ

ಶೇಖ್‌ಪುರ, ಬಿಹಾರ : 2015ರ ಅಕ್ಟೋಬರ್‌ನಲ್ಲಿ ಸ್ಥಳೀಯ ಜೆಡಿಯು ನಾಯಕ ಸಂಜಿತ್‌ ಕುಮಾರ್‌ ಎಂಬವರನ್ನು ಅಪಹರಿಸಿ ಕೊಲೆಗೈದ ಅಪರಾಧಕ್ಕಾಗಿ ಇಲ್ಲಿನ ನ್ಯಾಯಾಲಯವು ಆರು ಮಂದಿಗೆ ಜೀವಾವಧಿ ಶಿಕ್ಷೆ ನೀಡಿದೆ. 

ಸೆಶನ್ಸ್‌ ನ್ಯಾಯಾದೀಶ ಆಲೋಕ್‌ ಕುಮಾರ್‌ ಪಾಂಡೆ ಅವರು ಆರು ಮಂದಿ ಅಪರಾಧಿಗಳಿಗೆ ಜೀವಾವಧಿ ಜೈಲು ಶಿಕ್ಷೆ ಮಾತ್ರವಲ್ಲದೆ ತಲಾ 17,000 ರೂ.ಗಳ ದಂಡವನ್ನೂ ವಿಧಿಸಿದರು. 

ಕೊಲೆಗೀಡಾಗಿದ್ದ ಸಂಜಿತ್‌ ಕುಮಾರ್‌ ಅವರು ಜಿಲ್ಲೆಯ ವ್ರಂದಾವನ ಗ್ರಾಮದ ನಿವಾಸಿಯಾಗಿದ್ದರು. 2015ರ ಅಕ್ಟೋಬರ್‌ 22ರಂದು ಅವರನ್ನು ಅಪಹರಿಸಿದ್ದ ಆರೋಪಿಗಳು ಕುಮಾರ್‌ ಅವರ ಶಿರಚ್ಛೇದನ ಗೈದಿದ್ದರು. ಕುಮಾರ್‌ ಅವರ ರುಂಡ ಮುಂಡ ಅನಂತರದಲ್ಲಿ ಅರಣ್ಯದಲ್ಲಿ ಪತ್ತೆಯಾಗಿತ್ತು.